Dual Panel1Pihsananna umponing terompe'na yato malaeka' kalimanna. Ya' ungngita bumä' mesa bintäng dondong yaho mai di langi'. Yato bintäng dibea pekilinna kahoäng ang lunaung di ongeanna to mate.
2Umbuhkeing kahoäng yato bintäng, ya' sohommi hambu di hoi' mai sinnoa hambu to pesohe. Malilling siang mata allo anna nähäng napobua' yato hambu.
3Yato hambu naongei sohongngi kakombäng tuhungngi naung di lino, anna dibeai kakuasaang sinnoa alipang.
4Dai dipabei ungkarakei lohpo, bahtu' poang-poang kayu anna pinamula. Supung mala ungkeki' tau ang dai dipadehke'i kandinna tanda petauanna Puang Alataala.
5Yato kakombäng dai dipabei umpatei yato tau, supung la nadahha lima bulanna masaena. Mapi'di'na yato ang napaaha kakombäng sinnoa mapi'di'na pekeki'na alipang.
6Yaling yato di lima bulanna, pemala sika mengkamate, ampo' dasiang mala, aka' kahaoke' kamateannaii.
7Hupanna yato kakombäng sinnoa arahang ang la dibaha ma'tolla'. Yaho di bää'na aha sinnoa songko' bulahang. Lindona sinnoa lindo tau.
8Beluhä'na sinnoa beluhä' bahine, anna isinna sinnoa isi singa.
9Babuana ditutu'i noa hupanna kaya' bahsi. Oninna pani'na sinnoa memuhhunna mai'di bendi ang nahui' arahang ke le'ba'i ma'tolla'.
10Aha okinna sinnoa okinna alipang. Di okinnantoo naongei petohse'na ang pabisa ang undahha tau yaling di lima bulanna.
11Aha toboe' tomarayanna ang mampahenta. Yato tomaraya dianto malaeka' ang untokei pekilinna kahoäng to mate. Sanganna yato malaeka' yaling di basa Ibrani dianto 'Abadon' anna yaling di basa Yunani disanga 'Apolion.' Bahtuanna inde sanga dianto 'Pakarakeang.'
12Katilakaang uhuna lehammi. La deruake' katilakaang ang la sule.
13Tahpana malaeka' kaunnunna umponi terompe'na, ya' kuhingnging kamaha sule di hao mai di uhpa' sikunna pantunuang penombaang bulahang di olona Puang Alataala.
14Yato kamaha ma'kara pano di malaeka' kaunnunna naoatee, "Lahpa'i yato uhpa' malaeka' ang tisangke' di hoi' di Bone Efrat!"
15Ya' dilahpa' siang yato uhpa' malaeka' ang supung dipatokaing tehte' indee, allo dinoa, bulang dinoa, anna pahiama indee la umpatei sambahe tallunna hupatau.
16Kuhingnging dongngatu' juta mai'dinna yato tantara ang moarahang.
17Kuitang yato arahang anna ang mampensakei. Yato to pensake umpake kaya' bahsi pähä'lä', mamahta', anna makuni'. Bää'na yato arahang sinnoa bää' singa anna di suana sohong api, hambu anna ang masae puhpu noanna dama'.
18Sambahe tallunna hupatau napatei inde tallu hupanna kamadahhaang, dianto api, hambu anna noanna dama' ang sohong yaling mai di suana yato arahang.
19Kamatohoanna yato arahang di hao di suana anna di okinna. Okinna kanoaang bää' ile dianto ang ungkarakei hupatau.
20Ampo' la'binna hupatau ang dai napatei yato kamadahhaang, dasiang mengkatoba' di hao mai di pembabe kalaena, diantoo: dasiang natohhoi umpenombai dehata-dehata lino anna tasanda-sanda ang nababe umpake bulahang, pera', tembaga, batu sibaha kayu ang dai mala paita, pahingngi anna mellao.
21Datoi sika naboli umbabe kakarakeang, noanna papateang, ihsang-ihsang, ungngindä'-indä' pa'bannetauang anna maboko.