Dual Panel1Dan sahya tengok lagi satu tanda di langit, yang bsar dan hairan, ia'itu tujoh mla'ikat yang bawa tujoh chlaka yang pnghabisan, kerna dalam ini smoa gnap-lah Allah punya marah.
2Dan sahya tengok pula sperti satu laut kacha berchampur api; dan orang-orang yang sudah mnang deri-pada itu binatang, dan deri-pada dia punya patong, dan deri-pada dia punya nama punya nombor, ada berdiri di atas itu laut kacha, dan ada pegang Allah punya kchapi smoa.
3Dan dia-orang nyanyi nyanyian Musa hamba Allah itu dan nyanyian Anak-domba itu, dan kata, "Ya Allah, Tuhan yang maha kuasa, bsar dan hairan-lah Tuhan punya perbuatan smoa; ya Raja sgala jman, bnar dan btul-lah Tuhan punya jalan smoa.
4Ya Tuhan, siapa-kah t'ada nanti takot dan muliakan Tuhan punya nama? kerna Tuhan saja-lah yang kudus; sbab smoa bangsa nanti datang smbah di dpan Tuhan; kerna smoa Tuhan punya perbuatan yang bnar sudah di-nyatakan."
5Dan kmdian deri-pada ini smoa, sahya tengok pula, dan terbuka-lah tmpat kudus dalam khemah ksaksian yang di shorga,
6dan deri dalam itu tmpat kudus terkluar-lah itu tujoh mla'ikat yang bawa itu tujoh chlaka, berrias dngan batu yang suchi dan berkilat, dan dada-nya terikat dngan tali mas.
7Dan satu deri-pada itu ampat hidop-hidopan kasi sama itu tujoh mla'ikat tujoh mangkok mas yang pnoh dngan marah Allah yang hidop s-lama-lama-nya.
8Dan itu tmpat kudus pnoh-lah dngan asap deri-pada Allah punya kmulia'an dan kuasa; dan t'ada satu orang pun yang boleh masok itu tmpat kudus, s-blum itu tujoh mla'ikat punya tujoh chlaka sudah habis.