Alkitab Mobile SABDA
[VER] : [BABA]     [PL]  [PB] 
 <<  2 Korintus 3 >> 

1Ada-kah kita mula'i pujikan diri kita lagi skali? atau msti-kah kita pakai surat-pujian k-pada kamu atau deri-pada kamu, sperti lain orang bgitu?

2Kamu ini-lah kita punya surat, yang tertulis di hati kita, dan smoa orang tahu dan bacha itu:

3sdang kamu sudah di-trangkan mnjadi satu surat Almaseh yang kita hantarkan, dan yang tertulis bukan-nya dngan tinta, ttapi dngan Roh Allah yang hidop itu: bukan-nya di papan batu, ttapi di papan hati manusia.

4Dan ini macham-lah punya harap yang kita ada di dpan Allah dngan berkat Almaseh:

5ia'itu bukan-nya kita sndiri layak bicharakan apa-apa sperti deri-pada kita punya diri, ttapi kita punya hal layak itu datang deri-pada Allah juga;

6yang sudah jadikan kita layak jadi perjanjian bharu punya playan; bukan mau ajar surat-nya, ttapi pngajaran yang rohani: kerna surat-nya matikan, ttapi pngajaran yang rohani itu kasi hidop.

7Ttapi jikalau playanan yang bawa mati dngan surat-nya di-ukir di atas batu sudah datang dngan kmulia'an, sampaikan anak-anak Isra'el ta'boleh mrnong sama muka Musa deri sbab muka-nya punya kmulia'an; yang ada s-tngah hilang:

8bukan-kah playanan yang rohani itu nanti lbeh lagi kmulia'an-nya?

9Kerna kalau playanan yang bawa hukuman itu ada kmulia'an-nya, lbeh lagi itu playanan yang bawa kbnaran nanti bertambah-tambah kmulia'an-nya.

10Kerna yang sudah di-muliakan sudah hilang kmulia'an dalam ini hal, deri sbab kmulia'an yang lbeh lagi itu.

11Kerna kalau yang nanti hilang itu ada kmulia'an, terlbeh lagi yang kkal itu pula ada dalam kmulia'an.

12Sbab kita ada ini macham punya harap, kita sangat brani berchakap,

13dan bukan sperti Musa sudah pakai tudongan di muka-nya, spaya jangan anak-anak Isra'el mrnong sama yang nanti hilang itu, sampai ksudahan-nya:

14ttapi dia-orang punya ingatan sudah di-kraskan: kerna sampai ini hari pun ada lagi tertinggal itu tudong-muka blum juga terbuka bila-bila orang bacha perjanjian yang lama itu: dan tudong-muka ini hilang dalam Almaseh.

15Ttapi sampai ini hari pun bila-bila orang bacha kitab Musa, ada satu tudong-muka di atas hati dia-orang.

16Ttapi bila-bila hati-nya balek k-pada Tuhan, itu tudongan nanti di-buka.

17Tuhan-lah itu Roh, dan di mana Roh Tuhan ada, di situ-lah ada kbebasan.

18Ttapi kita ini smoa dngan muka yang t'ada bertudong balaskan kmulia'an Tuhan sperti chermin muka bgitu, dan rupa kita di-ubahkan atas itu chontoh juga, deri-pada Tuhan, ia'itu Roh.


  Share Facebook  |  Share Twitter

 <<  2 Korintus 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran