Dual PanelDane
1Rikala sampun rauh masannyane parawadua balan Ida Sang Hyang Widi Wasa pedek tangkil ring ayun Idane, Ratun Setane taler sareng pedek tangkil irika.
2Ida Sang Hyang Widi Wasa tumuli nakenin ipun sapuniki: “Kita teka uli dija?” Ratun Setane tumuli matur sapuniki: “Titiang sampun nglelana nylajah jagate makasami.”
3Ida Sang Hyang Widi Wasa malih ngandika: “Subake tepukin kita I Ayub, parekan Ulune? Tusing ada anak di gumine ane astiti bakti muah sadu buka iane. Ia astiti bakti teken Ulun, tur tusing taen malaksana dursila. Kita suba nglelunyuhin Ulun, apanga Ulun nglugrain kita jeg tan pakrana nempuh ia. Nanging I Ayub enu masih astiti bakti buka ane suba-suba.”
4Ratun Setane malih matur sapuniki: “Kulit siluripun kulit. Jadmane nyadia nyerahang saananing paderbeanipune, mangdane ipun kantun urip.
5Nanging sane mangkin yen Palungguh IRatu nyakitin dewekipune, menawita ipun jaga nemah Palungguh IRatu ring ayun Palungguh IRatune!”
6Duaning punika, Ida Sang Hyang Widi Wasa raris ngandika ring Ratun Setane punika sapuniki: “Nah ia jani serahang Ulun teken kita, sakewala eda ia matianga.”
7Sasampune punika Ratun Setane raris mapamit saking ayun Ida Sang Hyang Widi Wasa, tumuli ipun nibenin ragan Dane Ayub makaukud antuk pinakit busul sane raat pisan, ngawit saking duur ngantos rauh ka tlapakan cokor danene.
8Dane Ayub tumuli malinggih ring buke, tur ngambil clebingkah atebih anggen dane ngasgas ragan danene.
9Rabin danene tumuli matur ring dane sapuniki: “Beli nu dogen astiti bakti teken Ida Sang Hyang Widi Wasa buka ane suba-suba. Melahan beli nemah Ida Sang Hyang Widi Wasa, suud keto laut mati.”
10Pasaur Dane Ayub sapuniki: “Nyai ngawag-awag dogen ngraos. Dugase Ida Sang Hyang Widi Wasa mapaica ane melah teken iraga, iraga nrima paicane ento saking liang. Ngudiang dadi iraga ngamigmig, dikalane Ida mapaica kakewehan teken iraga?” Ring sajeroning saluiring paindikan sane katandangin antuk Dane Ayub, dane nenten pisan wenten mabaos sane tan patut pamantuka ring Ida Sang Hyang Widi Wasa.
Dane
11Dane Ayub madue sawitra tigang diri, inggih punika: Dane Elipas saking kota Teman, Dane Bildad saking tanah Suah miwah Dane Sopar saking tanah Naamah. Rikala dane sareng tiga mireng indik kasangsaran sane katandangin antuk Dane Ayub, dane raris pada saigum jaga ngrauhin dane, buat jaga nglipur dane.
12Saking doh Dane Ayub sampun kacingak antuk dane sareng tiga, nanging nenten kelingan antuk dane. Sasampune kelingan antuk dane, dane tumuli nangis gerong-gerong. Dane rumasa duhkita, sarwi nyetset busanan danene miwah nyambehang abu ka langite miwah ring prabun danene suang-suang.
13Sasampune punika dane raris malinggih sareng-sareng ring tanahe, kantos pitung rahina suenipun, saha nenten mabaos angan abuku. Santukan sampun aksi dane, kadi asapunapi ageng kasangsaran sane katandangin antuk Dane Ayub.