Alkitab Mobile SABDA
[VER] : [BABA]     [PL]  [PB] 
 <<  Lukas 19 >> 

1Dan dia masok, dan ada berjalan trus Yeriko.

2Dan ada satu orang bernama Zakkai; dia ini kpala orang pungut-chukai, dan dia ada kaya.

3Dia chari jalan mau tengok siapa-kah Isa; ttapi ta'boleh sbab orang-banyak itu, dan kerna dia satu orang pendek.

4Dan dia lari dhulu panjat pokok ara hutan, mau tengok Isa, kerna dia nanti lalu di situ.

5Bila sampai itu tmpat, Isa tengok atas, dan kata sama dia, "Hei Zakkai, lkas turun, kerna ini hari sahya msti tumpang di rumah angkau."

6Dan dia lkas turun, dan sambot sama dia dngan suka-hati.

7Bila orang tengok, smoa-nya bersungut, kata, "Dia sudah masok mau tumpang sama orang yang berdosa."

8Itu waktu Zakkai berdiri kata sama Tuhan, "Tengok-lah, Tuhan, sparoh sahya punya herta sahya kasi sama orang miskin; dan jikalau sahya sudah ambil apa-apa deri-pada orang dngan tipu, sahya mau pulangkan ampat kali ganda."

9Dan Isa kata sama dia, "Ini hari sudah datang slamat k-pada rumah ini, deri sbab dia pun satu anak Ibrahim.

10Kerna Anak-manusia sudah datang mau chari dan slamatkan orang yang sudah hilang."

11Dan waktu dia-orang dngar ini smoa, dia katakan lagi satu perumpama'an, sbab dia sudah dkat Yerusalim, dan sbab ada orang fikir yang kraja'an Allah nanti di-nyatakan itu ktika juga.

12Sbab itu dia kata, "Ada satu orang berpangkat sudah pergi satu negri yang jauh, mau trima kraja'an kerna diri-nya, dan mau pulang.

13Dan dia panggil s-puloh hamba-nya, dan kasi dia-orang s-puloh kati punya wang perak, dan kata sama dia-orang, 'Buat mniaga sampai sahya pulang.'

14Ttapi orang negri-nya bnchi sama dia, dan dia-orang suroh utusan ikut dia mau kata, 'Kita ta'mau ini orang jadi raja atas kita.'

15Jadi bila dia pulang, kmdian deri-pada dia sudah trima itu kraja'an, dia suroh panggil itu hamba-hamba yang dia sudah kasi wang perak spaya dia boleh tahu brapa-kah dia-orang sudah untong dngan perniaga'an-nya.

16Dan yang pertama datang mnghadap, dan kata sama dia, 'Tuan, itu satu kati tuan punya perak sudah untong lagi s-puloh kati.'

17Dan tuan-nya kata, 'Itu bagus, hei hamba yang baik: sbab angkau sudah stiawan dalam perkara yang kchil skali, angkau boleh pegang prentah atas s-puloh negri.'

18Dan yang nombor dua datang kata, 'Tuan, itu satu kati tuan punya perak sudah untong lagi lima kati.'

19Dan dia kata sama dia pun, 'Angkau boleh pegang prentah atas lima negri.'

20Dan orang lain itu datang kata, 'Tuan, ini-tah tuan punya wang perak yang sahya sudah simpan di dalam sapu tangan:

21kerna sahya sudah takot sama tuan, sbab tuan satu orang yang kras: tuan ambil apa yang tuan t'ada taroh, dan mnuai apa yang tuan t'ada tabur.'

22Itu tuan kata sama dia, 'Deri-pada mulut angkau sndiri sahya hukumkan angkau, hei hamba yang jahat. Angkau sudah pun tahu yang sahya satu orang yang kras, yang sahya ambil apa yang sahya t'ada taroh, dan mnuai apa yang sahya t'ada tabur;

23kalau bgitu knapa angkau t'ada kasi wang sahya masok bank, dan bila sahya pulang sahya boleh minta balek sahya punya wang dngan bunga-nya?'

24Kmdian dia kata sama orang-orang yang berdiri dkat situ, 'Ambil itu s-kati wang deri-pada dia, kasi sama dia itu yang ada s-puloh kati

25(dia-orang pula kata sama dia. 'Tuan, dia sudah ada s-puloh kati');

26sahya bilang sama kamu, barang-siapa yang ada, pada dia nanti di-brikan, ttapi barang-siapa yang t'ada apa-apa, barang yang ada sama dia itu pun nanti di-ambil pergi deri-pada dia.

27Ttapi itu musoh-musoh sahya yang ta'mau sahya jadi raja atas dia, bawa sini dan bunoh dpan sahya.'"

28Bila Isa sudah habis berchakap bgini, dia berjalan lbeh dhulu, pergi Yerusalim.

29Dan sudah jadi, bila Isa sudah sampai dkat Bait-Fagi dan Bait-Ani, di bukit yang bernama Bukit Zaitun, dia hantarkan dua anak-murid-nya,

30dan kata, "Pergi itu kampong yang tntang situ; dan bila kamu masok, kamu nanti jumpa satu anak kaldai terikat, yang orang blum pernah tunggang: bukakan sama dia, dan bawa sini.

31Dan jikalau ada orang tanya kamu, 'Knapa kamu buka,' kamu boleh kata, 'Tuhan mau pakai sama dia.'"

32Itu orang yang Isa hantarkan sudah pergi, dan jumpa sama sperti dia sudah bilang sama dia-orang.

33Bila dia-orang ada bukakan itu anak kaldai, tuan-tuan-nya kata sama dia-orang, "Knapa kamu mau bukakan itu kaldai?"

34Dia-orang kata, "Tuhan mau pakai sama dia."

35Dia-orang bawa itu anak kaldai k-pada Isa: dan bila dia-orang sudah champakkan dia-orang punya pakaian di atas itu kaldai, dia-orang kasi Isa dudok atas-nya.

36Dan sambil Isa berjalan, ada orang bntangkan dia-orang punya pakaian di jalan.

37Dan bila dia sudah sampai dkat, di churaman Bukit Zaitun, smoa murid-murid yang banyak itu mula'i suka-suka dan puji Allah dngan suara yang bsar, deri sbab smoa m'ujizat yang dia-orang sudah tengok;

38dia-orang kata, "Berkat-lah itu Raja yang datang dalam nama Tuhan: sjahtra dalam shorga, dan kmulia'an dalam ktinggian."

39Antara itu orang-banyak ada brapa orang Farisi yang kata sama Isa, "Guru, baik tgurkan guru punya murid-murid."

40Dan Isa jawab kata, "Sahya bilang sama kamu, jikalau ini smoa diam, batu-batu pun nanti bertriak."

41Bila sudah sampai dkat, dia tengok itu negri dan mnangiskan,

42serta kata, "Jikalau ini hari angkau sudah tahu perkara-perkara yang bawa sjahtra, ya angkau juga! ttapi skarang sudah tersmbunyi deri-pada mata angkau.

43Kerna hari-nya nanti datang atas angkau, bila angkau punya musoh-musoh nanti buat satu kubu kliling angkau, dan kpongkan angkau dan impitkan angkau sblah-mnyblah,

44dan nanti ratakan angkau, dngan anak-anak yang ada dalam angkau; dan t'ada nanti tertinggal dalam angkau satu batu pun bersusun atas lain; sbab angkau t'ada tahu waktu yang angkau kna intai."

45Isa masok ka'abah, dan mula'i halaukan orang yang berjual,

46dan kata sama dia-orang, "Ada tersurat, 'Rumah sahya nanti jadi rumah-berdo'a:' ttapi kamu sudah buatkan dia satu goa pnyamon."

47S-hari-hari Isa ada mngajar di dalam ka'abah. Ttapi kpala-kpala imam sama orang pnulis sama itu bangsa punya pnghulu-pnghulu chari jalan mau binasakan sama dia:

48dan dia-orang ta'boleh dapat 'ntah apa-kah mau buat; kerna smoa orang bangsa itu bergantong sama dia, dan dngar ajaran-nya.


  Share Facebook  |  Share Twitter

 <<  Lukas 19 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel