Dual Panel1Dane tumuli makta tur ngenahang Peti Prajanjiane punika ring tengah kemah sane sampun kacawisang antuk Ida Sang Prabu Daud. Dane raris ngaturang aturan maborbor, aturan karahayuan ring ayun Ida Sang Hyang Widi Wasa.
2Sasampune Ida Sang Prabu Daud puput ngaturang aturan, ida tumuli ngamertanin rakyate sajeroning parab Ida Sang Hyang Widi Wasa,
3tur ngedumang pangan kinum ring rakyate sami. Asing-asing wong Israel lanang istri icen ida roti abungkul, daging magoreng atebih miwah roti kismis.
4Ida Sang Prabu Daud taler ngamanggehang makudang-kudang wong Lewi buat ngancangin pangubakti ring ajeng Ida Sang Hyang Widi Wasa, Widin Israele ring ajeng Peti Prajanjiane, malantaran makidung tur muji Ida.
5Dane asap kamanggehang dados pamimpin, tur Dane Sakaria dados wakilnyane. Dane Yeiel, Semiramot, Yehiel, Matica, Eliab, Benaya, Obed-Edom miwah Dane Yeiel, dados juru tabuh kecapi. Dane Asap dados juru tabuh cengceng,
6tur panditane kekalih inggih punika Dane Benaya miwah Yehasiel patut tansah ngupin trompet ring arepan Peti Prajanjiane.
7Sapanglanturipun ngawit saking rahina punika Ida Sang Prabu Daud ngicen Dane Asap miwah parawong Lewi semeton danene tetegenan buat dados juru kidung muji Ida Sang Hyang Widi Wasa.
Kidun
8Matur panyuksmaja pamantuka ring Ida Sang Hyang Widi Wasa, uar-uarangja kagungan Idane. Critayangja ring parabangsane paindikan sane sampun kardi Ida.
9Makidungja muji Ida Sang Hyang Widi Wasa, tuturangja pakardin Idane sane kalintang luih.
10Pada liangja santukan iraga dados padruen Idane. Sawatek anake sane nyumbah Ida mangda pada masuka rena.
11Ruruhja Ida Sang Hyang Widi Wasa buat nunas pitulungan, tur tansah baktininja Ida.
12Ih parakaturunan Yakub, parekan Ida Sang Hyang Widi Wasa. Ih katurunan Israel, seselikan Ida Sang Hyang Widi Wasa. Elingangja katawahan-katawahan sane sampun kakardi antuk Ida Sang Hyang Widi Wasa, miwah pasisip sane tiwakang Ida.
13(16:12)
14Ida Sang Hyang Widi Wasa punika, Widin iragane. Pituduh Idane punika pabuat jagate makasami.
15Sampunangja kantos lali ring prajanjian Ida Sang Hyang Widi Wasa, sane kardi Ida buat salami-laminipun.
16Inggih punika prajanjian sane kardi Ida marep ring Dane Abraham miwah sane kardi Ida ring Dane Ishak.
17Ida Sang Hyang Widi Wasa ngardi prajanjian ring Dane Yakub, inggih punika: Prajanjian sane langgeng.
18Kadi asapuniki pangandikan Idane: “Ulun lakar maicayang teken kita tanah Kanaan. Tanahe ento lakar dadi pagelahan kitane.”
19Kaulan Ida Sang Hyang Widi Wasa wantah akidik cacakanipun, tur dados wong sunantara ring tanah Kanaan.
20Ipun ngumbara saking genahe sane asiki ka genahe sane tiosan, saking kaprabon sane asiki ka kaprabone sane lianan.
21Nanging Ida Sang Hyang Widi Wasa nenten pacang manggayang kaulan Idane katindes. Ida jaga melanin ipun samaliha Ida jaga miteketin pararatune sapuniki:
22“Eda plegendahanga parekan seselikan Ulune, tur eda bencanena nabi-nabin Ulune.”
23Ih jadma saduuring jagat, makidungja muji Ida Sang Hyang Widi Wasa. Uar-uarangja nyabran rahina orti rahayu indik Ida sampun ngrahayuang iraga.
24Lumbrahangja kamulian Idane ring parabangsane, miwah pakardi-pakardin Idane sane mawisesa ring jagate sami.
25Ida Sang Hyang Widi Wasa Maha Agung tur patut kapuji-puji. Ida patut kaluihang langkungan ring sakancan paradewane.
26Dewan sakancan bangsane sane tiosan puniki wantah arca-arca, nanging Ida Sang Hyang Widi Wasa sane ngardi akasane.
27Kamulian lan kagungan ngliput Ida, kawisesan miwah kabungahan sane ngebekin Perhyangan Idane.
28Pujija Ida Sang Hyang Widi Wasa ih jadma saduuring gumi. Pujija kamulian miwah kawisesan Idane.
29Pujija Ida Sang Hyang Widi Wasa sane mulia. Aturangja aturane tur ngranjingja ka Perhyangan Idane. Sumungkemja ring ayun Ida Sang Hyang Widi Wasa rikalaning Ida nyalantara sajeroning kasucian Idane.
30Ih saisin mrecapada, jejeh ngetorja ring ayun Idane! Jagate sampun kagenahang ring genahnyane tur nenten prasida kagingsirang.
31Pada liangja ih akasa miwah pretiwi! Tuturangja ring parabangsane, mungguing Ida Sang Hyang Widi Wasa punika jumeneng ratu.
32Pada makerugja, ih segara miwah saluiring gumatap-gumitip sane wenten irika. Pada liangja ih pategalan miwah sadagingnya makasami.
33Taru-tarune ring alase pacang masuryak kabatek antuk liangnyane ring ayun Ida Sang Hyang Widi Wasa rikala Ida rauh mrentah jagate punika.
34Matur panyuksmaja ring ayun Ida Sang Hyang Widi Wasa, santukan ida kalintang becik. Sih kapitresnan Idane langgeng salawas-lawasnya.
35Maturja asapuniki ring Ida: “Rahayuangja titiang duh Ratu Sang Hyang Widi Wasa, juru rahayun titiange. Punduhangja titiang sinarengan, tur rahayuangja titiang saking bangsa-bangsane, mangda titiang mrasidayang ngaturang panyuksma tur muji parab Palungguh IRatu sane suci.”
36Pujija Ida Sang Hyang Widi Wasa Widin Israele! Pujija Ida sane mangkin miwah salami-laminipun. Raris rakyate makasami masaur manuk “Amin” sarwi muji Ida Sang Hyang Widi Wasa.
Pangu
37Ida Sang Prabu Daud ngamanggehang Dane Asap miwah parasemeton danene wong Lewi mangda tetep ngamargiang pangubakti sakadi sane sampun kamargiang ring genah panyimpenan Peti Prajanjiane. Dane sareng sami patut ngamargiang tetegenannyane irika nyabran rahina.
38Dane Obed-Edom okan Dane Yedutun kasarengin antuk anak nem dasa kutus diri saking palingsehan danene patut ngrombo dane irika. Dane Hosa miwah Dane Obed-Edom kapisara ngebag gapurane.
39Sang Pandita Sadok miwah parapandita semeton danene kapisara ngamargiang pangubakti ring ayun Ida Sang Hyang Widi Wasa ring genah pangubaktine ring Gibeon.
40Nyabran semeng miwah nyoreang dane patut morbor aturan maborbor ring pamorboran aturane manut sakadi sane kasuratang ring cakepan pidabdab sane kapaicayang antuk Ida Sang Hyang Widi Wasa ring wong Israele.
41Dane kasarengin antuk Dane Heman miwah Dane Yedutun miwah sane tiosan sane kaselik buat makidung muji Ida Sang Hyang Widi Wasa, duaning sih pasuecan Idane sane langgeng.
42Dane Heman miwah Dane Yedutun taler kapisara buat ngupin trompet miwah nabuh cengceng miwah tetabuhan sane lianan rikalaning kidung puji-pujiane kunggahang. Warga palingsehan Dane Yedutun sane kapisara ngebag gapurane.
43Wusan punika rakyate suang-suang raris pada budal, tur Ida Sang Prabu Daud taler mantuk buat matemu ring kulawargan idane ring puri.