Alkitab Mobile SABDA
[VER] : [BABA]     [PL]  [PB] 
 <<  Yohanes 15 >> 

1"Sahya ini-lah pokok anggor yang btul, dan sahya punya Bapa-lah orang ladang itu.

2Tiap-tiap charang dalam sahya yang t'ada kluarkan buah, dia buangkan: dan tiap-tiap charang yang ada kluarkan buah, dia bersehkan, spaya boleh kluarkan Ibeh buah.

3Kamu ini sdia ada berseh, sbab perkata'an yang sahya sudah chakapkan sama kamu.

4Tinggal-lah dalam sahya, dan sahya pun dalam kamu. Sperti charang ta'boleh kluarkan buah dngan kuasa-nya sndiri, kalau t'ada tinggal dalam pokok anggor; bgitu-lah kamu pun ta'boleh, kalau kamu t'ada tinggal dalam sahya.

5Sahya ini-lah pokok anggor itu, dan kamu-lah charang-charang-nya: orang yang tinggal dalam sahya, dan sahya pula dalam dia, dia-lah yang kluarkan banyak buah: kerna kalau berchrai deri-pada sahya, kamu ta'boleh buat apa-apa.

6Jikalau satu orang t'ada tinggal dalam sahya, dia kna buang sperti charang, dan layu; dan orang kumpolkan itu smoa, dan buangkan dalam api, jadi hangus.

7Jikalau kamu tinggal dalam sahya, dan sahya punya perkata'an tinggal dalam kamu, minta-lah apa-apa kamu mau, dan itu nanti di-jadikan kerna kamu.

8Dalam ini hal juga Bapa sahya di-muliakan, ia'itu dalam hal kamu kluarkan banyak buah; dan kamu nanti jadi sahya punya murid-murid.

9Sperti Bapa sudah kaseh sama sahya, bgitu juga sahya pun sudah kaseh sama kamu: tinggal-lah kamu dalam sahya punya kaseh.

10Jikalau kamu turut sahya punya hukum-hukum, kamu nanti tinggal dalam sahya punya kaseh; sama sperti sahya pun sudah turut sahya punya Bapa punya hukum, dan tinggal dalam dia punya kaseh.

11Ini smoa sahya sudah chakapkan sama kamu, spaya sahya punya ksuka'an boleh ada dalam kamu, dan spaya kamu punya ksuka'an boleh jadi gnap.

12Ini-lah sahya punya hukum, ia'itu yang kamu kaseh satu sama lain, sperti sahya sudah kaseh sama kamu smoa.

13T'ada satu orang pun yang ada kaseh lbeh bsar deri-pada ini, ia'itu yang orang srahkan nyawa-nya kerna sohbat-sohbat-nya.

14Kamu-lah sahya punya sohbat-sohbat, kalau kamu buat apa-apa yang sahya psan sama kamu.

15T'ada lagi sahya triak kamu hamba-hamba, kerna satu hamba ta'tahu apa-apa yang tuan-nya buat: ttapi sahya sudah triak kamu smoa sohbat-sohbat; kerna smoa perkara yang sahya sudah dngar deri-pada Bapa sahya, smoa-nya sahya sudah kasi tahu sama kamu.

16Bukan-nya kamu ini yang sudah pileh sama sahya, ttapi sahya-lah yang sudah pileh sama kamu, dan tntukan kamu spaya kamu boleh pergi kluarkan buah, dan spaya buah-buah kamu boleh tinggal kkal: spaya baik apa pun kamu minta sama Bapa dalam sahya punya nama, dia boleh kasi sama kamu.

17Ini smoa sahya psan sama kamu, spaya kamu boleh kaseh satu sama lain.

18Jikalau ini dunia bnchi sama kamu, kamu tahu juga yang dia sudah bnchi sama sahya lbeh dhulu kamu.

19Jikalau kamu dunia ini punya, tntu-lah dunia ini nanti sayang sama dia punya sndiri, ttapi sbab kamu bukan-nya ini dunia punya, dan sbab sahya sudah pileh kamu kluar deri dunia ini, itu sbab-lah ini dunia bnchi sama kamu.

20Ingat-lah itu perkata'an yang sahya sudah kata sama kamu, satu hamba bukan lbeh bsar deri-pada tuan-nya. Jikalau orang sudah aniayakan sahya, dia-orang nanti aniayakan kamu pun; jikalau orang turut perkata'an sahya, dia-orang nanti turut perkata'an kamu pun.

21Ttapi smoa ini dia-orang nanti buat k-pada kamu deri sbab sahya punya nama, sbab dia-orang ta'tahu dia yang hantarkan sahya.

22Jikalau sahya t'ada datang dan chakap sama dia-orang, t'ada juga dia-orang ada dosa: ttapi skarang dia-orang t'ada daleh lagi deri-hal dosa-nya.

23Orang yang bnchi sama sahya, dia bnchi sama Bapa sahya pun.

24Jikalau sahya t'ada buat di antara dia-orang itu perbuatan yang lain orang t'ada buat, t'ada juga dia-orang ada dosa: ttapi skarang dia-orang sudah tengok dan sudah bnchi sahya dan sahya punya Bapa pun.

25Ttapi ini jadi spaya itu perkata'an boleh di-bnarkan yang ada tersurat dalam dia-orang punya hukum-taurit, 'Dia-orang bnchi sama sahya dngan t'ada sbab-nya.'

26Ttapi bila Pnghibur itu sudah datang, yang sahya nanti hantarkan k-pada kamu deri-pada Bapa, ia'itu Roh kbtulan, yang kluar deri Bapa, dia-lah nanti bersaksi deri-hal sahya:

27dan kamu pun nanti bersaksi, sbab kamu sudah ada sama-sama sahya deri mula-nya.


  Share Facebook  |  Share Twitter

 <<  Yohanes 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran