Dual Panel1Isa kata sama murid-murid-nya, "Perkara-perkara yang kasi terantok ta'boleh tidak msti datang; ttapi susah-lah sama itu orang yang datangkan!
2Deri-pada dia kasi terantok satu pun deri-pada ini anak-anak kchil, lbeh baik kerna dia jikalau satu batu kisaran di-gantongkan kliling lehir-nya, dan dia di-tngglamkan dalam laut.
3Jaga-lah kamu punya diri: jikalau sudara angkau berdosa, tgurkan sama dia; dan jikalau dia mnysal ampunkan dia.
4Dan jikalau dia berdosa sama angkau tujoh kali dalam satu hari, dan tujoh kali dia balek kata sama angkau, 'Sahya mnysal,' ampunkan sama dia."
5Dan rasul-rasul kata sama Tuhan, "Tambahkan-lah kita punya perchaya."
6Tuhan kata, "Jikalau kamu ada perchaya sperti s-biji ssawi, kamu nanti kata sama ini pokok ara, 'Terchabot-lah, dan biar angkau tertanam dalam laut,' tntu-lah itu pokok nanti turut prentah kamu.
7Ttapi jikalau kamu ada satu hamba yang ada mmbajak atau jaga kambing, mana satu orang antara kamu nanti kata sama dia bila dia pulang deri ladang, 'Mari lkas dudok makan;'
8bukan-kah dia nanti kata sama hamba itu, 'Siapkan apa yang sahya mau makan, ikat pinggang mlayankan sahya, sampai sahya sudah habis makan-minum, bharu-lah angkau pula boleh makan-minum'?
9Ada-kah dia balas trima-kaseh sama itu hamba sbab dia sudah buat apa-apa yang dia suroh?
10Bgitu juga kamu pun, bila kamu sudah habis buat sgala perkara yang kamu sudah kna suroh, baik kamu bilang, 'Kita ini hamba yang ta'berguna; kita chuma sudah buat apa yang kita patut buat.'"
11Dan tngah jalan pergi Yerusalim, Isa lalu trus tngah-tngah tanah Samariah sama tanah Galil.
12Dan serta dia masok satu kampong ada s-puloh orang tai-ko berjumpa sama dia, dan dia-orang ada berdiri jauh-jauh:
13dia-orang nyaringkan suara-nya, dan kata, "Ya Isa, ya Tuan, ksiankan-lah sama kita."
14Dan bila Isa sudah tengok, dia kata sama dia-orang, "Pergi tunjokkan kamu punya diri k-pada imam-imam." Dan sudah jadi, sambil dia-orang berjalan, dia-orang mnjadi suchi.
15Dan antara itu orang-orang ada satu, bila dia tengok dia sudah di-suchikan, dia pulang balek muliakan Allah dngan suara yang bsar;
16dan dia jatoh tertiarap di kaki Isa, serta balas trima-kaseh: dan dia pula satu orang Samariah.
17Dan Isa jawab dan kata, "Bukan-kah s-puloh orang sudah di-suchikan? ttapi mana-kah yang lagi smbilan itu?
18T'ada-kah satu orang pun yang sudah pulang mau muliakan Allah, chuma ini orang dagang saja?"
19Dan Isa kata sama dia, "Bangun, pergi-lah angkau: angkau punya perchaya sudah slamatkan angkau."
20Dan orang-orang Farisi tanya sama Isa bila-kah kraja'an Allah nanti datang, dan dia jawab kata, "Kraja'an Allah bukan datang dngan nyata:
21dan t'ada orang nanti kata, 'Tengok di sini!' atau, 'Di sana!' kerna ingat, kraja'an Allah itu ada di antara kamu."
22Dan dia kata sama murid-murid, "Hari-nya nanti datang bila kamu nanti ingin mau tengok satu hari deri-pada jman Anak-manusia, ttapi t'ada pula kamu nanti tengok.
23Dan orang nanti kata sama kamu, 'Tengok di sana!' 'Tengok di sini!' jangan-lah kamu pergi atau ikut:
24kerna sperti kilat terpanchar deri sblah kaki langit berchahya pula sampai kaki langit sblah sana; bgitu-lah Anak-manusia dalam jman-nya.
25Ttapi dhulu deri itu dia msti tanggong banyak sngsara, dan msti kna tolak oleh ini jman punya orang.
26Dan sperti sudah jadi dalam jman Noh, bgitu-lah juga nanti jadi dalam jman Anak-manusia.
27Dia-orang makan-minum, dia-orang kahwin dan di-kahwinkan, sampai itu hari bila Noh masok dalam bahtra, dan ayer-bah datang binasakan smoa.
28Bgitu juga sperti sudah jadi dalam jman Lut; dia-orang makan-minum, dia-orang jual bli, dia-orang tanam-mnanam, dia-orang naikkan rumah;
29ttapi dalam hari yang Lut kluar deri Sadom, hujan-api dan blerang turun deri langit binasakan smoa:
30ini macham juga nanti jadi itu hari bila Anak-manusia nanti di-nyatakan.
31Dalam itu hari orang yang ada di atas gnting-rata, dan herta-nya ada di dalam rumah, jangan dia turun mau bawa pergi: dan bgitu juga orang yang ada di ladang, jangan pulang balek.
32Ingat Lut punya bini.
33Barang-siapa yang nanti chari jalan mau jaga nyawa-nya, dia nanti hilang nyawa-nya: ttapi barang-siapa yang hilang nyawa, dia nanti kasi dia hidop.
34Sahya kata sama kamu, itu malam nanti ada dua orang dlaki di atas satu tmpat tidor; satu nanti kna ambil, dan satu tertinggal.
35Nanti ada dua prempuan sama-sama mngisar; satu nanti kna ambil, dan satu tertinggal."
36[KOSONG]
37Dan murid-murid jawab tanya sama dia, "Di mana itu, Tuhan?" Dan Isa kata sama dia-orang, "Di mana ada bangkai, di situ-lah nanti burong lang berkumpol."