Alkitab Mobile SABDA
[VER] : [BABA]     [PL]  [PB] 
 <<  Galatia 4 >> 

1Ttapi ini sahya kata, yang itu waris, s-lagi dia budak, satu pun t'ada sliseh deri-pada satu hamba, mski-pun dia mnjadi tuan di atas sklian;

2ttapi dia di bawah prentah orang kuasa dan juru-kunchi, sampai waktu yang bapa-nya sudah tntukan.

3Bgitu juga kita, tempo budak lagi, sudah jadi hamba di bawah prentah dunia punya plajaran yang mula-mula:

4ttapi bila waktu-nya sudah gnap, Allah sudah hantarkan Anak-nya, yang sudah jadi deri-pada satu prempuan, dan jadi di bawah hukum-taurit,

5spaya tbuskan orang yang di bawah hukum-taurit, dan spaya kita pula boleh dapat pangkat anak-anak dlaki.

6Dan sbab kamu ini mnjadi anak-anak, Allah sudah hantarkan Roh Anak-nya masok dalam hati kita, dan yang triak, "Abba, Bapa."

7Jadi itu, t'ada lagi angkau ini satu hamba, ttapi satu anak dlaki; dan jikalau satu anak dlaki, angkau jadi satu waris pun oleh Allah.

8Ttapi itu waktu, sbab kamu t'ada tahu Allah, kamu sudah jadi hamba k-pada datok-datok, yang s-btul-nya tidak ada:

9ttapi skarang ini, sdang kamu sudah knal sama Allah, atau lbeh baik sahya bilang, kamu sudah di-knal oleh Allah, bagimana-kah kamu balek pula k-pada plajaran mula-mula yang lmah dan terkurang, yang k-pada-nya kamu mau jadi hamba lagi s-kali?

10Kamu baik-baik pliharakan hari, dan bulan, dan ktika, dan tahun.

11Sahya takot fasal kamu punya hal, 'ntah barangkali sia-sia saja sahya punya pnat kerna kamu.

12Hei sudara-sudara, sahya minta kamu jadi sperti sahya ini, kerna sahya pun sperti kamu juga. Satu pun kamu t'ada buat salah sama sahya:

13ttapi kamu tahu yang deri sbab badan punya klmahan sahya sudah khabarkan injil k-pada kamu mula-mula:

14dan sahya punya badan punya hal, yang mnjadi satu pnchoba'an sama kamu, t'ada pula kamu hinakan atau tolak; ttapi kamu sudah sambot sama sahya spertikan mla'ikat Allah, dan spertikan Isa Almaseh.

15Kalau bgitu, apa-kah sudah jadi sama itu hal kamu sbotkan diri kamu beruntong? kerna sahya bersaksi deri-hal kamu yang, jikalau boleh, kamu sudah mau chabotkan kamu punya mata pun dan kasi sama sahya.

16Jadi itu, sahya sudah jadi kamu punya musoh-kah, sbab sahya chakap btul sama kamu?

17Dia-orang ada rajin chari kamu, bukan-nya mau maksud yang baik; tidak, dia-orang punya maksud mau asingkan kamu, spaya kamu pula jadi rajin chari dia-orang.

18Ttapi baik juga kalau orang rajin chari kamu dalam perkara yang baik, bila-bila pun, bukan saja waktu sahya ada sama-sama kamu.

19Hei sahya punya anak kchil, sahya ada mrasa sngsara sperti mau beranakkan kamu lagi s-kali, sampai rupa Almaseh sudah di-jadikan dalam kamu.

20Ttapi sahya suka juga kalau sahya ada sama-sama kamu skarang, dan ubahkan sahya punya suara; kerna sahya punya hati ada bimbang deri-hal kamu smoa.

21Hei kamu smoa yang mau jadi di bawah hukum-taurit, bilang sama sahya, t'ada-kah kamu dngar apa hukum-taurit kata?

22Kerna ada tersurat, yang Ibrahim ada dua anak-dlaki, satu deri hamba prempuan, dan satu deri prempuan yang bebas.

23Ttapi anak yang deri hamba-prempuan itu sudah beranak sperti biasa manusia; ttapi anak yang deri prempuan yang bebas itu sudah beranak deri sbab perjanjian.

24Ini smoa mnjadi ibarat: kerna ini dua prempuan ia'itu dua perjanjian; satu kluar deri gunong Tur-Sina, yang beranakkan anak-anak perhamba'an, ia'itu Hagar.

25Jadi, ini Hagar ia'itu gunong Tur-Sina di tanah Arab, dan s-tuju dngan Yerusalim yang ada skarang, kerna dia mnjadi hamba sama-sama anak-anak-nya.

26Ttapi Yerusalim yang di atas, itu-lah yang bebas, dan itu-lah kita punya mak.

27Kerna ada tersurat, "Bersuka-suka-lah, hei prempuan yang t'ada beranak; Bersru dan bersorak-lah, hei angkau yang blum tahu sakit-beranak: Kerna prempuan bujang punya anak lbeh banyak deri-pada prempuan yang berlaki punya."

28Ttapi, hei sudara-sudara, kita ini anak-anak perjanjian, sperti hal Isahak.

29Ttapi sperti itu tempo itu orang yang di-beranakkan sperti biasa manusia sudah aniayakan itu orang yang sudah di-beranakkan dngan hal rohani, bgitu juga skarang pun.

30Ttapi kitab apa kata? "Buangkan-lah itu hamba-prempuan sama dia punya anak: kerna anak hamba-prempuan skali-kali t'ada nanti jadi waris sama-sama prempuan yang bebas punya anak."

31Sbab itu, hei sudara-sudara, kita ini bukan-nya itu hamba-prempuan punya anak, ttapi itu prempuan bebas punya anak.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Galatia 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel