Alkitab Mobile SABDA
[VER] : [BABA]     [PL]  [PB] 
 <<  Yohanes 10 >> 

1"Dngan sunggoh-sunggoh sahya bilang sama kamu, orang yang t'ada masok kandang domba deri-pada pintu, ttapi panjat lain tmpat, dia itu jadi pnchuri dan pnyamon.

2Ttapi yang masok deri-pada pintu, dia jadi gombala domba.

3Itu pnunggu pintu buka sama dia; dan itu domba dngar dia punya suara: dan dia panggil domba-nya sndiri dngan nama masing-masing, dan bawa smoa-nya kluar.

4Dan bila dia sudah bawa kluar smoa domba-nya sndiri, dia berjalan dhulu, dan itu domba ikut sama dia: sbab knal dia punya suara.

5Ttapi skali-kali itu domba ta'mau ikut sama lain orang, ttapi lari deri-pada dia: sbab ta'knal suara orang lain."

6Ini perumpama'an Isa sudah chakap sama dia-orang: ttapi dia-orang ta'mngerti apa yang dia bilangkan sama dia-orang.

7Sbab itu Isa kata sama dia-orang lagi s-kali, "Dngan sunggoh-sunggoh sahya bilang sama kamu, sahya ini jadi itu domba punya pintu.

8Smoa orang yang sudah datang dhulu deri-pada sahya, jadi pnchuri dan pnyamon; ttapi itu domba-domba t'ada dngar sama dia-orang.

9Sahya ini jadi itu pintu: kalau barang-siapa masok deri-pada sahya, dia nanti slamat, dan nanti masok kluar, dan dapat makanan.

10Itu pnchuri datang chuma mau churi dan bunoh dan binasakan saja: sahya ini sudah datang spaya dia-orang boleh dapat hidop, dan boleh dapat hidop dngan mewah-nya.

11Sahya ini jadi gombala yang baik: itu gombala yang baik srahkan nyawa-nya kerna domba-domba itu.

12Itu orang gaji yang bukan gombala, dan itu domba bukan dia sndiri punya, bila dia tengok srigala datang, dia tinggalkan itu domba dan lari, dan itu srigala rbotkan domba dan chrai-braikan dia:

13dia lari sbab dia satu orang gaji, dan sbab dia t'ada pdulikan itu domba.

14Sahya ini-lah itu gombala yang baik: dan sahya knal sama sahya punya domba, dan sahya punya domba pun knal sama sahya,

15sperti Bapa knal sama sahya, dan sahya pun knal sama Bapa; dan sahya srahkan nyawa sahya kerna domba-domba itu.

16Dan sahya ada lain domba lagi yang bukan deri-pada ini kandang: itu pun sahya msti bawa, dan dia nanti dngar sahya punya suara; dan smoa-nya nanti mnjadi satu kawan domba, dan satu gombala-nya.

17Itu sbab-lah Bapa kaseh sama sahya, sbab sahya srahkan nyawa sahya, spaya sahya boleh ambil balek.

18Satu orang pun t'ada ambil deri-pada sahya, ttapi sahya srahkan deri kahandak sndiri. Sahya ada kuasa srahkan, dan sahya ada kuasa ambil dia balek. Ini hukum sahya sudah trima deri-pada Bapa sahya."

19Lagi s-kali jadi satu perslisehan antara orang Yahudi deri sbab ini perkata'an smoa.

20Dan antara dia-orang ada banyak juga yang kata, "Dia ini terkna jin, dan ada gila; knapa kamu dngar sama dia?"

21Lain orang pula kata, "Ini bukan perkata'an orang yang terkna jin. Boleh-kah jin chlekkan orang buta punya mata?"

22Hari-bsar kuduskan ka'abah di Yerusalim sudah sampai: ia'itu musim sjok;

23dan Isa ada berjalan-jalan dalam ka'abah di srambi Sulaiman.

24Jadi orang Yahudi datang kliling dia, dan kata sama dia, "Brapa lama tuan mau kasi kita bimbang? Jikalau tuan jadi Almaseh, bilang sama kita dngan nyata."

25Isa jawab sama dia-orang, "Sahya sudah bilang sama kamu, dan kamu t'ada perchaya: itu perbuatan yang sahya buat dalam nama Bapa sahya, ini smoa bersaksi deri-hal sahya.

26Ttapi kamu t'ada perchaya, sbab kamu bukan deri sahya punya domba.

27Sahya punya domba dngar sahya punya suara, dan sahya knal sama smoa-nya, dan dia-orang ikut sama sahya:

28dan sahya kasi sama dia-orang hidop yang kkal; dan skali-kali dia-orang t'ada nanti binasa, dan satu orang pun t'ada nanti rbotkan dia deri tangan sahya.

29Bapa sahya yang sudah kasi dia-orang sama sahya ada lbeh bsar deri-pada sklian; dan satu orang pun t'ada boleh rbotkan dia deri tangan Bapa.

30Sahya sama Bapa satu juga."

31Lagi s-kali orang Yahudi pungut batu mau hntam sama dia.

32Isa jawab sama dia-orang, "Banyak juga perbuatan baik yang sahya sudah tunjokkan sama kamu deri-pada Bapa; deri sbab mana-kah punya perbuatan kamu hntam batu sama sahya?"

33Orang Yahudi jawab sama dia, "Bukan-nya deri sbab perbuatan baik kita hntam batu sama angkau, ttapi deri sbab hujat, dan sbab angkau ini satu manusia buat diri angkau Allah."

34Isa jawab sama dia orang, "Bukan-kah ada tersurat dalam kamu punya hukum-taurit, 'Sahya sudah bilang kamu smoa jadi alihah'?

35Jikalau orang yang k-pada-nya perkata'an Allah sudah datang dia sbotkan alihah (dan kitab ta'boleh di-tpikan),

36boleh-kah kamu kata 'Angkau mnghujat' sama orang yang Bapa sudah kuduskan dan hantarkan dalam dunia; sbab sahya sudah bilang, 'Sahya ini Anak Allah'?

37Jikalau sahya t'ada buat sahya punya Bapa punya perbuatan, jangan perchaya sama sahya.

38Ttapi jikalau sahya ada buat, sunggoh pun kamu t'ada perchaya sama sahya, perchaya-lah sama itu perbuatan: spaya kamu boleh tahu dan mngerti yang Bapa ada dalam sahya, dan sahya dalam Bapa."

39Lagi s-kali dia-orang chari jalan mau tangkap sama dia: dan dia lpas deri tangan dia-orang.

40Dan dia pergi sbrang Yordan, di tmpat yang Yahya mula-mula ada baptiskan orang; dan tinggal di situ.

41Dan banyak orang datang k-pada dia: dan dia-orang kata, "Btul juga Yahya t'ada buat apa-apa tanda: ttapi sgala perkara yang dia sudah chakapkan fasal ini orang, smoa-nya ada btul."

42Dan banyak orang perchaya sama Isa di sana.


  Share Facebook  |  Share Twitter

 <<  Yohanes 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel