1Kmdian Roh bawa Isa pergi tanah sunyi, spaya kna choba oleh iblis.
2Dan bila dia sudah puasa ampat-puloh hari dan ampat-puloh malam, dia naik lapar.
3Dan pnchoba itu datang, dan kata sama dia, "Jikalau angkau Anak Allah, suroh-lah ini batu-batu jadi roti."
4Ttapi Isa jawab dan kata, "Ada tersurat, 'Bukan-nya dngan makan roti saja manusia nanti hidop, ttapi dngan tiap-tiap perkata'an yang kluar deri-pada mulut Allah.'"
5Habis itu, iblis bawa dia pergi negri suchi; dan kasi dia berdiri di atas ka'abah punya kmunchak,
6dan kata sama dia, "Jikalau angkau Anak Allah, terjun bawah: kerna ada tersurat, 'Dia nanti kasi dia punya mla'ikat psanan deri-hal angkau: Dan di atas tangan-nya dia-orang nanti tatang sama angkau, Spaya kaki angkau jangan terantok batu.'"
7Isa kata sama dia, "Ada tersurat pula, 'Jangan-lah angkau choba sama Allah, angkau punya Tuhan.'"
8Dan lagi pula, iblis bawa dia pergi atas satu gunong yang tinggi skali, dan tunjokkan sama dia sgala kraja'an dunia, dngan kmulia'an-nya,
9dan kata sama dia, "Jikalau angkau berlutut dan smbah sama sahya, smoa ini perkara sahya nanti kasi sama angkau."
10Habis itu, Isa kata sama dia, "Pergi-lah deri sini, hei Setan: kerna ada tersurat, 'Smbah-lah sama Allah, angkau punya Tuhan, dan chuma sama dia saja buat smbahyang.'"
11Habis itu, iblis undor deri-pada dia; dan ada brapa mla'ikat datang mlayan sama dia.
12Bila Isa dngar Yahya sudah di-srahkan, dia undor masok Galil:
13dan dia tinggalkan negri Nasarat, dan pergi tinggal di Kafarnahum, di tpi tasek dalam smpadan Zabulun dan Naftali:
14spaya bnarkan perkata'an yang nabi Yash'aya sudah kata,
15"Tanah Zabulun dan tanah Naftali, Yang di sblah tasek di sbrang Yordan, Bangsa-asing punya Galil,
16Itu bangsa yang dudok dalam glap Sudah nampak trang yang bsar, Dan k-pada orang yang dudok dalam tanah dan bayang-bayang kmatian, K-pada dia-orang-lah trang sudah terkluar."
17Deri itu waktu Isa mula'i ajar orang, dan kata, "Bertobat-lah kamu; kerna kraja'an shorga sudah dkat."
18Ktika Isa berjalan di tpi tasek Galil, dia tengok dua adek-beradek, Simon yang berglar Petrus sama adek-nya Andrias, buang jala dalam tasek itu; kerna dua-dua itu, orang tangkap ikan.
19Dan Isa kata sama dia-orang, "Mari-lah ikut sama sahya, dan sahya nanti jadikan kamu orang tangkap manusia."
20Dan itu juga dia-orang tinggalkan jala-jaring-nya dan ikut sama dia.
21Dan Isa berjalan lagi deri sana, dan tengok lain dua adek-beradek, Yakob anak Zabdi sama sudara-nya Yahya, dalam prahu sama-sama bapa-nya Zabdi, s-tngah dia-orang ada btulkan jala-jaring-nya; dan Isa panggil dia-orang.
22Dan itu juga dia-orang tinggalkan prahu dan bapa-nya, dan ikut sama dia.
23Dan Isa berjalan sini-sana dalam sluroh tanah Galil, dan ajar dalam dia-orang punya tmpat smbahyang, dan khabarkan Injil kraja'an, dan smbohkan macham-macham pnyakit dan macham-macham ksakitan antara itu bangsa.
24Dan dia punya khabar sudah pchah sluroh tanah Suriah: dan orang bawa sama dia sgala orang sakit, yang kna macham-macham punya pnyakit dan sngsara, dan orang yang kna jin, dan orang gila, dan orang tepok; dan dia smbohkan dia-orang.
25Dan banyak skali orang ikut-ikut dia, deri Galil, dan Dkapolis, dan Yerusalim, dan Yahudiah, dan deri sbrang sungai Yordan.