Dual Panel1Titiang sareng sami lekad sajeroning kawentenan sane lemet tur nenten maderbe panulung. Tuuh titiange cutet tur kaliput antuk kamewehan.
2Titiang tumbuh tur gelis layu tan bina sakadi sekare, tur titiang sirna sakadi lawate.
3Duh Ratu Sang Hyang Widi Wasa, punapike Palungguh IRatu ledang macingak ring titiang, wiadin Palungguh IRatu jaga makta titiang ka pangadilan tur nepasin titiang?
4Tan wenten jadma sane suci jaga mijil saking manusa sane cemer.
5Sadurung ipun lekad, panjang tuuhnyane miwah akeh paindikan sane jaga entap ipun sampun kapastikayang. Palungguh IRatu sane sampun ngamastikayang indike punika, tur indike punika nenten prasida malih kubah.
6Ledang Palungguh IRatu nenten malih nglinguang ipun, tur banggayang ipun meweh irika. Yen ipun mrasidayang, banggayang ipun muponin uripipune sane meweh punika.
7Pabuat tarune sane sampun kabah, kantun wenten pangajap-ajapipune. Ipun jaga mrasidayang malih urip miwah macarang.
8Yadiastun akahipune sayan sue sayan wayah, miwah bungkilipune padem ring tanahe,
9yening wenten toya, ipun jaga mentik malih sakadi taru sane muda.
10Nanging yening manusane padem, punika dados pamuput uripipune. Sasampune ipun padem, ring dijake ipun?
11Sakadi tukad sane wusan membah miwah sakadi danu sane jaga tuh,
12jadmane punika padem tur ipun nenten naenin malih jaga urip. Ipun nenten naenin bangun malih sakantunne wenten langit. Ipun nenten jaga naenin enten saking pulesipune.
13Pinunas titiang, ledang Palungguh IRatu ngengkebang titiang ring pati loka. Banggayang titiang mengkeb irika kantos pidukan Palungguh IRatune surud. Sasampune punika wentenangja sela buat ngelingang titiang.
14Yening jadmane padem, punapike ipun mrasidayang malih murip? Nanging titiang jaga nyantosang masa sane becik, titiang nyantosang kantos masane sane meweh puniki puput.
15Irika Palungguh IRatu jaga ngesengin titiang, tur titiang jaga masaur tur Palungguh IRatu jaga ngledangin titiang, pakardin tangan Palungguh IRatune.
16Irika Palungguh IRatu jaga nlektek sakancan tindakan titiange, nanging Palungguh IRatu nenten jaga nureksain dosa-dosan titiange.
17Palungguh IRatu jaga ngampurayang, tur ngedohang dosa-dosan titiange. Palungguh IRatu jaga ngusap saananing kiwangan sane sampun kardi titiang.
18Jaga wenten masanipun gunung-gununge jaga rubuh, miwah batu kaang sane kukuh bakuh jaga pada magingsir.
19Sakadi toyane jaga ngawinang tutud ibatu kaang, miwah sabehe bales jaga nganyudang tanah, kadi asapunika Palungguh IRatu nyirnayang pangajap-ajap manusane sane mamanah urip.
20Palungguh IRatu mrakosa imanusa tur nundung ipun ngantos salami-laminipun. Muanipune mrungus sajeroning padem.
21Pianak-pianakipune muponin kamulian, nanging ipun nenten naenin uning ring indike punika, wiadin punapike ipun korahin rikalaning pianak-pianakipune muponin kanistan.
22Ipun wantah ngrasayang sakit dewekipune niri, miwah kaduhkitan manahipune newek.”