Dual Panel1Dan dia naik prahu dan pergi sbrang, dan masok dia punya negri sndiri.
2Dan ada orang bawa sama dia satu orang yang sakit tepok, terbaring di atas tmpat tidor: dan bila Isa lihat dia-orang punya perchaya, dia kata sama orang yang sakit tepok itu, "Ttapkan-lah hati angkau, hei anak; dosa-dosa angkau sudah di-ampunkan."
3Dan di situ ada orang-orang pnulis yang kata dalam diri-nya, "Ini orang ada mnghujat."
4Isa tahu dia-orang punya fikiran, dan dia kata, "Knapa kamu fikir jahat dalam hati kamu?
5Kerna mana-kah yang lbeh snang, kata, 'Dosa-dosa kamu sudah di-ampunkan:' atau kata, 'Bangun-lah berjalan'?
6Ttapi spaya kamu boleh tahu yang Anak-manusia ada kuasa di atas bumi ampunkan dosa (habis itu dia kata sama orang yang sakit tepok pula) bangun-lah angkau, angkat angkau punya tmpat tidor, dan pulang rumah."
7Itu orang bangun, dan pulang rumah.
8Bila orang-banyak tengok ini, dia-orang jadi takot, dan muliakan Allah yang sudah kasi itu macham punya kuasa sama manusia.
9Dan waktu Isa berjalan deri situ, dia tengok satu orang bernama Matius, dudok di tmpat orang bayer chukai: dan Isa kata sama dia, "Ikut-lah sama sahya." Dan dia bangun ikut sama Isa.
10Bila Isa dudok makan dalam rumah, banyak orang yang pungut chukai dan orang berdosa pun datang dudok makan juga sama-sama Isa dan murid-murid-nya.
11Dan bila orang Farisi tengok itu hal, dia-orang kata sama dia punya murid-murid, "Knapa kamu punya guru makan sama-sama orang pungut chukai dan orang berdosa pun?"
12Ttapi bila Isa dngar itu, dia kata "Doktor itu berguna bukan-nya sama orang yang sehat, ttapi sama orang yang sakit.
13Ttapi pergi kamu blajar apa arti-nya ini perkata'an, 'Sahya mau ksian bukan-nya korban:' kerna sahya datang bukan-nya mau panggil orang yang bnar, ttapi orang yang berdosa."
14Dan itu waktu Yahya punya murid-murid pula datang kata sama Isa, "Knapa kita sama orang Farisi krap kali puasa, ttapi tuan punya murid-murid t'ada puasa?"
15Dan Isa kata sama dia orang "Boleh-kah satu kmantin jantan punya sohbat-sohbat susah hati s-lama-nya kmantin jantan ada sama-sama dia-orang? ttapi ada hari-nya nanti datang bila kmantin jantan itu nanti kna ambil deri-pada dia-orang, bharu-lah dia-orang nanti puasa.
16Dan t'ada orang tampalkan kain bharu atas kain-baju yang lama; kerna kain-tampal itu tarek deri-pada kain baju itu, dan jadi lbeh bsar punya rabek.
17Lagi pun orang bukan taroh ayer-anggor bharu dalam botol-kulit yang lama: kalau bgitu kulit pun pchah, ayer-anggor pun tumpah, dan kulit pun binasa: ttapi orang taroh ayer-anggor bharu dalam kulit bharu, bharu-lah dua-dua pun slamat."
18S-tngah Isa kata ini smoa sama dia-orang, ada satu orang pnghulu datang berlutut sama dia, dan kata, "Sahya punya anak prempuan bharu ini mati: ttapi mari-lah guru taroh tangan atas dia, dan dia nanti hidop."
19Isa bangun ikut sama dia, dngan dia punya murid-murid.
20Dan ada satu prempuan yang sakit tumpah-tumpah darah sudah dua-blas tahun punya lama datang deri blakang jamah Isa punya kaki baju:
21kerna itu prempuan kata sama diri-nya sndiri, "Jikalau sahya chuma dapat jamah baju-nya saja, sahya nanti baik."
22Ttapi bila Isa sudah balek blakang tengok itu prempuan, dia kata, "Hei anak prempuan, ttapkan-lah angkau punya hati; angkau punya perchaya sudah slamatkan angkau." Dan deri itu jam juga itu prempuan sudah baik.
23Dan bila Isa sudah masok itu pnghulu punya rumah, dan tengok orang yang tiop srunai, dan orang-banyak buat gadoh,
24dia kata, "Lalu: kerna ini budak prempuan bukan mati, dia chuma tidor." Dan dia-orang tertawakan dia.
25Ttapi bila orang-banyak sudah kna halau kluar, Isa masok dalam, dan pegang itu budak punya tangan; dana budak itu bangun.
26Dan ini khabar pchah sluroh itu tanah.
27Dan waktu Isa lalu deri sana, dua orang buta ikut sama dia, bertriak-triak kata, "Hei anak Da'ud, ksiankan-lah kita."
28Bila Isa sudah masok dalam rumah, itu orang buta datang sama dia, dan dia kata sama dia-orang, "Ada-kah kamu perchaya yang sahya ada kuasa boleh buat ini?" Dia-orang kata sama dia, Perchaya, Tuhan."
29Habis itu, dia jamah itu dua orang punya mata, dan kata, "Jadi-lah sama kamu sperti kamu punya perchaya."
30Dan chlek-lah mata dia-orang. Dan Isa larangkan dia-orang baik-baik, dan kata, "Tengok, jangan kasi satu orang pun tahu."
31Ttapi dia-orang kluar, dan khabarkan dia dalam smoa itu tanah.
32Dan s-tngah dia-orang kluar, ada orang bawa sama Isa satu orang bisu yang terkna jin.
33Dan bila itu jin sudah kna buang, orang bisu itu berchakap; dan orang-orang-banyak naik hairan, dan kata, "Dalam Isra'el blum pernah orang tengok bgini."
34Ttapi orang Farisi pula kata, "Dia buangkan jin oleh kuasa kpala jin."
35Dan Isa berjalan sini-sana dalam smoa negri dan kampong-kampong mngajar dalam rumah smbahyang-nya, khabarkan injil kraja'an, dan smbohkan macham-macham pnyakit dan klmahan.
36Ttapi bila dia tengok orang-orang-banyak itu, dia rasa ksian kerna dia-orang, sbab dia-orang susah dan bertaburan, sperti kambing yang t'ada gombala-nya.
37Itu waktu dia kata sama dia punya murid-murid, "Tuaian-nya btul banyak, ttapi orang yang mnuai chuma sdikit saja.
38Sbab itu minta-lah do'a sama itu tuaian punya tuan, spaya dia boleh suroh orang pergi mnuai di tmpat tuaian-nya."