Dual Panel1Kmdian deri-pada itu smoa, sahya tengok, dan ada satu pintu terbuka di shorga, dan ada pula itu suara yang sahya dngar mula-mula, sperti satu trompet berchakap sama sahya, dan kata, "Mari naik sini, dan sahya nanti tunjokkan angkau perkara-perkara yang nanti jadi kmdian."
2Itu juga sahya ada dalam roh; dan ada satu takhta terdiri di shorga, dan dia yang dudok di atas itu takhta;
3dan yang dudok itu, s-rupa batu yashab dan akek, dan ada plangi kliling itu takhta, sperti zamrud rupa-nya.
4Dan kliling itu takhta ada dua-puloh-ampat takhta: dan di atas itu takhta-takhta ada dua-puloh-ampat ktua dudok, yang pakai pakaian puteh; dan makota mas di kpala-nya.
5Dan deri-pada itu takhta Allah terkluar kilat dan suara-suara dan guntor. Dan ada tujoh plita bernyala di dpan itu takhta, ia'itu itu tujoh Roh Allah;
6dan di dpan itu takhta ada sperti lautan kacha, rupa-nya sperti hablur, dan di tngah-tngah itu takhta dan kliling itu takhta ada ampat hidop-hidopan yang pnoh dngan mata, di dpan dan di blakang.
7Dan mula-mula punya hidop-hidopan sperti singa, dan nombor dua punya sperti anak-lmbu, dan nombor tiga punya ada muka sperti manusia, dan nombor ampat punya sperti burong lang yang terbang.
8Dan itu ampat-ampat hidop-hidopan masing-masing ada anam sayap-nya, dan kliling-nya dan di dalam-nya pnoh dngan mata: dan siang-malam dia-orang t'ada brenti kata, "Kudus, kudus, kudus, Allah, Tuhan yang maha kuasa, yang sudah ada, dan yang ada, dan yang nanti datang."
9Dan bila smoa itu hidop-hidopan kasi mulia dan hormat dan shukor k-pada dia yang dudok di atas itu takhta, dan yang hidop sampai s-lama-lama-nya,
10itu dua-puloh-ampat ktua nanti berlutut di dpan dia yang dudok di atas itu takhta, dan nanti smbah sama dia yang hidop s-lama-lama-nya, dan nanti champakkan dia-orang punya makota di dpan itu takhta, sambil kata,
11"Ya Allah, ya Tuhan kita, Tuhan-lah layak trima mulia dan hormat dan kuasa: kerna Tuhan-lah yang sudah jadikan sgala perkara, dan deri sbab Tuhan punya kahandak smoa-nya sudah ada, dan sudah di-jadikan.