Alkitab Mobile SABDA
[VER] : [BABA]     [PL]  [PB] 
 <<  Kisah Para Rasul 10 >> 

1Di Kaisariah ada satu orang yang bernama Kornelius, satu hulubalang dalam pasokan yang bernama Pasokan Itali,

2satu orang yang berbakti, dan yang takot sama Allah dngan smoa isi-rumah-nya, dan dia banyak kasi sdkah sama orang bangsa itu, dan slalu minta do'a k-pada Allah.

3Ada kira-kira pukol tiga ptang, dia tengok dalam satu pnglihatan dngan nyata, ada satu mla'ikat Allah datang sama dia, dan kata, "Kornelius."

4Dan dia mrnong sama dia, dan dngan ktakotan dia kata, "Apa itu, tuan?" Dan itu mla'ikat kata sama dia, "Angkau punya do'a dan sdkah sudah naik mnjadi peringatan dpan Allah.

5Skarang suroh orang pergi Yafa, dan panggil satu orang bernama Simon, yang berglar Petrus:

6dia tumpang sama satu tukang samak-kulit bernama Simon, yang ada rumah di tpi laut."

7Bila mla'ikat yang chakap sama dia sudah pergi, dia triak dua hamba-nya, dan satu soldado yang berbakti, yang deri-pada orang-orang yang ttap jaga sama dia.

8Dan bila dia sudah chritakan smoa perkara sama dia-orang, dia suroh dia-orang pergi Yafa.

9Besok-nya, ktika dia-orang ada berjalan, dan hampir dkat negri, Petrus naik atas rumah punya gnting yang rata, ada kira-kira pukol dua-blas tngah hari bgitu, mau minta do'a:

10dan dia jadi lapar, dan ingat mau makan: ttapi ktika dia-orang ada siapkan, dia naik pengsan:

11dan dia tengok langit terbuka, dan terturun satu barang yang rupa-nya sperti satu slimut bsar, di-hulorkan k-tanah deri ampat puncha-nya:

12dalam-nya ada sgala jnis punya binatang ampat-kaki, dan binatang yang mrayap di tanah, dan burong-burong pun.

13Dan ada satu suara datang sama dia bgini, "Hei Petrus, bangun; smbleh-lah dan makan."

14Ttapi Petrus kata, "Ta'boleh bgitu, Tuhan; kerna blum pernah sahya makan barang yang haram atau najis."

15Dan itu suara datang sama dia nombor dua kali, "Apa-apa Allah sudah suchikan, jangan angkau haramkan."

16Dan ini sudah jadi tiga kali: dan itu juga itu barang sudah terangkat naik langit.

17Ktika Petrus punya hati ada bimbang, 'ntah apa-kah arti-nya itu pnglihatan yang dia sudah tengok, itu orang-orang yang Kornelius sudah hantarkan sudah tanya di mana rumah Simon, dan ada berdiri di muka pintu,

18dan dia-orang bertriak dan tanya ada-kah Simon yang berglar Petrus tumpang di situ.

19Ktika Petrus lagi ada terfikir-fikir deri-hal itu pnglihatan, Roh kata sama dia, "Ada tiga orang chari sama angkau.

20Ttapi bangun, dan turun pergi sama dia-orang dngan t'ada bimbang hati, kerna sahya sudah hantarkan dia."

21Dan Petrus turun k-pada dia-orang, dan kata, "Sahya-lah dia yang kamu chari: apa sbab kamu sudah datang sini?"

22Dan dia-orang kata, "Hulubalang Kornelius, satu orang bnar dan yang takut sama Allah, dan ada nama baik di antara s-gnap bangsa Yahudi, dia ini Tuhan sudah psan oleh satu mla'ikat yang suchi, yang dia msti panggil angkau pergi dia punya rumah, dan dngar apa-apa yang angkau kata."

23Jadi, dia panggil dia-orang masok, dan kasi tumpang. Besok-nya dia bangun dan pergi sama dia-orang, dan ada brapa sudara-sudara deri Yafa ikut dia.

24Dan besok-nya dia-orang masok negri Kaisariah. Kornelius ada nantikan dia-orang, dan dia sudah panggil dia punya daging-darah dan sohbat-sohbat-handai berkumpol di situ.

25Dan bila Petrus masok, Kornelius jumpa sama dia, dan jatoh di kaki Petrus, dan smbah dia.

26Ttapi Petrus kasi dia bangun, dan kata, "Bangun-lah, sahya sndiri pun manusia juga."

27Sambil berchakap sama dia, Petrus masok dan jumpa banyak orang sudah berkumpol:

28dan dia kata sama dia-orang, "Kamu sndiri tahu yang orang Yahudi langgar hukum kalau champur sama orang lain bangsa, atau kalau mlawat pun; ttapi k-pada sahya Allah sudah nyatakan yang sahya t'ada patut kata siapa pun haram atau najis:

29sbab ini-lah, bila sahya sudah di-panggil, sahya sudah datang dngan t'ada tolak. Sbab itu sahya minta tanya apa maksud angkau sudah panggil sama sahya?"

30Dan Kornelius kata, "Ampat hari dhulu, sampai ini jam, sahya ada minta do'a dalam rumah sahya waktu pukol tiga ptang punya tempo-smbahyang, dan ada satu orang berdiri dpan sahya dngan pakaian yang berchahya-chahya,

31dan dia kata, 'Kornelius, angkau punya do'a Allah sudah dngar, dan angkau punya sdkah dia sudah ingat.

32Sbab itu, suroh-lah orang pergi Yafa dan panggil Simon yang berglar Petrus; dia tumpang di rumah Simon, tukang samak-kulit, di tpi laut.'

33Itu juga sahya suroh orang pergi k-pada angkau: dan baik juga angkau sudah datang. Skarang kita smoa ada di sini di hadapan Allah, mau dngar sgala perkara yang Tuhan sudah psan sama angkau."

34Dan Petrus buka mulut-nya, dan kata, "Btul sahya dapat tahu yang Allah t'ada tengok orang punya muka:

35ttapi antara sgala bangsa barang siapa yang takot sama dia dan buat bnar, dia-lah berknan k-pada dia.

36Itu perkata'an yang Allah sudah kirim sama anak-anak Isra'el, serta khabarkan injil sjahtra oleh Isa Almaseh (dia-lah Tuhan atas sklian),

37itu perkata'an kamu sndiri tahu, yang sudah mashhur di sluroh tanah Yahudiah, mula'i deri negri Galil, kmdian deri-pada baptisan yang Yahya sudah khabarkan:

38deri-hal Isa orang Nasarat, bagimana Allah sudah jadikan dia Almaseh dngan kasi Roh Alkudus dan kuasa, dia sudah berjalan sini-sana berbuat baik, dan mnymbohkan smoa orang yang kna aniaya oleh iblis; kerna Allah bserta dngan dia.

39Dan kita mnjadi saksi deri-hal smoa perkara yang dia sudah buat di tanah orang Yahudi dan di Yerusalim: dia pun dia-orang sudah bunoh dngan gantongkan dia di atas kayu.

40Dia-lah yang Allah sudah bangkitkan hari nombor tiga, dan sudah kasi dia nyatakan diri-nya,

41bukan k-pada s-gnap bangsa itu, ttapi k-pada saksi-saksi yang Allah sudah pileh lbeh dhulu, ia'itu kita ini yang sudah makan minum sama-sama dia kmdian deri-pada dia berbangkit deri antara orang mati.

42Dan dia suroh kita khabarkan k-pada bangsa itu, dan saksikan yang ini-lah dia yang Allah sudah tntukan mnjadi hakim sgala orang hidop dan yang sudah mati pun.

43Atas dia juga smoa nabi-nabi sudah bersaksi, yang oleh dia punya nama tiap-tiap orang yang perchaya sama dia nanti trima ampun dosa."

44Ktika Petrus ada lagi chakap ini perkata'an, Roh Alkudus turun atas sgala orang yang dngar perkata'an itu.

45Dan orang-orang yang perchaya yang pegang adat sunat, dan yang sudah ikut Petrus datang, jadi terpranjat, sbab atas bangsa-asing pun pmbrian Roh Alkudus sudah di-churahkan.

46Kerna dia-orang dngar itu orang-orang berchakap brapa bhasa, dan bsarkan Allah.

47Itu ktika Petrus jawab, "Ada-kah satu orang pun yang boleh tahankan ayer spaya ini orang smoa jangan di-baptiskan, yang sudah trima Roh Alkudus sperti kita pun?"

48Dan dia suroh baptiskan dia-orang dalam nama Isa Almaseh. Habis itu, dia-orang minta Petrus tinggal di situ lagi sikit hari.


  Share Facebook  |  Share Twitter

 <<  Kisah Para Rasul 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran