Alkitab Mobile SABDA
[VER] : [BABA]     [PL]  [PB] 
 <<  Matius 6 >> 

1"Ingat baik-baik spaya jangan kamu buat kamu punya kbaikan dpan orang, mau kasi orang tengok: kalau bgitu kamu t'ada ada pahala sama Bapa kamu yang di shorga.

2"Sbab itu bila angkau kasi sdkah, jangan-lah tiop trompet di dpan angkau, sperti orang pura-pura buat dalam rumah smbahyang dan di jalan-jalan, spaya orang boleh puji. Dngan sunggoh sahya kata sama kamu, itu orang smoa sudah trima dia-orang punya pahala.

3Ttapi bila angkau ini kasi sdkah, jangan-lah kasi angkau punya tangan kiri tahu apa yang tangan kanan buat:

4spaya angkau punya sdkah dalam smbunyi: dan angkau punya Bapa yang lihat dalam smbunyi nanti balas sama angkau.

5"Dan bila kamu minta do'a, jangan-lah kamu sperti orang pura-pura: kerna dia-orang suka berdiri minta do'a dalam rumah smbahyang dan di sempang-sempang jalan, spaya orang boleh tengok. Dngan sunggoh sahya kata sama kamu, itu orang smoa sudah trima dia-orang punya pahala.

6Ttapi angkau ini bila angkau minta do'a, masok-lah dalam angkau punya bilek, dan bila sudah tutop pintu, minta-lah do'a sama Bapa angkau yang dalam smbunyi, dan Bapa angkau yang lihat dalam smbunyi nanti balas sama angkau.

7Dan bila minta do'a, jangan balek-balek kata itu juga, sperti adat orang bangsa-asing: kerna dia-orang sangka yang dia nanti di-dngarkan sbab banyak chakap-nya.

8Sbab itu jangan-lah jadi sperti dia-orang: kerna Bapa kamu tahu apa-apa yang berguna sama kamu s-blum kamu minta sama dia.

9Sbab itu biar-lah kamu minta do'a bgini: 'Ya Bapa kami yang di shorga, biar-lah nama-mu di-kuduskan.

10Datang-lah kraja'an-mu. Jadi-lah kahandak-mu, sperti di shorga bgitu juga di atas bumi.

11Bri-lah sama kami ini hari makanan kami yang s-hari-s-hari.

12Dan ampunkan-lah hutang-hutang kami, sperti kami sudah ampunkan orang yang berhutang sama kami.

13Jangan-lah bawa kami masok dalam pnchoba'an, ttapi lpaskan-lah kami deri-pada yang jahat.'

14Kerna jikalau kamu ampunkan orang punya ksalahan, tntu-lah Bapa kamu yang di shorga nanti ampunkan kamu pun.

15Ttapi jikalau kamu t'ada ampunkan orang punya ksalahan, Bapa kamu pun t'ada nanti ampunkan kamu punya ksalahan.

16"Dan bila kamu puasa, jangan bsukan muka, sperti orang pura-pura: kerna dia-orang ubahkan dia-orang punya rupa muka, spaya orang boleh tengok yang dia-orang ada puasa. Dngan sunggoh sahya kata sama kamu, itu orang smoa sudah trima dia-orang punya pahala.

17Ttapi angkau, bila angkau puasa, pakai minyak atas kpala angkau, dan bersehkan angkau punya muka;

18spaya jangan orang tengok angkau puasa, chuma Bapa angkau yang dalam smbunyi: dan Bapa angkau yang lihat dalam smbunyi nanti balas sama angkau.

19"Jangan-lah kamu simpan kerna diri kamu herta-bnda di atas bumi, di mana ggat dan karat rosakkan, dan di mana pnchuri boleh tmbus masok dan churi:

20ttapi biar-lah kamu simpan herta-bnda dalam shorga, di mana baik ggat atau karat pun t'ada rosakkan, dan di mana pnchuri t'ada tmbus atau churi:

21kerna di mana ada angkau punya herta, di situ-lah ada angkau punya hati.

22Mata itu badan punya plita: jadi jikalau angkau punya mata ada btul, satu badan angkau pun ada trang.

23Ttapi jikalau angkau punya mata ada jahat, satu badan angkau pun ada glap. Sbab itu jikalau itu trang yang dalam angkau punya diri jadi glap, brapa bsar punya kglapan itu!

24Satu orang pun ta'boleh jadi dua tuan punya hamba: kerna dia nanti bnchi satu dan kaseh yang lain; atau dia nanti pegang sama satu dan kurang hormatkan yang lain. Kamu t'ada boleh jadi hamba Allah dan hamba kkaya'an dunia pun.

25Sbab itu sahya kata sama kamu, jangan-lah jadi khuatir deri-hal kamu punya nyawa, apa-kah yang kamu nanti makan, atau apa-kah yang kamu nanti minum: atau deri-hal kamu badan pun, apa-kah yang kamu nanti pakai. Bukan-kah nyawa lbeh deri-pada makanan, dan badan lbeh deri-pada pakaian?

26Tengok-lah itu burong-burong di langit, itu smoa t'ada mnabur, t'ada mnuai, dan t'ada kumpolkan apa-apa dalam gudang; ttapi Bapa kamu yang di shorga kasi dia makan. Bukan-kah kamu lbeh indah deri-pada burong-burong?

27Dan siapa-kah antara kamu dngan khuatir-nya boleh lanjutkan umor-nya sikit pun?

28Dan knapa-kah kamu khuatir deri-hal pakaian? Blajar-lah deri-pada bunga bakong di padang, bagimana dia bertumboh; t'ada dia kerja, t'ada dia pintal bnang;

29ttapi sahya kata sama kamu, mski pun Sulaiman dalam smoa dia punya kmulia'an t'ada berrias sperti satu kuntom bunga itu.

30Ttapi jikalau bgini Allah riaskan rumput di padang, yang ini hari ada, dan besok kna buang dalam dapur, t'ada-kah lbeh lagi Allah nanti kasi pakaian sama kamu pun, hei kamu yang kurang perchaya?

31Sbab itu jangan-lah jadi khuatir, dan kata, 'Apa-kah kita nanti makan?' atau, 'Apa-kah kita nanti minum?' atau, 'Apa-kah kita nanti pakai?'

32Kerna smoa ini perkara sgala orang bangsa-asing ada chari: kerna Bapa kamu yang di shorga tahu yang ini smoa ada berguna sama kamu.

33Ttapi chari-lah dhulu dia punya kraja'an dan kbnaran; dan smoa ini perkara nanti di-tambahkan k-pada kamu.

34Sbab itu jangan-lah jadi khuatir deri-hal besok: sbab besok nanti ada besok punya khuatir. Chukop k-pada tiap-tiap hari itu hari sndiri punya jahat.


  Share Facebook  |  Share Twitter

 <<  Matius 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel