Dual PanelDane
1Makudang-kudang jadma saking Sip tumuli rauh tangkil ring Ida Sang Prabu Saul ring Gibea sarwi nguningayang ring ida mungguing Dane Daud wenten masingidan ring Gunung Hahilane ring tepin tegal melakang Yehudane.
2Ida Sang Prabu Saul raris digelis lunga ka tegal melakang Sipe kairing antuk prajurit bangsa Israele sane pepilihan sareng tigang tali diri, misadia jaga ngejuk Dane Daud.
3Ida Sang Prabu Saul makemah ring sisin margine ring Gunung Hahilane. Daweg punika Dane Daud sedekan wenten ring tegal melakange punika. Rikala Dane Daud uning mungguing Ida Sang Prabu Saul ngetut dane,
4Dane Daud raris ngutus tetelik tur kapanggih mungguing Ida Sang Prabu Saul wiakti sampun wenten irika.
5Duk punika ugi Dane Daud raris lunga tur panggihin dane genah Sang Prabu Saul miwah Dane Abner, okan Dane Ner, senapatin wadua balan Ida Sang Prabu Saule merem. Ida Sang Prabu Saul merem ring tengah kemahe, tur wadua balan idane ngwangun kemahnyane ngiter kemah idane.
6Dane Daud tumuli mabaos ring Ahimelek, wong Hete, miwah ring Dane Abisai semeton Dane Yoab okan Dane Seruya, asapuniki: “Nyen uli pantaran nyamane ajak dadua ene ane lakar nututin tiang ka kemah Sang Prabu Saule?” Dane Abisai matur: “Tiang jaga ngiringang semeton.”
7Ring wengi punika Dane Daud miwah Abisai tumuli ngranjing ring kemah Ida Sang Prabu Saul tur panggihin dane Ida Sang Prabu Saul merem ring basa tengah pakemahane. Tumbak idane matanceb ring tanahe nampek ring prabun idane. Dane Abner miwah prajurite sami pada sirep ngiter ida.
8Dane Abisai tumuli matur ring Dane Daud kadi asapuniki: “Ring wengine puniki Ida Sang Hyang Widi Wasa sampun nyerahang meseh semetone ring semeton. Duaning punika icenja tiang numbak ida antuk tumbak idane ngraga kantos ida madeket ring tanahe. Tiang tan buat numbak kantos ping kalih.”
9Nanging Dane Daud masaur asapuniki: “Eda sedaanga ida, sawireh tusing ada anak ane lakar sida luput uli ukuman Ida Sang Hyang Widi Wasa yening nyedaang sang prabu ane selik Ida.”
10Dane Daud nglanturang pangandikan danene: “Tiang pracaya, yening suba teka masanne, Ida Sang Hyang Widi Wasa ane maraga nyeneng, Ida pasti lakar nyedaang Ida Sang Prabu Saul, apake sedan idane cara biasa wiadin seda di payudan.
11Ida Sang Hyang Widi Wasa nombaang tiang apang eda tiang kanti mencanen anak ane suba manggehang Ida dadi raja. Ane jani jalan jemak tumbak idane uli sisin prabun idane aketo masih cecepan idane. Suba keto jalan iraga magedi uli dini.”
12Dane Daud tumuli ngambil tumbak miwah cecepan sane ring samping prabun Ida Sang Prabu Saul, tur dane miwah Dane Abisai raris makaon saking irika. Nenten wenten sane manggihin, nenten wenten sane uning, nenten wenten sane nyidayang matangi, makasami sirep leplep santukan Ida Sang Hyang Widi Wasa ngardi ida dane ipun sirep leplep.
13Sasampune punika Dane Daud raris lunga nglintangin lebake punika ngungsi ka muncuk bukite, tur ngantos sampun rumasa doh.
14Dane Daud tumuli majeritan ring wadua balan Ida Sang Prabu Saul, miwah ring Dane Abner, sapuniki: “Ih Abner, apa munyin tiange kadingehan ditu?” Dane Abner tumuli masaur: “Nyen ento kauk-kauk tur nanginin ida sang prabu?”
15Dane majeritan malih ring Dane Abner sapuniki: “Tusingke ragane ento anak ane kapiandel di Israel? Nanging ragane tusing ngebag ida sang prabu, gustin ragane? Sawireh mara pesan ada anak macelep lakar nyedayang ida sang prabu, gustin ragane.
16Ih Abner, ragane tuara tuon teken kewajiban. Masrana parab Ida Sang Hyang Widi Wasa ane nyeneng, ragane ajak makejang suba beneh mati sawireh ragane tuara ngebag gustin ragane, anak ane kaselik dadi prabu baan Ida Sang Hyang Widi Wasa. Tegarang tingalin, dija tumbak muah cecepan ida sang prabune ane di samping prabun idane ento?”
17Ida Sang Prabu Saul uning mungguing punika suaran Dane Daud, raris Ida ngandika: “Dadi mirib munyin iceninge, cening Daud.” Dane Daud tumuli matur: “Inggih yuakti munyin titiange ratu sang prabu.”
18Dane nglanturang atur danene: “Napi awinan palungguh iratu muru titiang parekan palungguh iratu? Napike sane sampun laksanayang titiang? Kacorahan napike sane sampun margiang titiang?
19Sane mangkin ledang palungguh iratu miarsa atur titiange. Yening wantah Ida Sang Hyang Widi Wasa sane ngandikayang iratu nglawan titiang, mugi aturan sane katurang pabuat Ida pacang ngobah pakayunan Idane. Nanging yening puniki wantah pakardin imanusa, dumadak pastun Ida Sang Hyang Widi Wasa punika nibenin ipun. Samaliha ipun sampun ngaonang titiang saking tanah Ida Sang Hyang Widi Wasa ka jagate ring genah titiang wantah nyidayang nyungsung widi-widi tiosan.
20Duaning kadi asapunika, sampunangja banggayanga titiang padem ring tanah wong sunantarane, sane doh saking ayun Ida Sang Hyang Widi Wasa. Napi awinane prabun wong Israele sampun medal buat ngamademang titiang sane satmaka kutu? Napi awinanipun ida nguber titiang sakadi anak morosin keker ring gunung-gununge?”
21Ida Sang Prabu Saul raris ngandika, kadi asapuniki: “Oduh cening Daud, bapa suba pelih pesan. Jani mai cening mulih sawireh bapa tuara lakar ngae ala buin teken cening, sawireh di petenge ene cening suba tusing ngamatiang bapa. Tuah sasajaan bapa belog punggung, buina laksanan bapane sigug pesan.”
22Dane Daud tumuli matur: “Puniki tumbak palungguh iratu, ndikayangja salah tunggil parekan iratune ngambil tumbake punika mriki.
23Ida Sang Hyang Widi Wasa jaga ngwales ring anake sane nglaksanayang kapatutan lan kasatian. Ring rahinane puniki Ida Sang Hyang Widi Wasa sampun nyerahang jiwan iratune ring titiang, nanging titiang nenten purun nyedayang anake sane sampun kaselik dados ratu antuk Ida Sang Hyang Widi Wasa.
24Samaliha sakadi titiang sampun sayang ring jiwan iratune ring wengine puniki, dumadak asapunika taler Ida Sang Hyang Widi Wasa ngrahayuang titiang tur mebasang titiang saking saananing pakewuh.”
25Ida Sang Prabu Saul tumuli ngandika ring Dane Daud: “Cening Daud, dumadak Ida Sang Hyang Widi Wasa ngamertanin cening. Cening lakar mapikolih di saluiring laksanan ceninge.” Sasampun punika Dane Daud raris lunga nglanturang pamargin danene tur Ida Sang Prabu Saul raris mantuk ka purin idane.