1Biar-lah orang bilangkan kita ini sperti hamba-hamba Almaseh, dan sperti juru-kunchi atas sgala ruhsia Allah.
2Dan lagi di sini pun deri-hal juru-kunchi orang tuntut yang masing-masing msti jadi stiawan.
3Ttapi sama sahya ini, itu chuma satu perkara yang kchil kalau sahya di-hukumkan oleh kamu, atau oleh manusia punya bichara: dan sahya t'ada hukumkan sahya punya diri pun.
4Kerna sahya ta'tahu satu pun yang boleh salahkan sahya; ttapi bukan sahya sudah di-bnarkan dalam ini hal: ttapi Tuhan-lah yang hukumkan sahya.
5Sbab itu jangan-lah hukumkan satu apa pun s-blum waktu-nya, sampai Tuhan datang, yang nanti bawa di trang sgala perkara glap yang tersmbunyi, dan nanti nyatakan smoa hati punya maksud pun: bharu-lah masing-masing orang nanti dapat pujian deri-pada Allah.
6Dan oleh kerna kamu, hei sudara-sudara, sahya sudah ibaratkan ini smoa dalam hal sahya sndiri dan Apollos pun; spaya dalam hal kita kamu boleh blajar ini, jangan lbeh deri-pada apa yang ada tersurat; ia'itu spaya jangan kamu bsarkan diri masing-masing kerna satu orang mlawan lain orang.
7Kerna siapa pula yang bedakan angkau? dan apa-kah yang ada sama angkau yang bukan angkau trima punya? ttapi kalau btul angkau sudah trima, knapa-kah angkau mgahkan diri sperti bukan angkau sudah trima?
8Kamu sdia sudah knnyang, kamu sdia sudah kaya, dngan t'ada kita kamu sudah pun jadi raja: dan baik juga kalau kamu boleh jadi raja, spaya kita pun boleh jadi raja sama-sama kamu.
9Kerna sahya punya fikiran, kita rasul-rasul ini Allah sudah mnghadapkan kmdian skali, sperti orang yang sudah kna hukum mati: kerna kita sudah di-buatkan sperti satu wayang k-pada dunia, dan k-pada mla'ikat, dan k-pada manusia pun.
10Kita ini orang bodoh kerna Almaseh punya sbab, ttapi kamu smoa bijaksana dalam Almaseh; kita ini lmah, ttapi kamu smoa kuat; kamu smoa mulia, ttapi kita ini hina.
11Sampai ini waktu kita ada lapar, dan haus, dan tlanjang, dan kna tumbok, dan terhanyut-hanyut;
12dan kita berpnat dalam pkerja'an tangan kita sndiri: bila kna maki, kita berkatkan; bila kna aniaya, kita sabarkan;
13bila kna umpat, kita nasihatkan; kita ini sudah di-buatkan sperti sampah dunia, dan sperti sgala perkara punya kotor, sampai ini skarang.
14Ini smoa sahya ada tulis bukan-nya sbab mau kasi kamu malu, ttapi sbab mau ajarkan kamu, sperti sahya punya anak-anak yang sahya kaseh.
15Kerna jikalau kamu ada s-laksa guru dalam Almaseh skali pun, ttapi kamu punya bapa t'ada banyak: kerna dalam Isa Almaseh sahya-lah yang sudah beranakkan kamu smoa oleh injil.
16Sbab itu sahya minta kamu, turut-lah sahya punya tuladan.
17Kerna ini sbab-lah sahya sudah hantarkan Timotius pergi k-pada kamu, ia'itu satu anak sahya dalam Tuhan yang sahya kaseh dan yang stiawan, dan dia-lah juga nanti ingatkan kamu fasal sgala klakuan sahya dalam Almaseh, sperti sahya ada ajar sana-sini dalam tiap-tiap eklisia.
18Ada brapa orang yang ada bsarkan diri-nya spertikan sahya t'ada nanti datang k-pada kamu.
19Ttapi, jikalau kahandak Tuhan, nanti juga sahya datang k-pada kamu dngan sgra; dan sahya nanti tahu orang-orang yang bsarkan diri-nya, bukan-nya perkata'an-nya ttapi kuasa-nya.
20Kerna kraja'an Allah bukan-nya dalam perkata'an, ttapi dalam kuasa.
21Apa-kah kamu punya mau? baik sahya datang k-pada kamu dngan rotan-kah, atau dngan kaseh dan roh yang lmah-lmbot?