Dual Panel1Deri-hal perkara-perkara yang kamu sudah tuliskan: baik juga kalau satu orang dlaki jangan jamah satu prempuan.
2Ttapi deri sbab perchabolan, baik-lah masing-masing orang dlaki ada bini-nya sndiri, dan baik-lah masing-masing prempuan ada laki-nya sndiri.
3Biar-lah laki itu bayer hutang-nya sama bini-nya, dan bgitu pun bini sama laki-nya.
4Bini itu bukan prentahkan badan-nya sndiri, ttapi laki-nya yang prentahkan: dan bgitu juga laki itu bukan prentahkan badan-nya sndiri, ttapi bini-nya.
5Jangan tahankan kahandak masing-masing, chuma s-ktika saja punya lama kalau dua-dua s-tuju, ia'itu spaya kamu boleh dapat smpat mau minta do'a, dan kmdian boleh bersama-sama lagi, spaya jangan pula Setan choba sama kamu deri sbab kamu t'ada tahankan diri.
6Ttapi sahya kata ini bukan-nya mau kasi satu hukum, chuma mau kasi izin saja.
7Ttapi sahya punya kahandak, ia'itu kalau smoa orang boleh jadi sama sperti sahya bgitu. Dalam pada itu masing-masing orang ada masing-masing punya kurnia deri-pada Allah, ia'itu satu bgini, dan satu bgitu.
8Ttapi sahya bilang sama orang yang blum kahwin, dan sama prempuan-prempuan yang bujang, baik kerna dia-orang kalau dia-orang tinggal sama sperti sahya ini.
9Ttapi jikalau dia-orang t'ada kuasa mnahankan diri, biar dia-orang kahwin: kerna lbeh baik orang kahwin deri-pada mnyala.
10Ttapi k-pada orang yang sudah kahwin, ini-lah psanan sahya, dan bukan-nya sahya, ttapi Tuhan-lah juga yang psankan, ia'itu, jangan-lah satu bini undor deri-pada laki-nya
11(dan kalau dia undor pula, biar dia tinggal bujang, atau biar dia berdamai sama laki-nya); dan jangan-lah satu laki tinggalkan bini-nya.
12Ttapi k-pada yang lain-lain sahya ini kata, bukan-nya Tuhan; jikalau barang-siapa sudara ada bini yang ta'perchaya, dan bini itu s-tuju mau tinggal sama-sama dia, jangan-lah sudara itu tinggalkan dia.
13Dan prempuan yang ada laki yang ta'perchaya, dan laki itu s-tuju mau tinggal sama-sama dia, jangan-lah sudara prempuan itu tinggalkan laki-nya.
14Kerna laki yang ta'perchaya itu di-kuduskan dalam bini-nya, dan bini yang ta'perchaya itu di-kuduskan dalam itu sudara: kalau tidak, kamu punya anak-anak mnjadi najis; ttapi skarang dia-orang ada kudus.
15Ttapi kalau orang yang ta'perchaya itu berundor, biar-lah dia undor: dalam ini macham punya hal sudara dlaki atau sudara prempuan itu t'ada terikat lagi: ttapi Allah sudah panggil kita dalam perdamaian.
16Hei bini orang, bagimana-kah angkau boleh tahu kalau angkau boleh slamatkan laki itu? dan angkau laki orang, bagimana-kah angkau boleh tahu kalau angkau boleh slamatkan bini itu?
17Chuma sperti Tuhan sudah bhagikan k-pada masing-masing orang, dan sperti Allah sudah panggil masing-masing, bgitu-lah biar dia bawa diri. Dan bgini-lah juga yang sahya tntukan dalam sgala eklisia.
18Ada-kah orang yang sudah di-panggil waktu dia bersunat? jangan-lah dia hilangkan sunat-nya. Ada-kah orang yang sudah di-panggil dalam hal t'ada bersunat? jangan-lah dia di-sunatkan.
19Sunat itu sat pun t'ada, dan hal ta'bersunat pun satu pun t'ada; chuma pliharakan hukum Allah saja.
20Biar-lah masing-masing orang tinggal dalam panggilan yang dalam-nya dia sudah di-panggil.
21Sudah-kah angkau di-panggil waktu angkau hamba orang? jangan pdulikan hal itu: ttapi jikalau angkau boleh dapat jadi bebas pula, lbeh baik angkau trima.
22Kerna orang yang sudah di-panggil dalam Tuhan waktu dia hamba orang, dia-lah mnjadi Tuhan punya orang bebas: dan bgitu juga orang yang di-panggil waktu dia bebas, dia-lah mnjadi Almaseh punya hamba.
23Kamu smoa sudah di-bli dngan bayer herga: jangan-lah mnjadi hamba orang.
24Hei sudara-sudara, baik di dalam mana hal masing-masing di-panggil, biar-lah dia tinggal sama-sama Allah dalam hal itu.
25Deri-hal anak-anak-dara, sahya t'ada trima hukum deri-pada Tuhan: ttapi sahya chuma kasi sahya punya bichara saja, ia'itu sperti satu orang yang sudah trima ksian deri-pada Tuhan mnjadi orang kperchaya'an.
26Deri sbab ksusahan yang ada skarang, sahya fikir baik juga bgitu, ia'itu baik satu orang tinggal sperti dia memang ada.
27Ada-kah angkau terikat sama bini? jangan choba mau lpas. Ada-kah angkau terlpas deri-pada bini? jangan chari bini lagi.
28Ttapi jikalau angkau kahwin pun, bukan-nya angkau berdosa; dan kalau satu anak-dara pula kahwin, dia pun bukan-nya berdosa. Ttapi itu macham orang nanti kna susah dalam perkara dunia: dan sahya mau sayangkan kamu.
29Ttapi hei sudara-sudara, ini-lah sahya bilang, waktu-nya sudah pendek, sampai deri-pada ini tempo orang yang ada bini mnjadi sperti orang yang t'ada bini bgitu;
30dan orang yang mnangis sperti orang yang t'ada mnangis; dan orang yang bersuka-suka sperti orang yang t'ada bersuka-suka; dan orang yang bli sperti orang yang t'ada herta:
31dan orang yang pakai dunia ini sperti orang yang t'ada pakai sampai jlak: kerna ini dunia punya hal ada lnnyap.
32Ttapi sahya suka kamu jangan mnjadi khuatir. Orang yang t'ada kahwin itu ada khuatir fasal Tuhan punya perkara ia'itu bagimana-kah dia boleh berknan sama Tuhan:
33ttapi orang yang sudah kahwin ada khuatir fasal dunia punya perkara, ia'itu bagimana-kah dia boleh berknan sama bini-nya.
34Dan ada juga sliseh antara satu bini orang dan satu anak-dara. Prempuan yang t'ada kahwin ada khuatir fasal perkara Tuhan, ia'itu spaya dia boleh mnjadi kudus, baik badan baik roh: ttapi prempuan yang sudah kahwin ada khuatir fasal perkara dunia, ia'itu bagimana-kah dia boleh berknan sama laki-nya.
35Dan ini sahya ada katakan kerna kamu punya untong; bukan spaya pasangkan jrat sama kamu, ttapi spaya kamu bawa klakuan yang snonoh, dan spaya kamu ttap bersrah k-pada Tuhan dngan t'ada bimbang.
36Dalam pada itu, jikalau ada satu orang fikir yang dia buat ta'snonoh sama anak-dara-nya, dan jikalau budak prempuan itu sudah chukop umor, dan jikalau msti kahwin, biar-lah dia buat apa dia suka; t'ada dia berdosa; boleh dia-orang kahwin.
37Ttapi orang yang tinggal ttap dalam hati-nya, dan bukan-nya msti kahwin, ttapi ada kuasa fasal kahandak-nya sndiri, dan sudah bichara tntu dalam hati-nya mau simpan anak-dara-nya sndiri, baik juga perbuatan-nya.
38Jadi itu, orang yang kahwinkan anak-dara-nya sndiri, baik juga perbuatan-nya: dan orang yang t'ada kahwinkan dia, lbeh baik lagi perbuatan-nya.
39Bini orang ada terikat s-lama-nya laki-nya ada hidop; ttapi jikalau laki-nya sudah mati, dia ada bebas boleh kahwin sama barang-siapa dia suka, chuma kalau di dalam Tuhan saja.
40Ttapi sperti sahya punya bichara, lbeh berkat kalau dia tinggal sperti dia memang ada: dan sahya fikir yang sahya pun ada Roh Allah.