Alkitab Mobile SABDA
[VER] : [ARALLE]     [PL]  [PB] 
 <<  Wahyu 8 >> 

1Tahpana ullohka'i katahpena suha' kapitunna yato Änä' Domba, mahulla-hulla siang yaho di suruka umbai setangnga tehte' masaena.

2Ungngitamä' pitu malaeka' ang ke'de' di hao di olona Puang Alataala, sika dibea pitu terompe'.

3Tahpa ahang sule mesa malaeka' senga' umbaha kahti bulahang ang si dipaongei kayu-kayu bomammi' anna ke'de'i di olona yato pantunuang penombaang. Dibea mai'di liu kayu-kayu bomammi' ang la dipopenomba sibaha sambayanna samai petauanna Puang Alataala di hao di ongeang pantunuang bulahang ang aha di olona ohko'ang tomaraya.

4Sibaha sambayanna petauanna Puang Alataala, hambunna yato kayu-kayu bomammi' ang menge meleä'-leä', mapulu' ludai' mengkalao di kahti ang natokei malaeka' di olona Puang Alataala.

5Pihsananna naalang inde paongeang bulahang yato malaeka', anna napangngihsii api ang naala di hao mai di pantunuang penombaang mane napentibeing tama di lino. Ya' tahpa mellihpä' siang kundäng, sibaha kila' anna lino'.

6Pitu malaeka' ang untokei pitu terompe' sadiang la mamponi.

7Malaeka' ang uhuna umponi terompe', tahpa kene' batu siang anna api masahhu' sihau haha. Ingkänna indee dipentibeing tama di lino. Sambahe tallunna lino mämpu', lambi' sambahe tallunna poang-poang kayu anna lohpo mämpu' toe'.

8Malaeka' kaderuanna umponi terompe', tahpa kaitaang siang mesa ang käyyäng noa tanete ang meleä'-leä' dipentibeiing tama di le'bo'. Sambahe tallunna le'bo' mendahi haha.

9Ya' mateng sambahe tallunna ingkänna ihsi le'bo' ang tuho anna sambahe tallunna kahpala' tallang.

10Malaeka' katallunna umponi terompe', tahpa dondong siang mesa bintäng käyyäng ang meleä'-leä' sinnoa ballo yaho mai di langi' anna unghoai sambahe tallunna salu uhai sibaha timbu.

11Yato bintäng disanga 'Apsintus' ang bahtuanna: mapäi'. Ya' mapäi'mi sambahe tallunna yato uhai, lambi' mai'di tau mate napobua' yato uhai ang mapäi'.

12Malaeka' kauhpa'na umponi terompe', tahpa tisampung siang sambahe tallunna mata allo, lambi' malilling sambahe tallunna lino. Noa toi di bengi, bulang anna bintäng tisampung sambahe tallunna lambi' dai mesilo pano di sambahe tallunna lino.

13Kupahandammi, ya' kuitang mesa sahebaki molo' yaho di nähäng mane kuhingngii mekoha naoatee, "Tilaka! Tilaka! Tilaka ingkänna to lino, ke kahingngiammi tallu malaeka' senga'na umponi terompe'na!"


  Share Facebook  |  Share Twitter

 <<  Wahyu 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel