Alkitab Mobile SABDA
[VER] : [BABA]     [PL]  [PB] 
 <<  Kisah Para Rasul 16 >> 

1Dia sampai di Darbi dan Lustra, dan di situ ada satu anak-murid yang bernama Timotius, mak-nya orang Yahudi yang sudah perchaya, ttapi bapa-nya orang Grik.

2Ini anak-murid ada nama baik di antara sudara-sudara yang di Lustra dan Ikonium.

3Dia ini Paulus mau ajat berjalan sama-sama; jadi dia sunatkan dia, sbab orang-orang Yahudi yang tinggal dalam smoa itu tmpat: kerna smoa-nya tahu yang dia punya bapa orang Grik.

4Sambil dia-orang berjalan lalu negri-negri itu, dia-orang srahkan k-pada dia-orang hukum-hukum yang sudah di-tntukan oleh rasul-rasul dan ktua-ktua di Yerusalim, spaya dia-orang boleh turut.

5Bgini sgala eklisia jadi ttap dalam iman itu, dan s-hari-hari bertambah-tambah banyak-nya.

6Dia-orang jalan trus jajahan Frugiah dan Galatiah, sbab Roh Alkudus larangkan dia jangan khabarkan perkata'an itu di tanah Asiah:

7dan bila dia-orang sudah sampai tntang Musiah, dia-orang choba masok Bituniah, ttapi Roh Isa t'ada juga kasi.

8Jadi dia-orang masok Musiah, dan turun di negri Troas.

9Dan tempo malam Paulus ternampak satu pnglihatan, ia'itu: Ada satu orang Makadoniah berdiri terminta-minta sama dia, serta kata, "Mari sbrang masok Makadoniah, tolong sama kita."

10Bila dia sudah tengok itu pnglihatan, itu juga kita chari jalan mau pergi Makadoniah, sbab kita punya bichara yang Allah sudah panggil kita khabarkan injil k-pada orang-orang itu.

11Sbab itu deri Troas kita blayer btul, tuju Pulau Samotrake, dan besok pula sampai Niapolis;

12dan deri situ pergi Filipi, negri di Makadoniah, dan kpala negri dalam jajahan itu, tmpat orang Rom tinggal: dan ada brapa hari kita tinggal dalam ini negri.

13Dan hari-perhentian kita kluar pintu negri pergi tpi sungai, di mana kita sudah sangka ada tmpat orang minta do'a; dan kita dudok berchakap sama prempuan-prempuan yang sudah berhimpon.

14Ada satu prempuan dngar kita, nama-nya Ludia, yang jual kain ungu, dia satu orang negri Tuateira, dan smbah Allah: hati-nya Tuhan bukakan spaya dia boleh ingat baik-baik perkara-perkara yang Paulus sudah kata.

15Bila dia sudah di-baptiskan, sama-sama isi-rumah-nya, dia minta sama kita, serta kata, "Jikalau dalam kamu punya bichara sahya sudah jadi stiawan k-pada Tuhan, mari tinggal dalam sahya punya rumah." Dan dia minta kita banyak-banyak.

16Satu hari, bila kita ada berjalan pergi tmpat orang minta do'a, kita terjumpa satu budak prempuan yang sudah terkna jin pnilek, dan dia ini kasi dia punya tuan-tuan banyak untong dngan dia punya tilek.

17Ini budak ikut Paulus sama kita bertriak-triak, dan kata, "Ini orang smoa jadi hamba Allah yang maha tinggi, dan dia-orang khabarkan jalan slamat sama kamu."

18Dia buat bgini banyak hari punya lama. Ttapi Paulus punya hati jadi sangat susah, dan dia balek muka kata sama itu jin, "Dalam nama Isa Almaseh sahya suroh angkau kluar deri-pada ini budak." Dan itu jin kluar itu jam juga.

19Ttapi bila dia punya tuan-tuan tengok yang harap untong-nya sudah hilang, dia-orang tangkap Paulus sama Silas, dan seret dia-orang pergi di pasar dpan pnghulu-pnghulu,

20dan bila dia-orang sudah bawa dua-dua itu k-pada majistret, dia-orang kata, "Ini dua orang ada bikin banyak kachau sama negri kita; dia ini orang Yahudi,

21dan kluarkan adat-adat yang t'ada patut kita trima atau turut, sbab kita orang Rom."

22Dan orang-banyak smoa skali bangun lawan sama itu dua rasul; dan smoa majistret koyakkan itu dua orang punya pakaian, dan suroh orang ssahkan sama dia.

23Bila dia-orang sudah kasi banyak palu, dia orang masokkan itu dua orang dalam jel, dan suroh kpala jel jaga sama dia baik-baik.

24Ini kpala jel, sbab dia sudah dapat bgini punya hukum, champakkan dia-orang masok jel yang dalam skali, dan pasongkan kaki dia-orang.

25Ttapi tngah malam bgitu, Paulus sama Silas ada minta do'a dan mnyanyi puji-pujian k-pada Allah, dan sgala orang jel pun dngar:

26dngan s-kjapan ada satu gmpa-bumi yang bsar, sampaikan kaki tembok jel smoa tergonchang: dan itu juga smoa pintu-pintu terbuka, dan masing-masing punya rantai terluchut.

27Itu kpala jel bangun deri tidor, dan bila dia tengok pintu-pintu jel sudah terbuka, dia chabotkan pdang-nya, mau bunoh dia punya diri, sbab dia fikir sgala orang jel sudah lari.

28Ttapi Paulus bertriak dngan suara bsar, "Jangan binasakan diri angkau: kerna kita smoa ada di sini."

29Dan dia minta api, dan lari masok, dan jatoh dpan Paulus sama Silas dngan mngglitar.

30Dan bila dia sudah bawa rasul-rasul kluar, dia kata, "Tuan-tuan, apa sahya msti buat spaya dapat slamat?"

31Dia-orang kata, "Perchaya sama Tuhan Isa, dan angkau nanti slamat, angkau dan orang isi-rumah pun."

32Dan dia-orang khabarkan perkata'an Tuhan k-pada dia, dan k-pada smoa orang yang ada dalam rumah-nya.

33Dan itu malam, itu jam juga, dia ambil sama dia-orang dan chuchikan luka-nya, dan dia trima baptis, dia dngan dia punya isi-rumah, itu ktika juga.

34Dan dia bawa dia-orang naik masok dia punya rumah, dan buka meja kerna dia-orang, dngan banyak suka-hati sama-sama smoa isi-rumah-nya sbab perchaya sama Allah.

35Bila siang hari, majistret suroh mata-mata pergi, dan kata, "Lpaskan itu dua orang."

36Dan kpala jel katakan itu perkata'an sama Paulus, kata-nya, "Itu majistret sudah psan suroh lpaskan kamu; sbab itu skarang kluar-lah, dan pergi dngan slamat."

37Ttapi Paulus kata sama dia-orang, "Kita sudah kna ssah di dpan orang-banyak, dngan t'ada preksa dhulu, sunggoh pun kita orang Rom, dan dia-orang sudah kasi kita masok jel; skarang pula dia-orang mau kasi kita kluar dngan smbunyi? skali-skali t'ada boleh bgitu; ttapi biar dia-orang sndiri datang bawa kita kluar."

38Dan mata-mata khabarkan ini perkata'an sama smoa majistret: dan bila dia-orang dngar yang Paulus dan Silas orang Rom, dia-orang naik ktakotan.

39Dia-orang datang dan terminta-minta sama dia-orang; dan bila dia-orang sudah bawa dia kluar, dia-orang minta dia pergi deri itu negri.

40Jadi, Paulus sama Silas kluar deri dalam jel, dan masok rumah Ludia: bila dia-orang sudah tengok dan hiburkan sudara-sudara itu, dia-orang berjalan.


  Share Facebook  |  Share Twitter

 <<  Kisah Para Rasul 16 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran