Dual Panel1Dan bila dia bukakan sil yang nombor tujoh, snnyap-lah dalam shorga dkat s-tngah jam punya lama.
2Dan sahya tengok itu tujoh mla'ikat yang berdiri di dpan Allah; dan tujoh trompet sudah di-bri k-pada dia-orang.
3Dan lain satu mla'ikat datang berdiri dkat itu tmpat-persmbahan, dan pegang satu mas punya tmpat-asap; dan banyak bau-bauan sudah di-bri k-pada dia, spaya dia boleh tambahkan k-pada do'a sgala orang kudus di atas itu tmpat-persmbahan mas yang di dpan itu takhta.
4Dan itu bau-bauan punya asap dngan do'a orang-orang kudus naik di dpan Allah deri tangan mla'ikat itu.
5Dan itu mla'ikat ambil itu tmpat-asap; dan pnohkan itu dngan api deri tmpat-persmbahan, dan champakkan di bumi, dan datang bunyi-bunyi guntor, dan suara-suara, dan kilat, dan satu gmpa bumi.
6Dan itu tujoh mla'ikat yang ada itu tujoh trompet sdiakan diri mau tiop.
7Dan yang pertama tiop trompet, dan datang hujan batu dngan api berchampur darah, dan itu smoa kna champak di atas bumi: dan s-pertiga bumi kna hangus, dan s-pertiga pokok-pokok pun hangus juga, dan smoa rumput-rumput yang hijau pun hangus.
8Dan mla'ikat yang nombor dua pun tiop trompet, dan ada sperti satu gunong bsar yang bernyala dngan api kna champak dalam lautan: dan s-pertiga lautan itu mnjadi darah;
9dan deri-pada smoa kjadian di lautan yang ada nyawa s-pertiga-nya mati; dan s-pertiga deri-pada kapal-kapal pun binasa-lah.
10Dan mla'ikat yang nombor tiga pun tiop trompet, dan ada satu binatang bsar jatoh deri langit mnyala-nyala sperti satu suloh api, dan itu bintang timpakan s-pertiga deri-pada sungai-sungai, dan sgala mata-ayer;
11dan itu bintang punya nama di-sbot Kayu-pahit: dan s-pertiga ayer itu berubah mnjadi Kayu-pahit; dan banyak orang mati sbab itu ayer sudah jadi pahit.
12Dan mla'ikat yang nombor ampat pun tiop trompet, dan terkna s-pertiga matahari dan s-pertiga bulan dan s-pertiga bintang-bintang; spaya s-pertiga smoa-nya mnjadi glap, dan s-pertiga siang hari jangan jadi trang, dan s-pertiga malam pun bgitu juga.
13Dan sahya tengok, dan sahya dngar satu burong lang terbang di tngah langit, yang kata dngan suara yang bsar, "Susah, susah, susah-lah orang-orang yang tinggal di atas bumi, deri sbab bunyi-bunyi yang lain lagi, ia'itu bunyi trompet itu tiga mla'ikat nanti tiop.