Alkitab Mobile SABDA
[VER] : [BABA]     [PL]  [PB] 
 <<  Markus 10 >> 

1Dan Isa berjalan deri situ, dan sampai jajahan Yahudiah, dan sbrang sungai Yordan: dan banyak orang berhimpon datang sama dia lagi skali; dan lagi skali sperti biasa-nya dia ajar sama dia-orang.

2Orang Farisi datang sama dia, dan tanya, sbab mau choba sama dia, "Ada-kah halal orang chraikan bini-nya?"

3Dan dia jawab kata sama dia-orang, "Apa-kah Musa sudah psan sama kamu?"

4Dia-orang kata, "Musa biarkan orang tulis surat chraian, dan chraikan dia."

5Ttapi Isa kata sama dia-orang, "Deri sbab kamu punya kras-hati Musa sudah tuliskan ini hukum kerna kamu.

6Ttapi deri mula-mula kjadian dia sudah jadikan dia-orang dlaki sama prempuan.

7Kerna ini sbab-lah orang nanti tinggalkan mak-bapa-nya, dan berhubong sama bini-nya;

8dan dua-dua itu nanti jadi satu badan: jadi itu, t'ada lagi dia-orang dua orang, ttapi satu badan.

9Sbab itu apa-apa yang Allah sudah jodohkan, jangan manusia asingkan."

10Dan bila di dalam rumah, murid-murid tanya sama dia deri-hal ini.

11Dan dia kata sama dia-orang, "Barang-siapa yang chraikan dia punya bini, dan berbini sama lain orang, dia itu berbuat zina atas bini-nya:

12dan jikalau itu prempuan sndiri pula chraikan laki-nya, dan berlaki sama orang lain, dia pun berbuat zina juga."

13Dan orang bawa sama dia budak-budak kchil, spaya dia boleh jamah sama dia-orang: dan murid-murid tgurkan itu orang.

14Ttapi bila Isa tengok, dia rasa marah, dan kata sama dia-orang, "Biarkan itu budak-budak datang sama sahya; jangan larangkan: kerna bgitu-lah kraja'an Allah punya orang.

15Dngan sunggoh sahya kata sama kamu, barang-siapa t'ada trima kraja'an Allah sperti satu budak kchil, t'ada skali-kali nanti dia masok dalam-nya."

16Dan Isa dokong budak-budak itu, dan berkatkan dia-orang serta taroh tangan atas-nya.

17Bila Isa kluar mau berjalan, ada satu orang lari datang berlutut sama dia, dan tanya sama dia, "Hei guru yang baik, apa-kah sahya msti buat spaya dapat hidop yang kkal jadi psaka?"

18Dan Isa kata sama dia, "Knapa angkau triak sahya 'baik'? t'ada satu orang pun 'baik' chuma satu saja, ia'itu Allah.

19Angkau tahu itu hukum-hukum, 'Jangan bunoh orang, jangan buat zina, jangan churi, jangan jadi saksi bohong, jangan tipu orang, dan hormatkan angkau punya mak-bapa.'"

20Dia itu kata sama Isa, "Guru, smoa ini sahya sudah turut deri sahya kchil."

21Isa pandang sama dia, dan kaseh sama dia, dan kata, "Satu perkara angkau ada kurang: pergi jualkan apa-apa yang angkau ada, kasi sama orang miskin, dan angkau nanti dapat herta-bnda di shorga: kmdian mari ikut sama sahya."

22Ttapi itu orang punya muka morong sbab ini chakap, dan dia pergi dngan susah-hati: kerna dia satu orang yang ada banyak herta.

23Isa tengok kliling, dan kata sama murid-murid-nya, "Brapa susah orang yang ada wang masok kraja'an Allah."

24Dan murid-murid naik hairan sbab dia punya perkata'an. Ttapi Isa jawab lagi skali, kata sama dia-orang, "Hei anak-anak, brapa susah orang yang bergantong sama wang masok kraja'an Allah.

25Lbeh snang satu onta tmbus lobang jarom deri-pada orang kaya masok kraja'an Allah."

26Dia-orang smoa jadi terlalu banyak hairan, dan kata sama dia, "Kalau bgitu, siapa pula boleh dapat slamat?"

27Isa pandang sama dia-orang, dan kata, "Sama manusia ini perkara ta'boleh jadi, ttapi bukan sama Allah: kerna sama Allah sgala perkara boleh jadi."

28Petrus mula'i kata sama Isa, "Kita ini-lah sudah tinggalkan smoa skali, dan ikut sama Tuhan."

29Isa kata, "Dngan sunggoh sahya kata sama kamu, t'ada satu orang pun yang sudah tinggalkan rumah-tangga, atau sudara dlaki, atau sudara prempuan, atau mak, atau bapa, atau anak, atau tanah, kerna sahya dan injil punya sbab,

30yang t'ada nanti trima skarang juga pada waktu ini s-ratus kali ganda punya rumah-tangga, dan sudara dlaki, dan sudara prempuan, dan mak, dan anak, dan tanah, sama-sama kna aniaya; serta trima hidop yang kkal dalam jman yang mndatang.

31Ttapi banyak orang yang mula-mula nanti jadi yang blakang skali; dan yang blakang skali nanti jadi yang mula-mula."

32Dan dia-orang smoa ada berjalan pergi Yerusalim; dan Isa jalan lbeh dhulu dia-orang: dan dia-orang terchngang; dan orang yang ikut pun naik takot. Dan lagi skali Isa ambil sama dia itu dua-blas murid-murid, dan mula'i katakan dia-orang apa-apa yang nanti jadi sama diri-nya.

33"Ingat, kita ini ada berjalan naik Yerusalim; dan Anak-manusia nanti di-srahkan k-pada kpala-kpala imam sama orang pnulis; dia-orang nanti ltakkan hukum mati atas dia, dan nanti srahkan dia sama orang bangsa-asing:

34dan ini orang-orang nanti olok-olokkan sama dia, dan ludahkan dia, dan ssahkan dia, dan bunoh dia, dan tiga hari kmdian dia nanti bangkit s-mula."

35Yakob sama Yahya, anak-anak Zabdi, datang kata sama dia, "Guru, kita suka guru buat kerna kita apa-apa kita minta."

36Dan dia kata sama dia-orang, "Apa-kah kamu suka sahya buat kerna kamu?"

37Dia-orang kata sama dia, "Kasi kita dudok satu sblah kanan dan satu sblah kiri, dalam guru punya kmulia'an."

38Ttapi Isa kata sama dia-orang, "Kamu ta'tahu apa kamu ada minta. Boleh-kah kamu minum deri mangkok yang sahya ini minum, dan di-baptiskan dngan baptisan yang sahya ini nanti di-baptiskan?"

39Dia-orang kata sama dia, "Boleh." Dan Isa kata sama dia-orang, "Itu mangkok yang sahya ini minum, kamu pun nanti minum; dan dngan baptisan yang sahya nanti di-baptiskan, kamu pun nanti di-baptiskan juga:

40ttapi fasal dudok di sblah kanan dan di sblah kiri sahya, itu bukan atas sahya yang kasi: chuma sama orang-orang yang kerna-nya itu sudah di-sdiakan."

41Bila yang s-puloh itu dngar, dia-orang mula'i mrasa marah deri-hal Yakob sama Yahya.

42Ttapi Isa panggil dia-orang, dan kata sama dia-orang, "Kamu smoa tahu yang orang yang di-bilangkan pnghulu bangsa asing pegang prentah atas dia-orang, dan orang bsar-bsar-nya pegang kuasa atas-nya.

43Ttapi antara kamu bukan-nya bgitu: ttapi barang-siapa yang mau mnjadi bsar antara kamu msti mnjadi kamu punya playan:

44dan barang-siapa mau mnjadi kpala antara kamu msti jadi smoa punya hamba.

45Sbab Anak-manusia pun sudah datang bukan-nya mau di-layankan oleh orang, ttapi spaya boleh layankan sama orang, dan kasi nyawa-nya mnjadi tbusan kerna orang banyak."

46Dia-orang sampai di Yeriko: dan s-tngah Isa kluar deri Yeriko, sama-sama murid-murid-nya dan terlalu banyak orang, anak si Tima'i, Bar-Tima'i nama-nya, satu orang buta yang minta sdkah, ada dudok di tpi jalan.

47Dan bila dia ini dngar yang itu-lah Isa orang Nasarat, dia mula'i bertriak-triak, kata "Ya Isa, ya anak Da'ud, ksiankan sahya."

48Dan banyak orang tgurkan dia, suroh diam, ttapi mingkin lbeh dia bertriak-triak, "Ya anak Da'ud, ksiankan sahya."

49Isa brenti dan kata, "Panggil sama dia." Dan dia-orang panggilkan itu orang buta, dan kata sama dia, "Ttapkan angkau punya hati, bangun, dia ada panggil."

50Dan dia buangkan baju-nya, dan bangun datang sama Isa.

51Dan Isa jawab, kata sama dia, "Apa-kah angkau mau sahya buat sama angkau?" Itu orang buta kata sama dia, "Hei guru bsar, biar-lah mata sahya chlek."

52Dan Isa kata sama dia, "Pergi-lah; angkau punya perchaya sudah kasi angkau baik." Dan itu juga dia boleh nampak, dan ikut berjalan sama Isa.


  Share Facebook  |  Share Twitter

 <<  Markus 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran