Dual Panel1Dalam itu perkara smoa yang kita sudah bilang, ini-lah yang nombor satu: kita ada ini macham punya kpala-imam, yang sudah dudok di sblah kanan takhta Kbsaran di shorga,
2ia'itu playan tmpat kudus, dan playan khemah yang btul, yang Allah sudah naikkan, bukan-nya manusia.
3Kerna tiap-tiap kpala-imam sudah di-tntukan spaya boleh bawa persmbahan dan korban: deri sbab itu ta'boleh tidak ini kpala-imam pun msti ada apa-apa yang dia boleh bawa.
4Ttapi kalau dia ada di atas bumi ini, t'ada dia nanti jadi imam pun, sdang sdia ada orang yang bawa persmbahan mnurut sperti hukum-taurit;
5dan dia-orang punya playanan chuma satu chontoh dan bayang perkara-perkara yang di shorga, sperti Musa sudah di-psan oleh Allah waktu dia mau bikin itu khemah, kerna Allah kata, "Ingat baik-baik buat sklian-nya ikut chontoh yang sudah di-tunjokkan k-pada angkau di gunong itu."
6Ttapi skarang dia sudah dapat satu playanan yang lbeh mulia, s-bagimana dia mnjadi orang tngah dalam satu perjanjian yang lbeh baik, yang sudah di-buat dngan janji berkat yang lbeh baik.
7Kerna kalau perjanjian yang pertama t'ada chla-nya, tntu-lah t'ada orang chari tmpat kerna nombor dua punya.
8Kerna dia chlakan dia-orang dan kata, "Tengok, hari-nya nanti datang, kata Tuhan, Sahya nanti buat satu perjanjian yang bharu dngan isi rumah Isra'el dan isi rumah Yahuda;
9Bukan-nya sperti perjanjian yang sahya sudah buat dngan dia-orang punya nenek-moyang Itu hari bila sahya pimpin tangan-nya mau bawa dia-orang kluar deri tanah Masir; Kerna dia-orang t'ada ttap dalam sahya punya perjanjian, Dan sahya pun t'ada indahkan dia-orang, kata Tuhan.
10Kerna ini-lah itu perjanjian yang sahya nanti buat dngan isi rumah Isra'el Kmdian deri-pada itu waktu, kata Tuhan: Sahya nanti masokkan hukum-hukum sahya dalam dia-orang punya ingatan, Dan sahya nanti tuliskan itu hukum atas hati-nya: Dan sahya nanti jadi Tuhan k-pada dia-orang, Dan dia-orang nanti jadi satu bangsa k-pada sahya:
11Dan ta'usah dia-orang masing-masing ajarkan orang s-negri-nya, Dan masing-masing ajar dia punya sudara dan kata, 'Knal-lah sama Tuhan,' Kerna smoa orang nanti knal sama sahya, Deri-pada kchil dan bsar.
12Kerna sahya nanti ksiankan dia-orang punya ksalahan, Dan dia-orang punya dosa smoa sahya t'ada nanti ingat lagi."
13Dalam hal dia kata, "Perjanjian bharu," yang pertama itu dia sudah bikin lama. Ttapi apa-apa yang jadi lama, dan sudah tua, ia'itu hampir mau hilang.