Alkitab Mobile SABDA
[VER] : [BABA]     [PL]  [PB] 
 <<  Yohanes 5 >> 

1Kmdian deri-pada ini smoa, ada orang Yahudi punya hari-bsar; dan Isa pergi di Yerusalim.

2Di Yerusalim, dkat pintu kambing, ada satu kolam bernama dalam bhasa Ibrani Bait-Hasda; yang ada lima srambi.

3Dalam itu srambi ada terbaring banyak orang sakit, buta, tempang, dan kurus kring.

4[KOSONG]

5Dan di situ ada satu orang yang sakit sudah tiga-puloh-lapan tahun.

6Isa tengok dia terbaring di situ, dan dia tahu itu orang sudah lama dalam itu hal, dan kata sama dia, "Mau-kah jadi smboh?"

7Itu orang sakit jawab, "Tuan, sahya t'ada satu orang yang boleh turunkan sahya dalam itu kolam bila ayer-nya berkochak: ttapi ktika sahya datang, lain orang pula turun lbeh dhulu sahya."

8Isa kata sama dia, "Bangun-lah angkau, angkat tmpat tidor, dan jalan."

9Itu juga itu orang jadi smboh, dan dia angkat tmpat-tidor-nya berjalan. Dan itu hari jadi hari-perhentian.

10Itu sbab orang Yahudi kata sama itu orang yang sudah di-smbohkan, "Ini hari-perhentian; t'ada halal angkau angkat tmpat-tidor."

11Ttapi dia jawab sama dia-orang, "Itu orang yang sudah smbohkan sahya, dia-lah yang bilang sama sahya, 'Angkat tmpat-tidor, dan jalan.'"

12Dia-orang tanya sama dia, "Siapa-kah itu orang yang bilang sama angkau, 'Angkat dan jalan'?"

13Itu orang yang sudah di-smbohkan ta'tahu siapa dia: kerna Isa sudah undor, sbab banyak orang ada di situ.

14Kmdian deri-pada itu Isa jumpa itu orang di dalam ka'abah, dan kata sama dia, "Tengok, angkau sudah smboh: jangan buat dosa lagi, spaya jangan perkara yang lbeh jahat pula datang di atas angkau."

15Itu orang pergi kasi tahu sama orang Yahudi yang Isa-lah yang smbohkan dia.

16Dan itu sbab orang Yahudi aniayakan Isa, kerna dia sudah buat smoa perkara itu tempo hari-perhentian.

17Ttapi Isa jawab sama dia-orang, "Bapa sahya ada bkerja sampai skarang, dan sahya pun bkerja juga."

18Sbab itu-lah orang Yahudi makin lbeh chari jalan mau bunoh dia, kerna bukan saja dia langgar hukum hari-perhentian, ttapi dia sbot Allah Bapa-nya sndiri, dan samakan diri-nya dngan Allah.

19Itu sbab Isa jawab kata sama dia-orang, "Dngan sunggoh-sunggoh sahya bilang sama kamu smoa, Anak itu ta'boleh buat apa-apa dngan dia sndiri punya kahandak, chuma apa-apa yang dia tengok Bapa buat: kerna apa-apa yang Bapa buat, ini smoa Anak itu buat bgitu juga.

20Kerna Bapa kaseh sama Anak itu, dan tunjokkan dia sgala perkara yang dia sndiri buat: dan perbuatan yang lbeh bsar deri-pada ini Bapa nanti tunjokkan sama Anak, spaya kamu hairan.

21Kerna sperti Bapa bangkitkan orang mati, dan hidopkan dia, bgitu juga Anak itu pun hidopkan barang-siapa yang dia suka.

22Kerna Bapa t'ada hukumkan orang, ttapi dia sudah srahkan sgala perkara hukum k-pada Anak itu;

23spaya smoa orang nanti hormatkan Anak itu, sama sperti dia-orang hormatkan Bapa. Orang yang t'ada hormatkan Anak itu, dia t'ada hormatkan Bapa yang sudah hantarkan Anak itu.

24Dngan sunggoh-sunggoh sahya bilang sama kamu, orang yang dngar perkata'an sahya, dan perchaya sama dia yang sudah hantarkan sahya, dia itu ada hidop yang kkal, dan t'ada masok hukuman, ttapi sudah pindah deri-pada kmatian masok hidop.

25Dngan sunggoh-sunggoh sahya bilang sama kamu, waktu-nya nanti datang, dan skarang pun ada, bila orang mati nanti dngar suara Anak Allah; dan orang yang dngar nanti hidop.

26Kerna sperti Bapa ada hidop dalam diri-nya sndiri, bgitu juga dia sudah kasi Anak itu pun ada hidop dalam diri-nya sndiri:

27dan dia sudah kasi dia kuasa jalankan hukum, sbab dia Anak-manusia.

28Jangan hairan sama ini hal: kerna waktu-nya nanti datang bila smoa orang yang ada dalam kubor nanti dngar suara-nya,

29dan nanti kluar; orang-orang yang sudah buat baik datang k-pada kbangkitan hidop; dan orang-orang yang sudah buat jahat datang k-pada kbangkitan hukuman.

30"Sahya ini ta'boleh buat apa-apa dngan kuasa sahya sndiri: s-bagimana sahya dngar, bgitu-lah sahya jalankan hukum: dan sahya punya hukum ada adil; kerna sahya t'ada chari kahandak sndiri, ttapi kahandak dia yang hantarkan sahya.

31Jikalau sahya bersaksi deri-hal sndiri, ksaksian sahya t'ada btul.

32Ada lain orang yang bersaksi deri-hal sahya; dan sahya tahu itu ksaksian yang dia saksikan deri-hal sahya ada btul.

33Kamu ini sudah hantarkan orang k-pada Yahya, dan dia sudah bersaksi atas apa yang btul.

34Ttapi itu ksaksian yang sahya ini trima, bukan-nya deri manusia; dalam pada itu, ini smoa sahya bilangkan spaya kamu dapat slamat.

35Yahya itu satu plita yang mnyala dan berchahya-chahya: dan kamu sudah sudi bersuka-suka dalam trang-nya ada sikit lama.

36Ttapi ksaksian yang sahya ada, itu lbeh bsar deri-pada Yahya punya: kerna smoa perbuatan yang Bapa sudah srahkan k-pada sahya, spaya sahya boleh habiskan, ia'itu perbuatan yang sahya ada buat, itu smoa bersaksi deri-hal sahya yang Bapa sudah hantarkan sahya.

37Dan Bapa yang hantarkan sahya, dia sndiri sudah bersaksi deri-hal sahya. Kamu blum pernah dngar suara-nya, atau tengok rupa-nya.

38Dan dia punya perkata'an pun t'ada tinggal dalam diri kamu: kerna orang yang dia sudah hantarkan kamu tidak perchaya.

39Kamu preksa kitab, kerna kamu sangka yang di dalam-nya kamu ada hidop yang kkal; dan itu kitab bersaksi deri-hal sahya;

40ttapi kamu ta'mau datang k-pada sahya spaya kamu dapat hidop.

41Sahya t'ada sambot hormat deri-pada manusia.

42Ttapi sahya tahu kamu, ia'itu yang kaseh Allah tidak ada dalam kamu.

43Sahya ini sudah datang dngan nama Bapa sahya, dan kamu t'ada sambot sama sahya: kalau lain orang datang dngan nama-nya sndiri, sama dia kamu nanti sambot.

44Mana boleh kamu perchaya, kamu yang sambot kmulia'an satu sama lain, ttapi kmulia'an yang deri-pada Allah yang satu itu kamu t'ada chari?

45Jangan fikir sahya nanti d'awa kamu dpan Bapa: ada satu yang ada d'awa kamu, ia'itu Musa yang kamu harapkan.

46Kerna jikalau kamu sudah perchaya Musa, kamu nanti perchaya sahya pun; kerna dia sudah tulis deri-hal sahya.

47Ttapi kalau kamu t'ada perchaya dia punya suratan, mana boleh kamu perchaya sahya punya perkata'an?"


  Share Facebook  |  Share Twitter

 <<  Yohanes 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel