Dual PanelIda S
1Sasampune punika Ida Sang Prabu Nahas, ratun wong Amone raris seda, tur Ida Hanun putran Idane kadegang dados ratu.
2Ida Sang Prabu Daud raris ngandika asapuniki: “Gelahe lakar nyinahang pasawitran ngajak Ida Hanun, buka ajin idane masawitra teken gelah.” Punika awinan Ida Sang Prabu Daud raris ngutus utusan idane buat nyinahang rasa bela sungkawa duaning sedan ajin Ida Sang Prabu Hanun. Nanging rikala utusane punika rauh ring panegara Amon tur tangkil ring Ida Sang Prabu Hanun,
3parapamimpin wong Amone raris matur ring Sang Prabu Hanun sapuniki: “Punapike palungguh iratu mitaenang utusan Ida Sang Prabu Daud rauh mriki mula wantah buat nyinahang rasa kaduhkitan idane uli krana sedan ajin iratune? Sujatinne nenten pisan kadi asapunika. Ida ngutus utusane punika mriki dados mata-mata buat jaga nyelehin jagate puniki mangda sida antuk ida ngaonang.”
4Ida Sang Prabu Hanun tumuli ngejuk utusan Ida Sang Prabu Daud, tur nyukur jenggotnyane saha ngetep panganggennyane rauh ring bangkiang, tur ipun raris katundung mangda budal.
5Utusane punika rumasa kalintang kimud mawali budal. Rikala Ida Sang Prabu Daud mireng indike punika, ida ngandikayang mangda ipun nyantos ring Yeriko, tur sampunang mawali sadurung jenggotnyane sampun tumbuh malih.
6Ida Sang Prabu Hanun miwah wong Amone sami tumuli pada uning mungguing indike punika sampun ngawinang Ida Sang Prabu Daud dados mesehnyane. Punika awinannya ida-dane raris nyewa kreta perang miwah prajurit nunggang kuda saking Siria-Mesopotamia, saking Siria-Maaka miwah saking Siria-Soba antuk perak tigang dasa tali kilogram.
7Kreta tigang dasa kalih tali sane kasewa punika miwah wadua balan sang prabu Maakane raris rauh tur ngwangun kemah nampek ring Medeba. Wong Amone taler pada medal saking sakancan kotannyane tur pada sayaga buat mayuda.
8Rikala Ida Sang Prabu Daud mireng indike punika, ida raris mrentahang Dane Yoab miwah wadua balane sami.
9Wong Amone punika raris ngarepang tur ngatur gelarnyane ring margine sane ngranjing ka Raba, ibukotannyane, miwah pararatu kantinnyane pada ngatur gelarnyane ring tegale jimbar.
10Rikala Dane Yoab uning mungguing mesehe jaga ngebug saking ajeng miwah saking ungkur, irika dane nyelik prajurit Israele sane becik-becik tur kagenahang mapas wong Siriane punika.
11Wadua balane sane tiosan serahang dane ring reh-rehan Dane Abisai semeton danene, tur kagenahang buat ngarepin wong Amone.
12Dane Yoab mabaos ring semeton danene sapuniki: “Yen adi ningalin beli kelilih nglawan wong Siriane, lautang tulungin beli. Yen adi kelilih nglawan wong Amone beli lakar nulungin adi.
13Eda lenga tur edaja jejeh. Jalanja sahasa maperang buat rakyat iragane muah buat kotan Widin iragane. Dumadakja pakarsan Ida Sang Hyang Widi Wasa lakar kasidan.”
14Dane Yoab miwah prajurit-prajurit danene raris mangseh magegebug tur wadua bala Siriane pada jerih kapilayu.
15Rikala wong Amone ngeton wong Siriane jerih kapilayu, ipun tumuli malaib saking ajeng Dane Abisai tur ngranjing ka kota. Sasampune punika Dane Yoab raris mawali ka Yerusalem.
16Rikala wong Siriane uning mungguing ipun sampun kakaonang antuk wong Israele, ipun raris ngrauhang prajurit saking wewidangan Siriane sane dangin Tukad Eprat, raris kaserahang ring Dane Sobak senapatin wadua balan Ida Sang Prabu Hadadeser saking Soba.
17Rikala Ida Sang Prabu Daud mireng indike punika, ida raris munduhang wadua bala Israele tumuli nglintangin Tukad Yordane, tur ngatur gelar mapas wong Siriane punika. Yudane raris ngawitin,
18tur wong Israele nangsek wadua balan wong Siriane kantos ipun pada makirig. Ida Sang Prabu Daud miwah wadua balan idane ngamademang panunggang kreta perang wong Siriane pitung tali akehipun miwah prajurit sane lumampah petang dasa tali diri. Ida taler nyedayang Dane Sobak senapatin wadua balan wong Siriane.
19Rikala pararatune sane kajajah antuk Ida Sang Prabu Hadadeser uning mungguing ida sampun kakaonang antuk wong Israele, ida tumuli madame ngiring Ida Sang Prabu Daud tur nyadia dados jajahan idane. Ngawit saking dauhe punika wong Siriane nenten purun malih makanti ring wong Amone.