1Fasal lauk-datok: kita tahu juga yang kita smoa ada pngtahuan. Pngtahuan bsarkan hati orang, ttapi kaseh tgohkan hati.
2Jikalau satu orang fikir yang dia tahu s-barang perkara, blum-lah dia tahu sperti dia patut tahu.
3Ttapi jikalau satu orang kaseh sama Allah, dia-lah juga yang Allah tahu.
4Sbab itu deri-hal makan lauk-datok, kita tahu itu datok satu pun t'ada dalam dunia, dan t'ada Allah yang lain chuma satu saja.
5Kerna kalau ada pun yang di-sbot dewa-dewa, baik di langit, baik di atas bumi: sperti ada banyak juga dewa-dewa dan banyak juga mamang;
6ttapi sama kita chuma satu saja Allah, ia'itu Bapa kita, dan sgala perkara asal-nya deri-pada dia juga, dan kita pun k-pada dia: dan chuma satu saja Tuhan, ia'itu Isa Almaseh, dan sgala perkara asal-nya oleh dia juga, dan kita pun oleh dia.
7Dalam pada itu, ini pngtahuan bukan-nya ada di dalam smoa orang: ttapi ada sparoh orang yang sampai bharu tadi sudah biasa sama datok, dia makan sperti btul lauk-datok, dan dia-orang punya angan-angan hati yang lmah jadi najis.
8Ttapi makanan t'ada nanti dkatkan kita sama Allah: kalau kita t'ada makan pun, t'ada juga kita rugi apa-apa; dan kalau kita ada makan, t'ada pula kita untong apa-apa.
9Ttapi jaga-lah baik-baik spaya jangan pula kamu punya kbebasan ini mnjadi satu batu terantok k-pada orang yang lmah.
10Kerna jikalau orang tengok angkau yang ada pngtahuan dudok makan dalam rumah datok, kalau dia ada lmah, bukan-kah hati-nya nanti dapat brani mau makan lauk-datok?
11Kerna deri sbab angkau punya pngtahuan orang yang lmah nanti binasa, ia'itu sudara yang kerna-nya Almaseh sudah mati.
12Dan sdang bgini-lah kamu berdosa k-pada sudara-sudara, dan lukakan angan-angan hati-nya yang lmah itu, kamu ada berdosa k-pada Almaseh.
13Sbab itu, jikalau makanan kasi sahya punya sudara terantok, t'ada sahya nanti makan daging lagi sampai s-lama-lama-nya, spaya jangan pula sahya kasi sahya punya sudara terantok.