Dual PanelAtura
1Ida Sang Prabu Daud tumuli ngandika ring anake sane paum irika sapuniki: “Pianak tiange Salomo ane suba kapilih baan Ida Sang Hyang Widi Wasa, nanging ia enu kaliwat wimuda tur tonden ngelah pengalaman. Gegaene ane lakar kagarap ento gede pesan, sawireh wewangunane ento tidongja buat tongos manusa nanging pabuat Ida Sang Hyang Widi Wasa.
2Tiang suba mapakibeh sasida-sidan buat nyediang saluiring lakar wewangunan Perhyangane ento, minakadinne: Mas, perak, temaga, besi, kayu, batu, sesocan ane luih-luih muah sesocan sarwa mule, batu ukiran muah marmer.
3Sajaba ento, tiang masih suba nyediaang mas muah perak gelah tiange padidi ane lakar aturang tiang, baan tresnan tiange teken Perhyangan Ida Sang Hyang Widi Wasa.
4Tiang suba ngaturang mas ane paling melaha lebihan teken satus ton, buina meh ada jenenga satak petang dasa ton perak murni pabuat rerenggan tembok Perhyangan Agunge ento,
5muah pabuat sakancan ane lakar kagarap baan tukang ukire. Ane jani nyenke buin ane saking suka lila lakar nyerahang arta brananne buat katurang teken Ida Sang Hyang Widi Wasa?”
6Irika parapanglingsir palingsehane, parakepala suku, parasenapatin wadua balane miwah prakanggene sane ngetangang arta branan purine saking suka lila maturan.
7Dane pada ngaturang barang-barang pabuat pakaryan ring Perhyangan Agung, inggih punika: Mas langkungan ring satus pitung dasa ton, perak tigang atus petang dasa ton langkung, temaga meh wenten tigang atak kalih dasa ton, samaliha besi wenten tigang tali samas ton langkung.
8Anake sane madue sesocan, ngaturang sesocannyane buat dados arta branan Perhyangan Agunge tur kacatet antuk Dane Yehiel, wong Lewi saking palingsehan Dane Gerson.
9Pasamuane saking suka lila pada maturan ring Ida Sang Hyang Widi Wasa tur ipun marasa liang pisan, duaning aturannyane sampun akeh pisan. Kadi asapunika taler Ida Sang Prabu Daud, ida rumasa seneng pisan.
Ida S
10Irika ring arepan anake paum sareng sami, Ida Sang Prabu Daud muji Ida Sang Hyang Widi Wasa, kadi asapuniki: “Ida Sang Hyang Widi Wasa, Widin Yakube leluur iragane dumadak kapuji salawas-lawasne.
11Palungguh IRatu maha agung tur kalintang wisesa, luihing luih, kalintang mulia miwah maha wisesa. Sawatek sane wenten ring suargan miwah ring jagate sami padruen Palungguh IRatu. Palungguh IRatu sane makadados Ratu sane maha luur, sane ngwengku makasami.
12Kasugihan miwah kamulian makasami rauhnya saking Palungguh IRatu. Palungguh IRatu ngwengku makasami antuk kakuatan miwah kuasan Palungguh IRatu, tur wantah Palungguh IRatu sane ngawinang jadmane dados agung miwah kukuh bakuh.
13Sane mangkin, duh Ratu Widin titiange, titiang ngaturang panyuksma ring ajeng Palungguh IRatu, tur titiang muji kaluihan parab Palungguh IRatu.
14Rakyat titiange miwah titiang sujatinipun nenten mrasidayang ngaturang punapa-punapi ring Palungguh IRatu, santukan saluiring sane wenten punika paican Palungguh IRatu ring titiang, tur titiang wantah mawali ngaturang paican Palungguh IRatu punika.
15Palungguh IRatu wikan, duh Ratu Sang Hyang Widi Wasa, mungguing titiang muponin uripe punika waluya sakadi jadma maselong wiadin wong sunantara, pateh sakadi leluur titiange. Tuuh titiange waluya sakadi lawate sane mamargi, nenten prasida luput saking sang pati.
16Duh Ratu Sang Hyang Widi Wasa, Widin titiange, titiang sareng sami sampun ngaturang brana buat ngwangun Perhyangan pabuat ngluihang parab Palungguh IRatu sane suci, nanging branane punika sami kawitipun saking Palungguh IRatu, samaliha punika makasami wantah druen Palungguh IRatu.
17Titiang uning mungguing Palungguh IRatu nyugjugin manah sakancan manusane, tur Palungguh IRatu ledang ring jadmane sane jujur. Titiang ngaturang puniki makasami ring ajeng Palungguh IRatu, madasar antuk manah sane jujur miwah nulusing ati, samaliha titiang sampun ngeton mungguing kaula druene sane mapunduh iriki sami pada suka rena ngaturang aturannyane ring ajeng Palungguh IRatu.
18Duh Ratu Sang Hyang Widi Wasa, Widin leluur titiange Abraham, Ishak miwah Yakub, ledang Palungguh IRatu tansah ngamanggehang kasatiaan manah kaula druene, samaliha piaraja ipun mangda prasida tansah satia ring Palungguh IRatu.
19Icenja pianak titiange Salomo manah sane jujur buat ninutin sapatitah Palungguh IRatu, samaliha buat ngwangun Perhyangan Agung sane lakar-lakarnyane sampun sediaang titiang.”
20Wusan punika Ida Sang Prabu Daud raris mrentahang kaulan idane sapuniki: “Pujija Ida Sang Hyang Widi Wasa, Widin nyamane!” Irika anake sane paum irika sami muji Ida Sang Hyang Widi Wasa Widin leluurnyane, tur ipun pada sumungkem saha ngluihang Ida Sang Hyang Widi Wasa miwah ida sang prabu.
21Benjangnyane, ida dane pada nampah wewalungan buat aturan, tumuli katurang ring Ida Sang Hyang Widi Wasa. Sapangrarisipun ulame punika kapaicayang ring rakyate mangda katunas. Samaliha ida dane ngaturang banteng siu ukud, biri-biri muani siu ukud, pianak biri-biri siu ukud, tur makasami punika kaborbor ring pamorboran aturane. Ida dane taler ngaturang toya anggur.
22Duaning punika rahinane punika ida dane pada kalintang bagia, rikalaning ida dane ipun pada mangan nginum ring ayun Ida Sang Hyang Widi Wasa. Sasampune punika buat kaping kalihipun, ida dane pada nguarang indik Ida Sang Prabu Salomo jumeneng nata. Sajeroning parab Ida Sang Hyang Widi Wasa, Ida Sang Prabu Salomo kabiseka dados pamrentah, miwah Dane Sadok kabiseka dados pandita.
23Kadi asapunika Ida Sang Prabu Salomo ngentosin Ida Sang Prabu Daud ajin idane ring singasana sane sampun kamanggehang antuk Ida Sang Hyang Widi Wasa. Ida Sang Prabu Salomo sida karya ring pamargin idane, tur sawatek bangsa Israele sami pada satinut ngiring ida.
24Paraprakanggene miwah paraprajurite, kadi asapunika taler putran Ida Sang Prabu Daud sane tiosan, sami pada subakti ring Ida Sang Prabu Salomo.
25Ida Sang Hyang Widi Wasa ngawinang parabangsane sami pada angob ring Ida Sang Prabu Salomo, tur Ida taler ngawinang sang prabu luihan ring pararatu sane tiosan sane naenin mrentah ring Israel.
Indik
26Ida Sang Prabu Daud okan Dane Isai mrentah sakuub bangsa Israele,
27petang dasa taun suenipun. Ida mrentah ring Hebron pitung taun tur ring Yerusalem tigang dasa tiga taun suenipun.
28Ida seda sasampune ida lingsir pisan. Ida kalintang sugih tur kabinawa, tur putran idane Ida Salomo sane ngentosin ida madeg ratu.
29Babad Ida Sang Prabu Daud ngawit saking pangawit rauh ka pamuput, punika sinurat ring cakepan paranabine tetiga, inggih punika: Nabi Samuel, Nabi Natan miwah Nabi Gad.
30Ring cakepan punika sinurat indik idane mrentah, indik kakuatan idane miwah saananing paindikan sane nibenin ida, nibenin bangsa Israel miwah nibenin kaprabon-kaprabon sane wenten ring kiwa tengennyane.