Dual Panel1T'ada brapa lama kmdian, Isa berjalan sana-sini, lalu negri-negri dan kampong-kampong, serta khabarkan dan mashhurkan khabar yang baik deri-hal kraja'an Allah, dan itu dua-blas orang ada sama-sama dia,
2dan brapa prempuan-prempuan yang sudah di-smbohkan deri-pada jin yang jahat, dan deri klmahan-nya, ia'itu Mariam yang di-sbot orang Magdala, yang deri-pada-nya sudah terkluar tujoh jin,
3sama Yoannah bini Khuza juru-kunchi Herodis, sama Susannah, dan ada banyak lain prempuan-prempuan lagi, yang layankan Isa deri herta-nya.
4Dan bila banyak orang sudah berhimpon, dan orang deri tiap-tiap negri datang dkat dia, Isa berchakap dngan satu perumpama'an:
5"Orang pnabur itu kluar mau mnabur bneh: dan dalam dia mnabur sparoh bneh jatoh di tpi jalan, dan orang pinjakkan, dan burong-burong habis makankan.
6Yang ada jatoh di atas batu karang: dan waktu dia bertumboh dia layu, sbab t'ada lmbab.
7Dan ada pula jatoh di tngah-tngah pokok duri, dan pokok-pokok itu bertumboh sama-sama, dan lmaskan itu bneh.
8Dan ada pula jatoh di tanah yang baik, dan bertumboh, dan kluarkan buah s-ratus ganda punya banyak." Bila dia sudah kata ini, dia bertriak, "Siapa ada kuping mau dngar, biar-lah dia dngar."
9Dia punya murid-murid tanya sama dia, "Apa arti ini perumpama'an."
10Dan dia kata, "K-pada kamu sudah di-brikan boleh tahu kraja'an shorga punya ruhsia-ruhsia: ttapi k-pada lain-lain orang dngan perumpama'an; sbab sunggoh pun dia-orang tengok, t'ada juga dia-orang nampak, dan sunggoh pun dia-orang dngar, t'ada juga dia-orang mngerti.
11Ini-lah itu perumpama'an punya arti: itu bneh-lah perkata'an Allah.
12Yang di tpi jalan, ia'itu orang yang sudah dngar; kmdian iblis datang, dan ambil itu bneh deri-pada hati dia-orang, spaya dia-orang jangan perchaya dan dapat slamat.
13Dan yang di atas batu karang, itu-lah orang yang bila dia sudah dngar, dia trima perkata'an itu dngan suka-hati; ttapi ini smoa t'ada akar-nya, dan dia-orang perchaya chuma sikit tempo saja, dan waktu pnchoba'an dia-orang undor.
14Dan yang jatoh di tngah-tngah pokok duri, itu-lah orang yang sudah dngar, ttapi ktika dia-orang berjalan dia-orang kna lmas dngan ini kahidopan punya khuatir dan kkaya'an dan ksuka'an, dan t'ada kluarkan buah sampai chukop smpurna.
15Dan yang di tanah yang baik, itu-lah orang yang ada hati tulus dan baik, dan bila dia sudah dngar perkata'an itu, dia simpan baik-baik, dan kluarkan buah dngan sabar-nya.
16"Satu orang pun t'ada pasang plita, dan habis itu tutopkan di bawah gantang, atau taroh di bawah ranjang; ttapi dia taroh di atas kaki-plita, spaya orang yang masok boleh tengok trang-nya.
17Kerna t'ada apa-apa yang tersmbunyi, yang ta'nanti jadi nyata; dan t'ada apa-apa ruhsia pun, yang orang ta'nanti dapat tahu, dan yang ta'nanti di-nyatakan.
18Sbab itu jaga baik-baik apa macham kamu dngar: kerna barang-siapa yang ada apa-apa, k-pada dia nanti di-brikan; dan barang-siapa yang t'ada apa-apa, deri-pada dia sampaikan apa yang dia fikir dia ada pun nanti kna ambil."
19Dan Isa punya mak sama sudara-sudara-nya datang dkat dia, ttapi dia-orang ta'boleh jumpa sama dia sbab orang-banyak.
20Jadi orang kasi khabar sama dia, "Tuan punya mak dan sudara-sudara ada berdiri luar, mau tengok tuan."
21Ttapi dia jawab kata sama dia-orang, "Sahya punya mak dan sahya punya sudara-sudara, ini-lah smoa yang dngar perkata'an Allah dan yang buat bgitu."
22Ada satu hari dia naik prahu sama-sama murid-murid-nya; dan dia kata sama dia-orang, "Mari kita pergi sbrang tasek:" dan dia-orang berlayer.
23Ttapi ktika dia-orang berlayer, Isa tertidor: dan satu angin ribot turun di tasek itu; dan itu prahu jadi pnoh ayer, dan dia-orang dalam bahya yang bsar.
24Dia-orang datang k-pada Isa, dan bila sudah bangunkan sama dia, dia-orang kata, "Tuan, tuan, kita binasa." Dan dia bangun tngkingkan angin sama ayer yang berglombang itu: dan smoa-nya brenti, dan mnjadi tdoh skali.
25Dan Isa kata sama dia-orang, "Mana kamu punya perchaya?" Ttapi dia-orang naik ktakotan dan hairan, dan kata satu sama lain, "Siapa pula dia ini? yang kasi hukum sama angin dan ayer skali pun, dan itu smoa turut prentah-nya."
26Dan dia-orang berlayer sampai di tanah orang Garasa, yang tntang tanah Galil.
27Bila Isa sudah turun darat, ada berjumpa sama dia satu orang deri itu negri, yang terkna jin; dan sudah lama dia t'ada pakai pakaian, dan t'ada tinggal di rumah, ttapi di kubor-kubor.
28Bila ini orang tengok Isa, dia bertriak dan jatoh dpan dia, dan dngan suara bsar kata, "Hei Isa, Anak Allah Yang Maha Tinggi, sahya sama angkau apa ada terkna? Sahya minta sama angkau jangan kasi sahya seksa."
29Kerna Isa sudah suroh jin yang najis itu kluar deri-pada itu orang. Kerna banyak kali itu jin sudah pegang sama dia: dan orang ada jaga dia, dan dia terikat dngan pasong dan rantai; dan dia putuskan itu rantai, dan itu jin tolakkan dia masok tmpat yang sunyi-sunyi.
30Dan Isa tanya sama dia, "Apa angkau punya nama?" Dia kata, "Ligion;" kerna banyak jin sudah masok dalam dia.
31Dan itu jin smoa minta sama Isa, jangan suroh dia-orang pergi masok lobang yang ta'boleh duga.
32Di situ ada satu kawan babi, yang chari makan di atas gunong: dan itu jin smoa minta Isa biarkan dia-orang masok dalam itu babi-babi. Dan Isa biarkan.
33Jadi itu jin smoa kluar deri itu orang, dan masok dalam itu babi-babi: dan itu kawan babi lari turun itu gunong punya churam, terjun dalam tasek, sampai mati lmas.
34Dan bila itu orang yang piara babi tengok apa yang sudah jadi, dia-orang lari bilangkan di dalam negri dan di dusun pun.
35Dan orang kluar tengok apa sudah jadi; dan dia-orang datang k-pada Isa, dan berjumpa itu orang yang deri-pada-nya sudah terkluar itu jin smoa ada dudok di kaki Isa, dngan sudah pakai pakaian, dan dngan otak-nya btul: dan smoa orang naik takot.
36Dan orang-orang yang sudah tengok khabarkan bagimana itu orang yang terkna jin sudah slamat.
37Dan sgala orang-banyak di tanah orang. Garasa minta Isa undor deri-pada dia-orang; kerna satu ktakotan yang bsar sudah datang atas dia-orang: jadi Isa naik prahu dan pulang balek.
38Ttapi itu orang, yang deri-pada-nya sudah terkluar itu jin, minta mau bersama-sama Isa: ttapi Isa kasi dia pergi, dan kata,
39"Pergi pulang rumah sndiri, dan nyatakan brapa bsar punya perkara Allah sudah buat kerna angkau." Dan dia pergi mashhurkan dalam sluroh negri itu brapa bsar punya perkara Isa sudah buat kerna dia.
40Bila Isa pulang, orang-banyak sambot sama dia; kerna dia-orang smoa sudah nanti-nantikan dia.
41Dan ada satu orang yang bernama Ya'ir datang situ, dia ini orang yang jadi kpala-rumah-smbahyang: dia jatoh di kaki Isa, dan minta dia datang rumah-nya:
42kerna dia ada satu anak prempuan yang tunggal, kira-kira dua-blas tahun umor-nya, yang hampir mati. Ttapi ktika Isa berjalan orang-banyak krumunkan sama dia.
43Dan ada satu prempuan yang sakit tumpah-tumpah darah, sudah dua-blas tahun punya lama, yang sudah blanjakan hidopan-nya sampai habis sama doktor-doktor, ttapi satu doktor pun ta'boleh kasi dia baik.
44Ini prempuan datang deri sblah blakang Isa, dan jamah kaki baju-nya: dan itu juga lelehan darah-nya pun brenti.
45Dan Isa kata, "Siapa itu yang sudah jamah sahya?" Bila smoa orang bersangkal, Petrus dngan lain-lain orang yang sama-sama dia kata, "Tuhan, ada banyak orang krumunkan Tuhan, dan berimpit."
46Ttapi Isa kata, "Ada juga satu orang sudah jamah sahya: kerna sahya sudah tahu yang kuasa sudah kluar deri-pada sahya."
47Bila itu prempuan tengok yang dia ta'boleh smbunyi lagi, dia datang dngan mngglitar, dan jatoh dpan dia, dan kasi tahu dpan smoa orang-banyak itu apa fasal dia sudah jamah sama Isa, dan bagimana itu juga dia sudah di-smbohkan.
48Isa kata sama itu prempuan, "Hei anak prempuan, angkau punya perchaya sudah slamatkan angkau; pergi-lah dngan sjahtra."
49Waktu Isa ada lagi berchakap, ada satu orang datang deri rumah kpala-rumah-smbahyang itu, yang kata, "Tuan punya anak sudah pun mati; ta'usah-lah kasi susah sama itu guru lagi."
50Ttapi Isa dngar itu, dan jawab sama Ya'ir, "Jangan takot: chuma perchaya saja, dan dia nanti slamat."
51Bila Isa sudah sampai di rumah itu, dia t'ada kasi satu orang pun masok sama-sama dia, chuma Petrus, dan Yahya, dan Yakob, dan itu budak punya mak-bapa saja.
52Dan smoa orang ada mnangis dan mratapkan itu budak: ttapi Isa kata, "Jangan mnangis; ini budak bukan-nya mati, dia chuma tidor saja."
53Dan dia-orang smoa tertawakan sama dia, sbab dia-orang tahu yang itu budak sudah mati.
54Ttapi Isa pegang itu budak punya tangan, dan bertriak kata, "Hei budak, bangun-lah."
55Dan itu budak punya roh pulang balek; dan dia bangun itu juga: dan Isa suroh orang kasi dia makan.
56Itu budak punya mak-bapa naik hairan: ttapi Isa psan dia-orang jangan kata satu orang pun apa sudah jadi.