Alkitab Mobile SABDA
[VER] : [BABA]     [PL]  [PB] 
 <<  1 Korintus 2 >> 

1Dan bila sahya sudah datang k-pada kamu, hei sudara-sudara, waktu sahya khabarkan ruhsia Allah k-pada kamu, sahya sudah datang bukan-nya dngan perkata'an dan bijaksana punya ktinggian.

2Kerna sahya sudah tntukan bgini, ia'itu satu pun sahya ta'mau tahu di antara kamu chuma Almaseh saja, dan dia tersalib.

3Dan sahya sudah ada sama-sama kamu dalam klmahan, dan ktakotan, dan banyak mngglitar.

4Dan sahya punya perkata'an dan pngajaran pun bukan-nya dngan perkata'an bijaksana yang pujok orang, ttapi dngan ktrangan Roh dan kuasa:

5spaya jangan kamu punya perchaya jadi deri manusia punya bijaksana, ttapi deri Allah punya kuasa.

6Dalam pada itu kita ada chakapkan bijaksana di antara orang yang sudah smpurna: ttapi satu bijaksana yang bukan ini jman punya, dan bukan bijaksana ini jman punya pnghulu-pnghulu, yang nanti hilang kuasa:

7ttapi kita ada chakapkan Allah punya bijaksana dalam ruhsia, ia'itu satu bijaksana yang sudah tersmbunyi, yang Allah sudah tntukan lbeh dhulu s-blum ada jman lagi, spaya bawa mulia k-pada kita:

8dan ini bijaksana ini jman punya pnghulu satu orang pun t'ada tahu: kerna kalau dia-orang sudah tahu, t'ada dia-orang nanti salibkan Tuhan sgala kmulia'an itu:

9ttapi sperti ada tersurat, "Apa yang mata t'ada tengok, dan kuping t'ada dngar, Dan yang t'ada masok orang punya hati, Ia'itu apa yang Allah sudah sdiakan kerna orang yang kasehkan dia."

10Ttapi k-pada kita ini Allah sudah nyatakan oleh Roh itu, kerna Roh preksa sgala perkara, sampai Allah punya perkara yang dalam-dalam pun.

11Kerna mana satu manusia yang tahu manusia punya perkara, chuma roh manusia saja yang di dalam-nya? Bgitu juga Allah punya perkara satu orang pun t'ada tahu, chuma Roh Allah saja.

12Ttapi kita bukan-nya sudah trima ini dunia punya roh, ttapi Roh yang deri-pada Allah; spaya kita boleh tahu perkara-perkara yang Allah sudah kurniakan k-pada kita.

13Dan ini smoa perkara-lah yang kita ada chakapkan, bukan dngan perkata'an yang manusia punya bijaksana ajarkan, ttapi yang Roh ajarkan: dan perkara rohani itu kita bandingkan dngan perkara yang rohani juga.

14Orang yang bernyawa t'ada trima Roh Allah punya perkara: kerna itu smoa jadi satu kbodohan sama dia; lagi pun dia ta'boleh tahu, sbab itu smoa ada di-timbangkan dngan hal rohani.

15Ttapi orang yang rohani timbangakan sgala perkara, dan dia punya diri sndiri satu orang pun t'ada timbangkan.

16Kerna siapa sudah tahu Tuhan punya maksud, spaya boleh ajarkan sama dia? Ttapi kita ini ada Almaseh punya maksud.


  Share Facebook  |  Share Twitter

 <<  1 Korintus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel