Dual Panel1dan dia berdiri di pasir tpi laut. Dan sahya tengok satu binatang buas kluar deri dalam laut, yang ada tandok s-puloh dan kpala tujoh, dan atas dia punya tandok ada s-puloh makota, dan atas dia punya kpala ada nama-nama hujat.
2Dan binatang yang sahya tengok itu, rupa-nya sperti harimau akar, dan dia punya kaki sperti kaki bruang, dan dia punya mulut sperti mulut singa: dan itu naga kasi dia punya kkuatan sama dia, dan dia punya takhta, dan kuasa yang bsar.
3Dan sahya tengok satu kpala-nya sperti sudah kna parang sampai mau mati; ttapi dia punya luka yang parah itu sudah di-smbohkan: dan sgala isi bumi ikut binatang dngan hairan;
4dan dia-orang smbah sama itu naga, sbab dia sudah kasi dia punya kuasa k-pada itu binatang; dan dia-orang smbah sama itu binatang pun, dan kata, "Siapa-kah yang sama sperti itu binatang? dan siapa-kah yang boleh prang sama dia?"
5dan itu binatang sudah di-bri satu mulut yang chakap perkara yang bsar-bsar dan hujat; dan dia sudah di-bri kuasa buat dia punya kahandak ampat-puloh-dua bulan.
6Dan dia buka mulut mnghujat sama Allah, sampaikan dia mnghujat Allah punya nama, dan tmpat-tinggal, ia'itu orang-orang yang tinggal di shorga.
7Dan sudah di-bri k-pada dia boleh prang sama orang-orang kudus, dan kalahkan dia-orang: dan di-bri kuasa pula atas sgala suku dan kaum dan bhasa dan bangsa.
8Dan smoa orang yang tinggal di bumi nanti smbah sama dia, smoa yang nama-nya t'ada tertulis dalam buku hidop Anak-domba yang sudah kna smbleh deri-pada waktu dunia sudah di-jadikan.
9Jikalau barang-siapa ada kuping, biar dia dngar.
10Jikalau siapa-siapa patut kna tawan, nanti juga dia kna tawan: jikalau siapa-siapa bunoh orang dngan pdang, dngan pdang juga dia pun msti kna bunoh. Di sini-lah ada orang-orang-kudus punya sabar dan perchaya.
11Dan sahya tengok lagi satu ekor binatang buas kluar deri dalam bumi; dan dia ada dua tandok sperti satu anak-domba, dan dia chakap sperti satu naga.
12Dan dia jalankan sgala kuasa binatang yang pertama itu di dpan mata-nya. Dan dia kasi ini bumi dngan smoa orang yang tinggal dalam-nya smbah sama itu binatang yang pertama, yang luka-nya yang parah itu sudah di-smbohkan.
13Dan dia buat tanda yang bsar-bsar, sampaikan api pun dia kasi turun deri langit atas bumi ini di dpan manusia.
14Dan dia tipukan orang-orang yang tinggal di bumi deri sbab itu tanda-tanda yang dia sudah di-bri kuasa boleh buat di dpan binatang itu; dan dia suroh orang-orang yang tinggal di bumi buat satu patong kerna itu binatang, yang kna luka pdang ttapi sudah hidop pula.
15Dan dia di-bri kuasa kasi nyawa k-pada itu binatang punya patong, spaya itu binatang punya patong boleh berchakap, dan boleh bikin s-brapa banyak orang yang ta'mau smbah itu binatang punya patong kna bunoh.
16Dan smoa orang, baik kchil baik bsar, baik kaya baik miskin, baik bebas baik hamba, smoa-nya dia suroh kasi satu chap di tangan kanan-nya, atau di dahi-nya;
17dan spaya orang ta'boleh jual bli, chuma orang yang ada itu chap, ia'itu itu binatang punya nama, atau nama-nya punya nombor.
18Di sini-lah ada bijaksana. Orang yang berakal, biar dia hitong itu binatang punya nombor; kerna itu nombor manusia punya: dan dia punya nombor anam-ratus anam-puloh-anam.