Alkitab Mobile SABDA
[VER] : [BABA]     [PL]  [PB] 
 <<  Matius 23 >> 

1Itu ktika Isa berchakap sama orang-banyak, dan sama dia punya murid-murid,

2dan kata, "Orang-orang pnulis sama orang Farisi ada dudok Musa punya krusi:

3sbab itu buat dan turut smoa perkara yang dia-orang suroh: ttapi klakuan-nya jangan kamu ikut; kerna dia-orang chakap, ttapi t'ada buat.

4Ttapi dia-orang ikatkan tanggongan yang brat dan yang susah pikul punya, dan ltakkan atas orang punya bahu; ttapi dia-orang sndiri ta'mau kasi grak itu tanggongan dngan satu jari-nya skali pun.

5Dan smoa dia-orang punya klakuan dia-orang buat spaya orang tengok: dia-orang lebarkan tangkal-nya, dan panjangkan rambu-rambu pakaian-nya,

6dan suka dudok di tmpat yang mulia-mulia dalam perjamuan, dan krusi yang mulia-mulia di rumah smbahyang,

7dan suka trima orang punya tabek di pasar, dan suka orang triak dia, 'Rabbi.'

8Ttapi kamu ini jangan orang triak 'Rabbi': kerna satu juga guru kamu, dan kamu smoa jadi sudara.

9Dan satu orang pun dalam dunia ini jangan kamu triak 'Bapa;' kerna satu juga Bapa kamu, ia'itu yang di shorga.

10Lagi pun kamu ini jangan orang triak 'kpala:' kerna satu saja kamu punya kpala, ia'itu Almaseh.

11Ttapi yang bsar skali antara kamu, dia nanti jadi kamu punya orang playan.

12Barang-siapa yang tinggikan diri-nya sndiri nanti di-rndahkan; dan barang-siapa yang rndahkan diri-nya sndiri nanti di-tinggikan."

13"Ttapi susah-lah kamu, hei orang pnulis dan orang Farisi, orang pura-pura! kerna kamu kunchikan kraja'an shorga di dpan orang: sbab kamu sndiri t'ada masok, dan orang yang mau masok pun kamu t'ada kasi.

14[KOSONG]

15"Susah-lah kamu, hei orang pnulis dan orang Farisi, orang pura-pura! kerna kamu berjalan kliling laut dan darat pun mau buat satu orang mu'alaf; dan bila dia sudah jadi bgitu, kamu buatkan dia satu anak jhannam dua kali lbeh deri-pada kamu sndiri.

16"Susah-lah kamu, hei pmimpin yang buta, yang kata, 'Barang-siapa yang bersumpah dmi ka'abah, t'ada apa; ttapi barang-siapa yang bersumpah dmi mas ka'abah, dia kna tanggong.'

17Bodoh kamu, dan buta: kerna yang mana lbeh bsar? itu mas, atau itu ka'abah yang suchikan itu mas?

18Dan lagi kamu kata, 'Barang-siapa yang bersumpah dmi tmpat korban, t'ada apa; ttapi barang-siapa yang bersumpah dmi korban yang di atas-nya, dia-lah kna tanggong.'

19Buta kamu: kerna yang mana lbeh bsar? itu korban-kah, atau itu tmpat korban yang suchikan itu korban?

20Sbab itu orang yang bersumpah dmi tmpat korban, dia bersumpah dmi itu tmpat, sama smoa yang ada di atas-nya.

21Dan orang yang bersumpah dmi ka'abah, dia bersumpah dmi ka'abah juga, dan dmi dia yang tinggal dalam-nya.

22Dan orang yang bersumpah dmi shorga, dia bersumpah dmi takhta Allah, dan dmi dia yang dudok di atas takhta.

23"Susah-lah kamu, hei orang pnulis dan orang Farisi, orang pura-pura! kerna kamu kasi s-puloh satu deri-pada slaseh dan adas manis dan jintan, ttapi perkara-perkara dalam taurit yang lbeh brat punya, sperti hukum yang adil dan ksian dan perchaya, kamu tinggalkan: ttapi ini smoa-lah kamu sudah patut buat, dan yang lain itu ta'patut tinggalkan.

24Hei pmimpin yang buta, yang tapis nyamok, ttapi tlan onta.

25"Susah-lah kamu, hei orang pnulis dan orang Farisi, orang pura-pura! kerna kamu bersehkan mangkok dan pinggan punya sblah luar, ttapi di dalam-nya pnoh dngan rampasan dan glojoh.

26Hei orang Farisi yang buta, mula-mula bersehkan sblah dalam pinggan-mangkok, spaya dia punya luar pun boleh jadi berseh.

27"Susah-lah kamu, hei orang pnulis dan orang Farisi, orang pura-pura! kerna kamu sperti kubor yang sapu kapur puteh, luar nampak chantek, ttapi dalam-nya pnoh dngan tulang orang mati dan sgala najis.

28Bgitu-lah juga kamu pun di luar nampak bnar pada orang, ttapi di dalam kamu ada pnoh dngan pura-pura dan kjahatan.

29"Susah-lah kamu, hei orang pnulis dan orang Farisi, orang pura-pura! kerna kamu naikkan nabi-nabi punya kubor, dan chantekkan orang-orang bnar punya kramat,

30dan kamu kata, 'Katakan kita sudah hidop pada jman nenek-moyang kita, tntu kita t'ada turut dia-orang tumpahkan darah nabi-nabi.'

31Deri ini kamu bersaksi atas kamu punya diri, yang kamu-lah anak-chuchu orang-orang yang sudah bunoh nabi-nabi itu.

32Pnohkan-lah sukatan nenek-moyang kamu.

33Hei ular, hei bangsa ular yang bisa, bagimana boleh kamu dapat lpas deri-pada hukuman jhannam?

34Sbab itu, ingat, sahya nanti hantarkan k-pada kamu nabi-nabi, dan orang bijaksana, dan orang pnulis pun: dan sparoh kamu nanti bunoh dan salibkan; dan sparoh kamu nanti ssahkan dalam kamu punya rumah smbahyang, dan aniayakan deri satu negri sampai lain negri:

35spaya kamu ini boleh tanggong sgala orang bnar punya darah yang sudah di-tumpahkan atas bumi, mula'i deri-pada darah Habil orang yang bnar itu, sampai darah Zakaria anak Barakhia, yang kamu sudah bunoh di antara ka'abah dan tmpat korban.

36Dngan sunggoh sahya kata sama kamu, smoa ini perkara nanti datang atas ini jman punya orang.

37"Hei Yerusalim, Yerusalim, yang bunoh nabi-nabi,dan hntam batu sama orang yang di-hantarkan k-pada-mu! brapa kali sahya sudah mau kampongkan angkau punya anak-anak, sperti satu ekor ibu ayam kampongkan anak-anak-nya di bawah kpak, ttapi kamu ta'mau!

38Tengok-lah, rumah kamu nanti di-tinggalkan sunyi k-pada kamu.

39Kerna dngan sunggoh sahya kata sama kamu, deri-pada ini ktika skali-kali kamu t'ada nanti tengok sama sahya s-blum kamu nanti kata, 'Berkat-lah dia yang datang dalam nama Tuhan.'"


  Share Facebook  |  Share Twitter

 <<  Matius 23 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel