Dual Panel1Dane Ayub tumuli masaur sapuniki: “Sadurung punika, tiang sampun naenin miragiang bebaosan sane kadi asapunika. Panglipur sane paicayang semeton punika wantah dados kasangsaran pabuat tiang.
2(16:1)
3Punapike semeton nenten jaga wus-wusan mabaos? Punapike jaga nenten telas-telas baos semetone?
4Yening kawentenan semetone sakadi kawentenan tiange mangkin miwah tiang sakadi kawentenan semetone, tiang taler mrasidayang ngwedalang baos sakadi baos semetone punika. Tiang taler mrasidayang kitak-kituk ring ajeng semetone sarwi ngucut semeton antuk bebaosan.
5Tiang jaga ngamanggehang pakayun semetone antuk pitutur, tur nenten jaga wus-wusan mabaos buat nglipur semeton.
6Nanging sane baosang tiang punika nenten mapikolih, samaliha yening tiang mendep rasan sakit tiange taler nenten rered.
7Duh Ratu Sang Hyang Widi Wasa, Palungguh IRatu sampun ngawinang titiang leleh. Palungguh IRatu sampun manggayang kulawargan titiange kapademang.
8Palungguh IRatu sampun ngejuk titiang. Palungguh IRatu mameseh ring titiang. Titiang kantun wantah tulang kakaput antuk ikulit, tur indike punika kanggen bukti antuk anake sami mungguing titiang maiwang.
9Antuk pidukan Ida, Ida Sang Hyang Widi Wasa mesbes tiang kantos tiang dekdek inggel, tur Ida nyureng tiang antuk bendu.
10Jadmane pada ngewerin tiang, tur ipun pada ngiter tiang tur nampel muan tiange.
11Ida Sang Hyang Widi Wasa sampun nyerahang tiang ring jadmane dursila.
12Tiang sampun muponin sutrepti, nanging Ida Sang Hyang Widi Wasa mecik baong tiange, tur nigtig tiang miwah ngenyagang tiang. Ida Sang Hyang Widi Wasa nganggen tiang dados sasaran.
13Samaliha Ida ngujanin tiang antuk panah saking kiwa tengen, saking arep miwah saking ungkur, inggih punika panah sane nyetset miwah natunin tiang. Samaliha Ida nenten pisan madalem tiang.
14Ida nenten mari natunin tiang. Ida ngebug tiang waluya sakadi prajurit sane karangsukan antuk angkara murka.
15Tiang kaduhkitan tur nyaluk pangangge sane malakar antuk karung tur tiang kaon saha maguyang iriki ring abune.
16Tiang sampun ngeling ngarod masesambatan ngantos muan tiange barak, matan tiange ngantos bengul tur bulun matan tiange dempet.
17Nanging tiang nenten maiwang lantaran nyakitin anak lianan, tur pangastawan tiange pamantuka ring Ida Sang Hyang Widi Wasa saking nulusing ati.
18Duh pretiwi, sampunangja engkebanga laksana-laksanane sane iwang sane katuekang ring tiang. Sampunangja banggayanga panulamen tiange buat nunas kadilan kabungkem.
19Irika ring suargan sane mangkin nenten wenten anak sane ngadeg sane nindihin tiang.
20Sawitran tiange pada nganistayang tiang. Matan tiange mespes yeh mata ring ayun Ida Sang Hyang Widi Wasa.
21Tiang meled mangda wenten anak sane nindihin tiang ring ayun Ida Sang Hyang Widi Wasa, sakadi anak sane matindih marep ring timpalnyane.
22Sane mangkin tuuh tiange nglantur mamargi. Tiang nglanturang pamargi tur nenten mrasidayang malih mawali.