Alkitab Mobile SABDA
[VER] : [BABA]     [PL]  [PB] 
 <<  Wahyu 6 >> 

1Dan sahya ada tengok bila itu Anak-domba bukakan satu deri-pada itu tujoh sil, dan sahya dngar satu antara itu ampat hidop-hidopan kata sperti bunyi guntor, "Mari-lah."

2Dan sahya tengok, dan ada satu kuda puteh, dan dia yang dudok di atas-nya pegang satu panah; dan dia sudah di-bri satu makota: dan dia kluar dngan kmnangan-nya, dan spaya dia lagi mnang.

3Dan bila dia bukakan sil yang nombor dua, sahya dngar hidop-hidopan yang nombor dua kata, "Mari-lah."

4Dan terkluar lain kuda pula, ia'itu merah: dan k-pada orang yang dudok di atas-nya sudah di-bri kuasa bawa pergi sjahtra deri bumi, sampaikan orang bunoh satu sama lain: Dan satu pdang yang bsar sudah di-bri k-pada dia.

5Dan bila dia bukakan sil yang nombor tiga, sahya dngar hidop-hidopan yang nombor tiga kata, "Mari-lah." Dan sahya tengok ada satu kuda hitam; dan dia yang dudok di atas-nya ada s-pasang timbangan di tangan-nya.

6Dan sahya dngar sperti satu suara di tngah-tngah itu ampat hidop-hidopan yang kata, "S-chupak trigu herga-nya satu ringgit, dan tiga chupak bras blanda herga-nya satu ringgit; ttapi minyak sama ayer-anggor jangan angkau rosakkan."

7Dan bila dia bukakan sil yang nombor ampat, sahya dngar suara hidop-hidopan yang nombor ampat kata, "Mari-lah."

8Dan sahya tengok, ada satu kuda puchat: dan yang dudok di atas-nya bernama Maut; dan Alam-maut ada ikut sama dia. Dan k-pada itu dua sudah di-bri kuasa atas suku bhagian bumi ini, mau bunoh orang dngan pdang, dngan klaparan, dan dngan kmatian, dan oleh sgala binatang bumi yang buas-buas.

9Dan bila dia bukakan sil yang nombor lima, sahya tengok di bawah tmpat korban ada jiwa orang-orang yang sudah kna bunoh deri sbab perkata'an Allah dan sbab ksaksian yang dia-orang sudah saksikan:

10dan dia-orang bertriak dngan suara yang bsar, dan kata, "Ya Tuan, yang kudus dan btul itu, brapa lama lagi Tuan blum tuntut hukuman dan balasan atas sgala orang yang tinggal di bumi ini kerna kita punya darah?"

11Dan k-pada dia-orang masing-masing sudah di-bri satu baju puteh, dan sudah di-kata k-pada dia-orang suroh brenti sdikit lama lagi, sampaikan sudah gnap bilangan smoa orang yang jadi hamba sama-sama dia-orang, ia'itu sudara-sudara-nya yang nanti kna bunoh, sperti dia-orang pun sudah kna.

12Dan sahya tengok bila dia bukakan sil yang nombor anam, ada satu gmpa bumi yang bsar: dan matahari mnjadi hitam, sperti kain muri, dan s-gnap bulan mnjadi sperti darah;

13dan bintang-bintang di langit pun gugur di bumi, sperti satu pokok ara gugurkan buah burok-nya bila kna gonchang oleh angin kras.

14Dan langit pun hilang-lah sperti surat yang kna gulong: dan tiap-tiap gunong dan pulau pun kna pindah deri-pada tmpat-nya.

15Dan raja-raja dunia ini, dan pgawai dan pnglima dan orang kaya-kaya dan yang berkuasa, dan tiap-tiap orang, baik hamba baik bebas, smoa-nya smbunyikan diri-nya dalam goa-goa dan dalam batu-batu gunong;

16dan dia-orang kata sama gunong-gunong dan batu-batu itu, "Timpakan kita, dan lindongkan kita deri-pada muka dia yang dudok di atas takhta itu, dan deri-pada Anak-domba punya marah:

17kerna itu hari yang bsar, ia'itu hari marah-nya sudah sampai; dan siapa-kah boleh tahan?"


  Share Facebook  |  Share Twitter

 <<  Wahyu 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel