Alkitab Mobile SABDA
[VER] : [BALI]     [PL]  [PB] 
 <<  1 Tawarikh 18 >> 

Kamen

1Sasampune punika, Ida Sang Prabu Daud malih mayuda nglawan bangsa Pilistin tur ipun kaonang ida. Ida ngrampas kota Gat rauh ka desa-desa sane wenten ring kiwa tengennyane.

2Ida taler ngaonang bangsa Moab, mawinan ipun raris kajajah tur naur upeti ring ida.

3Sapangrarisipun Ida Sang Prabu Daud ngebug Sang Prabu Hadadeser, ratune ring Soba, sane nampek ring wewidangan Hamat ring panegara Siria, santukan Ida Sang Prabu Hadadeser mapakayun nguasain wewidangan Tukad Eprate sane ring luanan.

4Saking Sang Prabu Hadadeser Ida Sang Prabu Daud ngrampas kreta perang siu akehipun, prajurit sane nunggang kuda pitung tali akehipun miwah prajurit sane lumampah kalih dasa tali diri. Ida molih kuda buat ngedeng kretan idane satus, tur sisannyane kaelung buntutnyane.

5Rikala wadua balan wong Siriane saking Damsik rauh nulungin Ida Sang Prabu Hadadeser, Ida Sang Prabu Daud raris ngebug wadua balane punika tur ngamademang kalih likur tali akehipun.

6Sasampune punika ida raris ngenahang wadua balan idane ring wewidangan mesehe, tur ipun kajajah saha naur upeti ring ida. Ida Sang Hyang Widi Wasa ngawinang Ida Sang Prabu Daud molih ring rana milehan.

7Ida Sang Prabu Daud ngrampas tameng mas sane kabakta antuk prakangge-prakanggen Sang Prabu Hadadeser raris kabakta ka Yerusalem.

8Ida taler makta temaga akeh pisan saking kota Tibhat miwah kota Kun, inggih punika kota-kota sane kaprentah antuk Ida Sang Prabu Hadadeser. (Wekasan Ida Sang Prabu Salomo ngunayang temagane punika buat makarya bak sane ageng, sesaka-sesaka miwah prabot-prabot temaga ring Perhyangan Agung.)

9Ida Sang Prabu Tou, prabune ring Hamat mireng mungguing Ida Sang Prabu Daud sampun ngaonang wadua balan Ida Sang Prabu Hadadeser makasami.

10Duaning punika, ida raris ngutus Ida Yoram putran idane, nangkil ring Ida Sang Prabu Daud, buat ngaturang pangayu bagia, duaning ida sampun molih ring rana nglawan Ida Sang Prabu Hadadeser sane pecak tansah ngyudain Ida Sang Prabu Tou. Ida Yoram makta aturan ring Ida Sang Prabu Daud marupa barang-barang sane malakar antuk mas, perak miwah temaga.

11Ida Sang Prabu Daud ngaturang barang-barang punika buat kanggen sajeroning pangubakti sinarengan ring mas miwah perak sane rampas ida saking bangsa-bangsa sane kaonang ida, inggih punika bangsa Edom, Moab, Amon, Pilistin miwah Amalek.

12Dane Abisai okan Dane Seruya, ngaonang wong Edom ring Lebak Pakehe, tur ngamademang wong Edom plekutus tali akehipun.

13Dane raris ngenahang wadua balan danene ring sakuub tanah Edom, tur panegarane punika dados jajahan Ida Sang Prabu Daud. Ida Sang Hyang Widi Wasa ngawinang Ida Sang Prabu Daud tansah molih ring rana.

14Ida Sang Prabu Daud mrentah sakuub wong Israele tur ngrajegang kadilan miwah kapatutan pabuat kaulan idane.

15Dane Yoab okan Dane Seruya, kadegang dados senapati, tur Dane Yosapat okan Dane Ahilud kapisara dados bendahara.

16Dane Sadok okan Dane Ahitub miwah Dane Ahimelek okan Dane Abyatar kadegang dados pandita. Dane Sausa kadegang dados sekretaris negara.

17Dane Benaya okan Dane Yoyada kadegang dados komandan pasukan wong Kreti miwah wong Pleti tur paraputran Ida Sang Prabu Daud polih linggih sane utama sajeroning pamrentahan idane.


  Share Facebook  |  Share Twitter

 <<  1 Tawarikh 18 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel