Alkitab Mobile SABDA
[VER] : [BABA]     [PL]  [PB] 
 <<  1 Timotius 1 >> 

1Deri-pada Paulus, rasul Isa Almaseh, turut psanan Juru-slamat kita Allah dan Isa Almaseh, yang mnjadi kita punya harap;

2datang k-pada Timotius, yang btul jadi sahya punya anak dalam iman itu: biar-lah datang anugrah dan ksian dan sjahtra, deri-pada Bapa kita Allah dan Tuhan kita Isa Almaseh.

3Sperti yang sahya sudah minta angkau tinggal di Ifisus, waktu sahya mau pergi masok Makadoniah, spaya angkau boleh psan ada brapa orang jangan ajar pngajaran yang lain,

4dan jangan pdulikan chrita yang bukan-bukan dan surat kturunan yang ta'sudah-sudah, yang bawa perbantahan lbeh deri-pada tolong sama Allah punya pkerja'an yang dalam iman itu; skarang pun bgitu juga.

5Itu psanan punya maksud, ia'itu kaseh yang kluar deri hati yang suchi, dan angan-angan hati yang baik, dan perchaya yang bukan pura-pura:

6ada sikit orang yang sudah hanyut deri-pada ini smoa dan mnyempang k-pada perchakapan yang sia-sia;

7dngan maksud mau jadi guru-taurit, sunggoh pun dia-orang t'ada mngerti apa-apa yang dia-orang kata, atau apa-apa yang dia-orang chakap dngan tntu.

8Ttapi kita tahu yang hukum-taurit itu ada baik, kalau orang gunakan sperti hukum,

9dan tahu yang hukum bukan-nya di-buat sbab orang bnar, ttapi sbab orang yang derhaka dan yang ta'mau turut prentah, sbab orang yang t'ada agama dan orang berdosa, sbab orang yang t'ada takot Allah dan orang ssat, sbab orang yang bunoh bapa, dan orang yang bunoh mak, sbab sgala pmbunoh,

10sbab orang yang buat perchabolan, sbab orang smburit, sbab orang pmbohong, sbab orang yang sumpah bohong, dan kalau ada apa-apa lain lagi yang mlawan pngajaran yang baik:

11turut sperti injil yang khabarkan kmulia'an Allah yang terpuji, dan itu-lah yang sudah di-tanggongkan atas sahya.

12Sahya bri shukor k-pada Tuhan kita Isa Almaseh, yang sudah kuatkan sahya, sbab dia sudah bilangkan sahya ini kperchaya'an, dalam hal dia sudah tntukan sahya masok playanan-nya;

13sunggoh pun dhulu sahya satu pngumpat dan pnganiaya dan pmaki: dalam pada itu sahya sudah trima ksian, sbab sahya sudah buat bgitu dalam hal sahya blum tahu dan blum perchaya;

14dan anugrah Tuhan kita bertambah-tambah terlalu banyak, dngan perchaya dan kaseh yang dalam Isa Almaseh.

15Ini perkata'an kperchaya'an dan patut-lah smoa orang trima, ia'itu Isa Almaseh datang di dunia mau slamatkan orang berdosa; antara ini smoa sahya-lah yang kpala:

16ttapi ini-lah sbab-nya sahya sudah trima ksian, ia'itu spaya dalam sahya, yang mnjadi kpala, Isa Almaseh boleh nyatakan s-gnap sabar-hati-nya, mnjadi satu tuladan k-pada orang yang nanti kmdian hari perchaya sama dia, sampai dapat hidop yang kkal.

17Hormat dan mulia k-pada Raja yang kkal, yang t'ada kbinasa'an, dan t'ada ternampak, ia'itu Allah yang satu saja, s-lama-lama-nya. Amin.

18Ini-lah psanan yang sahya srahkan k-pada angkau, hei anak Timotius, turut sperti smoa nabuatan yang sudah datang dhulu fasal angkau, spaya oleh itu nabuatan angkau boleh berprang dalam itu pprangan yang baik:

19sambil pegang perchaya dan angan-angan hati yang baik: yang ada orang sudah tolakkan, dan dalam itu hal sudah kna karam fasal iman itu:

20Huminaius sama Iskandar jadi ini macham punya orang; yang sahya sudah srahkan dia-orang k-pada Setan, spaya dia-orang boleh dapat ajaran jangan mnghujat.


  Share Facebook  |  Share Twitter

 <<  1 Timotius 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel