Alkitab Mobile SABDA
[VER] : [BABA]     [PL]  [PB] 
 <<  Kolose 4 >> 

1Hei kamu sklian yang mnjadi tuan, buat-lah apa yang adil dan bnar k-pada kamu punya hamba-hamba; sdang kamu tahu yang kamu pun ada satu Tuan di shorga.

2Tinggal-lah ttap minta do'a, dan berjaga dalam itu hal dngan mnguchap shukor;

3dalam itu, minta do'a kerna kita pula, spaya Allah boleh bukakan kita satu pintu kerna perkata'an itu, spaya kita boleh chakapkan ruhsia Almaseh, kerna itu ruhsia-lah sahya kna pasong;

4spaya boleh juga sahya mashhurkan dia, sperti yang patut sahya chakapkan.

5Bawa-lah diri kamu dngan bijaksana k-pada orang di luar, dan bergunakan s-gnap waktu.

6Biar-lah slalu kamu punya perchakapan dngan anugrah, asin dngan garam, spaya kamu boleh tahu apa macham mau kasi jawab k-pada tiap-tiap orang.

7Smoa sahya punya hal, Tukhikus nanti kasi kamu tahu, ia'itu sudara yang kkaseh dan playan yang stiawan, yang sama-sama jadi hamba dalam Tuhan:

8dan sahya sudah hantarkan dia k-pada kamu sbab ini perkara juga, ia'itu spaya kamu boleh tahu kita punya hal, dan spaya dia boleh hiburkan hati kamu;

9sama-sama sudara kita Onesimus yang stiawan dan kkaseh itu, dan dia-lah kamu juga punya orang. Dia-orang nanti kasi kamu tahu deri-hal smoa perkara di sini.

10Aristarkus, yang kna pasong sama-sama sahya, kirim tabek k-pada kamu, dan Markus pun, yang s-pupu sama Bar-nabas (kamu sudah trima hukum deri-hal dia; kalau dia datang k-pada kamu, sambot-lah sama dia),

11dan Yesus pun, yang di-sbot Yustus, kirim tabek k-pada kamu, tiga-tiga ini ada pegang adat sunat punya orang: dan dia-orang-lah saja yang ada bkerja sama-sama sahya kerna kraja'an Allah, dan dia-orang mnjadi pnghiburan sama sahya.

12Ipafras pun kirim tabek k-pada kamu, ia'itu kamu juga punya orang, dan satu hamba Isa Almaseh, dan slalu dia ada usahakan diri-nya kerna kamu dalam dia punya perminta'an, spaya kamu berdiri ttap dngan smpurna dan dngan rasa tntu dalam sgala kahandak Allah.

13Kerna sahya bersaksi fasal dia, btul-lah dia ada sangat berpnat kerna kamu, dan kerna orang-orang di Laodikiah, dan kerna orang di Hierapolis pun.

14Dan Lukas, doktor yang kkaseh itu, kirim tabek k-pada kamu, dan Demas pun.

15Kasi-lah tabek k-pada sudara-sudara yang di Laodikiah, dan k-pada Numfas, dan k-pada eklisia yang di rumah-nya itu.

16Dan bila ini surat kiriman sudah habis orang bacha antara kamu smoa, kasi bacha pula k-pada eklisia orang Laodikiah; dan surat yang deri sana pula baik kamu bacha.

17Dan bilang sama Arkhippus, "Ingat baik-baik itu playanan yang angkau sudah trima dalam Tuhan, spaya angkau smpurnakan."

18Sahya ini Paulus ada kasi tabek dngan bkas tangan sndiri. Ingat-lah sahya punya pasong. Biar-lah anugrah Allah bersama-sama kamu smoa.


  Share Facebook  |  Share Twitter

 <<  Kolose 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran