Alkitab Mobile SABDA
[VER] : [BABA]     [PL]  [PB] 
 <<  Markus 8 >> 

1Dan itu ktika ada lagi skali satu kumpolan orang-banyak, dan sbab t'ada apa-apa mau makan, Isa panggil murid-murid-nya, dan kata sama dia-orang,

2"Sahya rasa ksian sama ini orang-banyak, sbab sudah tiga hari dia-orang sama-sama sahya, dan t'ada apa-apa mau makan:

3dan kalau sahya lpaskan dia-orang dngan lapar, dia-orang boleh pengsan di tngah jalan; dan yang ada datang deri jauh."

4Murid-murid-nya jawab sama dia, "Deri mana boleh knnyangkan ini smoa dngan roti di tmpat sunyi?"

5Isa tanya sama dia-orang, "Brapa biji roti kamu ada?" Dia-orang kata, "Ada tujoh biji."

6Dan Isa suroh orang-banyak dudok di tanah: dan dia ambil itu tujoh biji punya roti, dan bila sudah mnguchap shukor, dia pchahkan, dan bhagikan sama murid-murid, spaya dia-orang boleh ltakkan; dan dia-orang ltakkan di dpan orang-banyak.

7Lagi pun dia-orang ada sdikit punya ikan kchil-kchil: dan bila sudah berkatkan, ini pun dia suroh ltakkan.

8Smoa-nya makan sampai knnyang: dan orang pungut sisa-sisa, ada tujoh kranjang punya pnoh.

9Ada lbeh kurang ampat-ribu orang: dan Isa lpaskan dia orang.

10Itu juga dia naik prahu sama murid-murid-nya, dan pergi di jajahan Dalmanutah.

11Dan orang Farisi kluar dan mula'i berbantah sama Isa, minta sama dia satu tanda deri langit, mau choba sama dia.

12Dan dalam roh-nya Isa mngrang, dan kata, "Knapa ini jman punya orang mau chari tanda? dngan sunggoh sahya kata sama kamu, t'ada satu tanda pun nanti di-brikan k-pada jman ini."

13Isa tinggalkan dia-orang, dan lagi satu kali naik prahu pergi sbrang.

14Dia-orang sudah terlupa bawa roti; dan t'ada sama dia-orang dalam prahu chuma s-biji saja.

15Dan Isa psan dan kata sama dia-orang, "Ingat baik-baik, jaga sama ragi orang Farisi dan ragi orang Herodis."

16Dan dia-orang berbichara satu sama lain, kata, "Kita t'ada bawa roti."

17Isa tahu ini, dan kata sama dia-orang, "Knapa kamu berbichara sbab kamu t'ada roti? blum-kah kamu tahu, dan blum-kah kamu mngerti? ada-kah kamu punya hati kras?

18Ada mata, t'ada-kah kamu tengok? ada kuping, t'ada-kah kamu dngar? dan t'ada-kah kamu ingat pun?

19Bila sahya pchahkan roti yang lima biji itu antara lima-ribu orang, brapa bakul pnoh punya sisa-sisa kamu sudah angkat?" Dia-orang kata sama dia, "Dua-blas bakul."

20"Dan ktika yang tujoh biji antara ampat-ribu orang itu pula, brapa kranjang pnoh punya sisa-sisa kamu sudah angkat?" Dia-orang kata sama dia, "Tujoh kranjang."

21Dan Isa kata sama dia-orang, "Blum-kah kamu mngerti?"

22Dan dia-orang sampai di negri Bait-Saida, dan orang bawa sama Isa satu orang buta, dan minta dia jamah itu orang.

23Dan Isa pegang itu orang buta punya tangan, dan bawa dia kluar kampong; dan bila dia sudah ludah di mata-nya dan taroh tangan atas dia, dia tanya itu orang buta, "Ada-kah angkau nampak apa-apa?"

24Itu orang angkat mata-nya, dan kata, "Sahya nampak orang; sbab sahya tengok dia berjalan-jalan sperti pokok."

25Kmdian lagi satu kali Isa taroh tangan atas dia punya mata; dan dia mrnong, dan dia jadi baik, dan boleh tengok smoa barang dngan trang.

26Isa suroh dia pulang rumah, dan kata, "Jangan masok kampong pun."

27Dan Isa kluar sama-sama murid-murid-nya pergi di kampong-kampong Kaisariah-Filipi: dan di tngah jalan dia tanya sama murid-murid-nya, dan kata sama dia-orang, "Orang katakan sahya ini siapa?"

28Dan dia-orang bilang sama dia, kata, "Yahya Pmbaptis: dan lain orang kata, 'Ilia;' ttapi ada yang lain pula kata, 'Satu deri antara nabi-nabi.'"

29Dan Isa tanya sama dia-orang, "Ttapi kamu pula kata sahya ini siapa?" Dan Petrus jawab kata sama dia, "Tuhan-lah Almaseh."

30Dan Isa psan sama murid-murid jangan dia-orang kata sama satu orang fasal dia.

31Kmdian dia mula'i ajar dia-orang bagimana yang Anak-manusia itu msti tanggong banyak sngsara, dan msti kna tolak oleh ktua-ktua, dan kpala-kpala imam sama orang pnulis, dan msti kna bunoh, dan bangkit s-mula tiga hari kmdian.

32Ini chakap dia kata nyata-nyata. Jadi Petrus bawa Isa sama dia, dan mula'i tgurkan dia.

33Ttapi Isa berbalek, dan pandang sama murid-murid-nya, dan dia tgurkan Petrus, dan kata, "Pergi blakang sahya, hei Setan: kerna angkau ingat bukan Allah punya fasal, ttapi manusia punya fasal."

34Dan dia panggil smoa orang-banyak itu dngan murid-murid-nya, dan dia kata sama dia-orang, "Jikalau satu orang mau ikut dkat sahya, biar-lah dia sangkalkan diri-nya, dan pikul salib-nya, dan ikut sama sahya.

35Kerna barang-siapa mau slamatkan nyawa-nya, dia nanti hilang itu nyawa; dan barang-siapa nanti hilang nyawa-nya kerna sahya punya sbab dan kerna injil, dia nanti slamatkan itu.

36Kerna apa-kah untong sama satu orang kalau dia dapat satu dunia ini jadi dia punya, ttapi rugi nyawa-nya?

37Kerna apa-kah orang boleh kasi mau gantikan dia punya nyawa?

38Kerna barang-siapa jadi malu sama sahya dan sahya punya perkata'an dalam ini jman orang yang berzina dan berdosa, Anak-manusia pun nanti malu sama dia, waktu dia datang dngan Bapa-nya punya kmulia'an sama-sama mla'ikat yang suchi."


  Share Facebook  |  Share Twitter

 <<  Markus 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel