Alkitab Mobile SABDA
[VER] : [BABA]     [PL]  [PB] 
 <<  Yohanes 14 >> 

1"Jangan-lah hati kamu terkachau: kamu ada perchaya sama Allah, perchaya-lah sama sahya pun.

2Dalam rumah Bapa sahya ada banyak tmpat tinggal; jikalau bukan bgitu, tntu-lah sahya sudah bilang sama kamu; kerna sahya ada pergi mau siapkan satu tmpat kerna kamu.

3Dan jikalau sahya pergi dan siapkan satu tmpat kerna kamu, sahya nanti datang balek, dan sambot kamu k-pada diri sahya sndiri; spaya di mana sahya ada, di situ juga kamu pun.

4Dan di mana sahya ada pergi, kamu tahu jalan-nya."

5Tomas kata sama dia, "Ya Tuhan, kita ta'tahu di mana Tuhan mau pergi; mana boleh kita tahu jalan-nya pula."

6Isa kata sama dia, "Sahya ini-lah jalan, dan kbtulan, dan hidop: satu orang pun t'ada datang k-pada Bapa chuma oleh sahya.

7Jikalau kamu sudah knal sahya, tntu-lah kamu sudah knal Bapa sahya juga: deri-pada ini waktu kamu knal sama dia, dan sudah tengok dia."

8Filipus kata sama dia, "Ya Tuhan, tunjokkan-lah Bapa itu k-pada kita, bharu hati kita jadi puas."

9Isa kata sama dia, "Hei Filipus, s-kian lama ini sahya sudah ada sama-sama kamu smoa, dan t'ada-kah angkau knal sama sahya? orang yang sudah tengok sahya, dia sudah tengok Bapa; bagimana pula angkau bilang, 'Tunjokkan Bapa itu k-pada kita?'

10T'ada-kah angkau perchaya yang sahya dalam Bapa, dan Bapa dalam sahya? itu perkata'an smoa yang sahya chakapkan, bukan-nya sahya chakap deri-pada diri sndiri: ttapi Bapa yang tinggal dalam sahya buat dia punya perbuatan.

11Perchaya-lah yang sahya dalam Bapa, dan Bapa dalam sahya: kalau tidak, perchaya-lah sama sahya deri sbab itu perbuatan juga.

12Dngan sunggoh-sunggoh sahya bilang sama kamu, orang yang perchaya sama sahya, dia pun boleh buat itu perbuatan yang sahya buat; dan lagi yang lbeh bsar pun deri-pada ini smoa dia boleh buat; sbab sahya ada pergi k-pada Bapa sahya.

13Dan apa-apa yang kamu nanti minta dalam nama sahya, nanti sahya buat, spaya Bapa boleh di-muliakan dalam Anak.

14Jikalau kamu minta sahya apa-apa dalam nama sahya, itu pun sahya nanti buat.

15Jikalau kamu kaseh sama sahya, kamu nanti turut sahya punya hukum-hukum.

16Dan sahya ini nanti minta sama Bapa, dan Bapa nanti kasi kamu lain satu Pnghibur, spaya dia ini boleh bersama-sama kamu s-lama-lama-nya,

17ia'itu Roh kbtulan: yang dunia ini ta'boleh trima: kerna dunia t'ada tengok dan t'ada knal pun sama Roh itu: ttapi kamu ini knal sama dia; kerna dia ada tinggal sama-sama kamu, dan nanti ada dalam kamu.

18Sahya t'ada nanti tinggalkan kamu sperti anak-piatu bgitu: sahya nanti datang k-pada kamu.

19Chuma lagi sikit lama saja, dan dunia ini t'ada nanti tengok sahya lagi; ttapi kamu ini ada tengok sahya: dan sbab sahya ini hidop, kamu pun nanti hidop juga.

20Itu hari kamu ini nanti tahu yang sahya dalam Bapa, dan kamu dalam sahya, dan sahya pun dalam kamu smoa.

21Orang yang ada sahya punya hukum-hukum, dan turut itu smoa, dia-lah yang kaseh sama sahya: dan orang yang kaseh sama sahya nanti di-kasehkan oleh Bapa sahya, dan sahya pun nanti kaseh sama dia, dan nyatakan diri sahya k-pada dia."

22Dan Yudas (bukan itu Iskariot) kata sama Isa, "Ya Tuhan, apa sudah jadi yang k-pada kita ini Tuhan mau nyatakan diri Tuhan, dan bukan k-pada dunia?"

23Isa jawab kata sama dia, "Jikalau siapa-siapa kaseh sama sahya, dia nanti turut sahya punya perkata'an: dan Bapa sahya nanti kaseh sama dia, dan kita nanti datang k-pada dia, dan tntukan kita punya tmpat tinggal sama-sama dia.

24Orang yang t'ada kaseh sama sahya, dia itu t'ada turut perkata'an sahya: dan itu perkata'an yang kamu dngar bukan-nya sahya sndiri punya, ttapi Bapa punya yang sudah hantarkan sahya.

25"Ini smoa sahya sudah chakapkan sama kamu, ktika sahya ada lagi tinggal sama-sama kamu.

26Ttapi Pnghibur itu, ia'itu Roh Alkudus, yang Bapa nanti hantarkan dalam nama sahya, dia-lah nanti ajarkan kamu sgala perkara, dan ingatkan kamu deri-hal sgala perkara yang sahya sudah kata sama kamu.

27Sahya tinggalkan kamu sntosa; sahya kasi kamu sahya punya sntosa: sahya kasi sama kamu bukan-nya sperti dunia kasi. Jangan-lah hati kamu terkachau; dan jangan jadi takot.

28Kamu sudah dngar bagimana sahya kata sama kamu, sahya ada pergi, dan sahya nanti balek k-pada kamu. Jikalau kamu kaseh sama sahya, tntu-lah kamu sudah bersuka-suka, sbab sahya pergi k-pada Bapa: kerna Bapa lbeh bsar deri-pada sahya.

29Sahya skarang sudah bilang sama kamu s-blum jadi, spaya bila sudah jadi kamu boleh perchaya.

30T'ada lagi sahya nanti chakap banyak-banyak sama kamu, kerna ini dunia punya raja datang: dan dia tidak ada apa-apa di dalam sahya;

31ttapi spaya ini dunia boleh tahu yang sahya kaseh sama Bapa, dan sperti Bapa sudah psan sama sahya, bgitu-lah sahya ada buat. Bangun-lah, baik kita undor deri sini.


  Share Facebook  |  Share Twitter

 <<  Yohanes 14 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran