Alkitab Mobile SABDA
[VER] : [BALI]     [PL]  [PB] 
 <<  Ayub 31 >> 

1Tiang sampun majanji, mungguing tiang nenten jaga naenin nganengneng anak luh antuk manah kasemaran.

2Punapike sane kakardi antuk Ida Sang Hyang Widi Wasa Sane Maha Kuasa ring iraga? Sapunapike antuk Ida ngwales laksanan manusane?

3Ida nibakang bencana miwah karusakan ring jadmane sane malaksana iwang.

4Ida Sang Hyang Widi Wasa wikan ring saluiring paindikan sane kardi tiang. Ida ngaksi saananing tindakan tiange.

5Tiang masumpah mungguing tiang nenten malaksana dursila miwah mamanah nguluk-nguluk anak lianan.

6Ledang Ida Sang Hyang Widi Wasa nimbang tiang antuk timbangan sane jujur, irika Ida jaga ngaksi mungguing tiang tan paiwang.

7Yening tiang lempas saking margine sane patut, wiadin manggayang dewek tiange kadaut antuk paindikan sane jaat, yening liman tiange kaletehin antuk dosa,

8kenginan banggayang pamupon tiange mangda karusak wiadin palawija sane tandur tiang mangda kateda antuk anak lianan.

9Yening tiang sampun ngedotang somah pisagan tiange, tur mengkeb ngantiang ipun ring obag-obagan jelananipune,

10dumadak mangda somah tiange nyakanang anak muani sane lianan miwah medem ring pedeman anak muani sane tiosan.

11Kajaatan sane kadi asapunika patut katiben danda pati.

12Indike punika tan bina sakadi genin kawah nrakane sane ngeseng, sane masmi saananing paderbean tiange.

13Rikalaning wenten panjak tiange maselselan ring tiang, tiang madingehang baosipune tur nepasin ipun saha adil.

14Yening tiang nenten nglaksanayang sakadi asapunika, sapunapi antuk tiang tangkil ring Ida Sang Hyang Widi Wasa? Napi sane jaga uningayang tiang yening Ida Sang Hyang Widi Wasa rauh nepasin tiang?

15Ida Sang Hyang Widi Wasa sane ngardi tiang, Ida taler ngardi panjak tiange.

16Tiang nenten naenin tulak pacang nulungin anake sane tiwas-tiwas. Tiang nenten naenin manggayang parabebalune urip tan maderbe pangajap-ajap,

17wiadin manggayang anake ubuh-ubuh pada mamargi naanang basang seduk, rikalaning tiang madaar.

18Sapanjang umur tiange, tiang sampun matiningin ipun.

19Rikalaning tiang manggihin anak sajeroning kakirangan, kalintang tiwas kantos nenten mrasidayang numbas pangangge,

20tiang ngwehin ipun pangangge sane malakar antuk wol sane kawitipun saking gompyokan biri-birin tiange. Kenginan ipun raris muji tiang saking saguluking manahipune.

21Yening tiang naenin nguluk-nguluk anak ubuh, ulihan tiang uning mungguing tiang jaga menang ring pangadilan,

22madak mangda liman tiange lung, tur madak ipun keles saking palan tiange.

23Santukan tiang ajerih ring pasisip Ida Sang Hyang Widi Wasa, kenginan tiang nenten jaga nglaksanayang paindikan sane kadi asapunika.

24Tiang sampun nenten naenin andel ring kasugihan,

25wiadin nyumbungang dewek antuk kasugihan tiange.

26Tiang sampun nenten naenin nyumbah matan ai ulihan galangipune, wiadin nyumbah bulan ulihan kaasriannyane.

27Tiang nenten naenin paling raris nyumbah bulan miwah surya malantaran nyakupang lima jaga mabakti ring ipun.

28Dosa sane asapunika patut katibakin danda pati. Indike punika dura cara pamantuka ring Ida Sang Hyang Widi Wasa Sane Maha Kuasa.

29Tiang nenten naenin marasa liang yening meseh tiange nandang sangsara wiadin liang ring manah yening ipun katempuh antuk bencana.

30Tiang nenten naenin ngardi dosa malantaran ngastawayang mangda ipun padem.

31Sawatek jadmane sane makarya ring tiang pada uning mungguing tiang setata liang nampi wong sunantara.

32Tiang setata nyimpangang anake sane maleluasan ring umah tiange, tur nenten naenin manggayang ipun nginep ring margine.

33Anak lian ngindayang ngengkebang dosanipune, nanging tiang nenten naenin ngengkebang dosan tiange.

34Tiang nenten ajerih ring paindikan sane baosanga antuk anake akeh. Tiang nenten naenin mapuik-puikan wiadin mengkeb jumah meten, ulihan takut ring temah pisuhipune.

35Punapike wenten anak sane jaga miragiang baos tiange? Tiang masumpah mungguing sabilang abuku baos tiange punika patut. Banggayang Ida Sang Hyang Widi Wasa Sane Maha Wisesa nyaurin tiang. Yening wenten dedalihan sane sampun katulis buat kanggen nalih tiang antuk meseh tiange mangda tiang mrasidayang ngwacen,

36surate punika jaga saluk tiang anggen tiang baju, tur jaga genahang tiang ring tendas tiange makadados gelungan.

37Tiang jaga nguningayang sakancan indik sane sampun laksanayang tiang ring Ida Sang Hyang Widi Wasa, tur nenten jaga nguntulang tenggek tiange ring ajeng Idane.

38Yening tiang sampun mamaling tanah gegarapan tiange tur ngambil tanahe punika saking anake sane patut nerbeang,

39yening tiang sampun nunas pamupon sane mentik irika, nanging manggayang petani sane nandur punika padem makenta,

40madakja irika tumbuh lalang miwah putri malu makadados silur gandum miwah pantune sane mentik irika.” Kadi asapunika Dane Ayub muputang baos danene.


  Share Facebook  |  Share Twitter

 <<  Ayub 31 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel