Dual Panel1Dane Sopar tumuli masaur sapuniki: “Inggih semeton Ayub! Semeton ngawinang manah tiange bingung. Sane mangkin tiang tan dados tan pacang masaur.
2(20:1)
3Paindikan sane nikayang semeton punika nganistayang tiang, nanging tiang uning kadi asapunapi patutipun tiang nyaurin baos semetone punika.
4Sujatinipun semeton uning, mungguing saking purwakala rikala manusane ngawitin wenten ring mrecapada,
5nenten wenten jadma dursila sane prasida muponin kaliangan ngantos sue.
6Ring pradene ipun mrasidayang dados anak agung, tur kagunganipune nyujuh langit kantos tenggekipune nganteg ring ambune,
7nanging ipun jaga kupin waluya sakadi abu. Anake sane naenin uning ring ipun jaga pada meled uning kijake pakaonipune.
8Ipun jaga sirna waluya sakadi ipiane, sakadi wahyune rikala wengi. Tur nenten jaga kanten malih.
9Ipun jaga ical saking genahipune magumana.
10Tur pianak-pianakipune jaga mamaling paderbean anake tiwas-tiwas, tur indike punika jaga anggen ipun kamelahan.
11Dewekipune jaga sakadi anak muda tur mempeng sitengnyane, nanging indike punika jaga digelis mawali dados abu.
12Indik kadursilane punika rasayang ipun becik, kantos wenten sane sepsep ipun ring bungutipune.
13(20:12)
14Nanging ring basangipune, dedaarane punika magentos dados pait makilit waluya sakadi pait rasan racune.
15Jadmane dursila ngutahang arta branane sane antuk ipun mamaling, tur Ida Sang Hyang Widi Wasa malih ngambil arta branane punika yadiastun sampun wenten ring tengah basangipune.
16Paindikane sane kuluh antuk jadmane dursila punika waluya sakadi racun. Indike punika tan bina sakadi pangugut ulane sane mranen.
17Ipun nenten jaga nemuang tukad-tukad minyak saitun, wiadin tukad-tukad sane toyannyane susu miwah madu.
18Ipun jaga ngwaliang sakancan sane dados pikolihipune. Ipun nenten jaga maderbe sela buat ngrasayang kasugihanipune.
19Santukan ipun sampun mrentahang miwah tan nglinguang anake tiwas, samaliha ipun ngrampas umah sane sampun kakardi antuk anak sane lianan.
20Kaloban ipune nenten jaga naenin ngawinang manahipune purna.
21Rikalaning ipun neda tan wenten sane kantun masisa, nanging sane mangkin kawibuhanipune sampun wusan.
22Rikala ipun nedeng muponin kawibuhanipune, ipun jaga katibenin antuk kasangsaran sane ageng pisan.
23Banggayang ipun neda napija sane demenin ipun! Ida Sang Hyang Widi Wasa jaga nyisipang ipun antuk bebendun Idane sane angarab-arab.
24Rikalaning ipun ngusahang ngluputang dewekipune saking pedang besine, iriki panah temagane sane jaga nuek tur ngamademang ipun.
25Muncuk panahe jaga nuek dewekipune ngantos bedah. Muncuk panahe sane ngendih ngetelang getihipune, tur paindikane sane ngresresin ngliput manahipune.
26Saluiring sane sampun punduhang ipun kasirnayang, tur geni sane boya saking manusa rauhnya jaga ngeseng ipun miwah kadang warganipune makasami.
27Akasane jaga nyinahang dosan jadmane puniki, tur pretiwine jaga dados saksi sane mameseh ring ipun.
28Sakancan kasugihanipune pacang sirna, sajeroning blabar pidukan Ida Sang Hyang Widi Wasa.
29Kadi asapunika kawentenanipun jadmane sane dursila, inggih punika nasib sane kapastikayang pabuat ipun, antuk Ida Sang Hyang Widi Wasa.”