Dual Panel1Msti juga sahya mgahkan diri, sunggoh pun t'ada fa'idah-nya; ttapi sahya datang sampai pnglihatan dan knyata'an Tuhan.
2Sahya tahu satu orang dalam Almaseh, ampat-blas tahun dhulu, itu orang sudah di-sambar naik sampai shorga yang nombor tiga ('ntah di dalam badan-kah, sahya ta'tahu; atau di luar badan-kah, sahya ta'tahu; Allah juga yang tahu),
3dan sahya tahu itu orang juga ('ntah dalam badan-kah atau dngan t'ada badan-kah, sahya ta'tahu; Allah juga yang tahu),
4yang dia sudah di-sambar naik sampai Firdus, dan sudah dngar ta'boleh chakap punya perkata'an, yang t'ada halal manusia sbotkan.
5Deri sbab itu macham punya orang, sahya mau mgahkan diri, ttapi deri sbab sahya punya diri sahya ta'mau mgahkan diri, chuma dalam hal sahya punya klmahan.
6Kerna kalau sahya mau mgahkan diri pun, t'ada juga sahya bodoh; kerna sahya nanti chakap kbtulan: ttapi sahya ta'mau, spaya jangan pula ada orang boleh bilangkan sahya ini lbeh deri-pada apa yang dia tengok sahya ada, atau dngar deri-pada sahya.
7Dan deri sbab itu knyata'an smoa punya kbsaran, spaya jangan sahya jadi hati-bsar, sahya sudah dapat satu duri dalam sahya punya daging, ia'itu satu psuroh Setan mau seksakan sama sahya, spaya sahya jangan hati-bsar.
8Dan fasal itu perkara sudah tiga kali sahya minta Tuhan, spaya itu boleh undor deri-pada sahya.
9Dan dia sudah kata sama sahya, "Sahya punya anugrah chukop-lah kerna angkau: kerna kuasa di-smpurnakan dalam klmahan." Sbab itu dngan terlbeh suka-hati sahya nanti mgahkan diri deri-hal smoa sahya punya klmahan, spaya kuasa Almaseh boleh diam atas sahya.
10Sbab itu sgala klmahan, dan bnchana, dan chlaka, dan aniaya, dan hal ssak mnjadi sahya punya ksuka'an deri sbab Almaseh: kerna bila sahya ada lmah, itu ktika-lah sahya mnjadi kuat.
11Sahya sudah jadi bodoh: kamu juga yang sudah paksakan sama sahya: kerna kamu ini patut pujikan sahya: kerna satu pun sahya t'ada kurang deri-pada itu rasul-rasul yang bsar skali, sunggoh pun sahya t'ada jadi apa-apa.
12Sgala tanda-tanda rasul sudah juga di-buatkan di antara kamu dngan s-habis-habis sabar, ia'itu dngan tanda-tanda, dan perkara hairan, dan m'ujizat.
13Kerna dalam apa hal-kah kamu smoa sudah di-bikin kurang deri-pada lain-lain eklisia, chuma dalam hal sahya t'ada kasi kamu brat? Mahapkan sahya sbab ini salah.
14Ingat baik-baik, ini nombor tiga kali sahya sudah bersiap mau pergi k-pada kamu; dan sahya t'ada nanti kasi brat sama kamu: kerna bukan-nya kamu punya herta yang sahya chari, ttapi kamu-lah: kerna bukan-nya anak-anak yang patut taroh herta kerna mak-bapa, ttapi mak-bapa kerna anak-anak.
15Dan dngan banyak suka-hati sahya nanti kluarkan blanja dan blanjakan diri sndiri kerna jiwa kamu punya sbab. Jikalau sahya kaseh sama kamu lbeh banyak, patut-kah sahya trima kurang kaseh?
16Ttapi biar-lah bgitu, sahya sndiri t'ada kasi brat sama kamu; ttapi sbab sahya ini cherdek, jadi sahya sudah tangkap kamu dngan satu akal.
17Itu orang-orang yang sahya sudah hantarkan k-pada kamu, sudah-kah sahya tipu sama kamu oleh satu orang pun antara dia-orang?
18Sahya sudah minta Titus pergi, dan sahya sudah hantarkan sudara yang lain itu sama-sama. Sudah-kah Titus tipu sama kamu? bukan-kah kita sudah berjalan turut itu Roh juga? bukan-kah kita sudah ikut itu bkas-kaki juga?
19Bgini lama kamu smoa fikir yang kita ini mau bnarkan diri di dpan kamu. Di dpan Allah juga kita ada berchakap dalam Almaseh. Ttapi, hei kkaseh, smoa ini spaya boleh tgohkan kamu juga.
20Kerna sahya takot, jangan pula bila sahya datang, sahya nanti dapat jumpa kamu bukan-nya sperti sahya punya mau, dan kamu pun dapat jumpa sahya bukan-nya sperti kamu punya mau; ia'itu jangan pula ada perklahian, dngki, marah, plawanan, umpat, mmbawa mulut, chongkak, dan kachau-mngachau;
21dan bila sahya balek, jangan pula sahya punya Allah rndahkan sahya di dpan kamu smoa, dan sahya msti kna susah-hati sbab banyak orang yang dhulu sudah buat dosa, dngan t'ada bertobat deri-pada kotoran, dan persundalan, dan perchabolan yang dia-orang sudah buat.