Dual PanelPitut
1Santukan Dane Ayub sampun cager ring ragan danene tan paiwang, kenginan sang tiga raris wusan mabaos ring dane.
2Nanging wenten anak lian sareng-sareng irika, mapesengan Elihu. Dane nenten mrasidayang malih nanggehang bendun danene, santukan Dane Ayub matutang ragan danene tur ngiwangang Ida Sang Hyang Widi Wasa. (Dane Elihu punika okan Dane Barakeel katurunan Dane Bus, maug sajeroning palingsehan Dane Ram.)
3Dane taler duka ring sawitran Dane Ayub makatetiga. Sang tiga nenten polih margi jaga nyaurin Dane Ayub, tur paindikane punika sane ngawinang pakantenanipun Ida Sang Hyang Widi Wasa sane iwang.
4Santukan Dane Elihu rumasa dane punika anak sane pinih muda ring pantarannyane, punika awinan dane nyantosang mangda sang tiga sami pada wusan mabaos.
5Rikala dane ngaksi mungguing sang tiga nenten mrasidayang nyaurin Dane Ayub, dane duka pisan,
6tumuli ngawitin mabaos, sapuniki: “Tiang puniki kantun wimuda, tur semeton sampun lingsir-lingsir. Punika awinanipun tiang ajerih nguningayang ring parasemeton, napi sane dados daging manah tiange.
7Kamanah antuk tiang, mungguing semeton sane patut mabaos, santukan semeton maraga kelihan, semeton patut ngadumang kawicaksanan semetone.
8Nanging sawiaktinipun sane rauh tur maicayang kawicaksanan ring imanusa punika Roh Ida Sang Hyang Widi Wasa Sane Maha Wisesa.
9Boya malantaran sampun lingsir raris jadmane dados wicaksana, wiadin ngawinang ipun uning ring sane patut.
10Duaning punika sane mangkin tiang nunas ring semeton, mangda ledang mirengang atur tiange. Icenja tiang nguningayang sane dados daging manah tiange.
11Tiang saking sabar miragiang rikalaning semeton sedek mabaos, tur nyantosang rikalaning semeton ngulati lengkara-lengkara sane wicaksana.
12Tiang nelebang pisan baos semetone, mawinan piragi tiang mungguing semeton tan sida karya. Semeton sampun nenten tungkas ring paindikan sane sampun kabaosang antuk Dane Ayub.
13Sapunapi antuk semeton jaga mabaos, mungguing semeton sane sampun molih kawicaksanane punika? Wantah Ida Sang Hyang Widi Wasa sane patut nyaurin Dane Ayub, santukan semeton sampun tan sida karya.
14Dane Ayub sampun mabaos ring semeton boyaja tiang. Duaning punika sane mangkin tiang pacang matur ring dane, nanging bina ring pasaur semetone.
15Inggih semeton Ayub, sang tiga sampun kaon. Dane nenten mrasidayang malih nyaurin semeton.
16Punapike patut tiang terus nyantosang, yening sang tiga sampun pada meneng? Dane pada ngadeg iriki tur nenten wenten malih sane mrasidayang nikayang dane.
17Tiang nenten jaga terus mendep. Sane mangkin tiang jaga ngaturang pasaur tiange newek, tur jaga nguningayang ring semeton daging manah tiange.
18Tiang rumasa nenten mrasidayang malih nyantosang buat jaga mabaos. Tiang nenten mrasidayang ngandeg baos tiange.
19Yening tiang nenten polih sela mabaos, tiang jaga makeplug sakadi klukuh blulang wadah anggure, sane madaging toya anggur sane anyar.
20Tiang nenten mrasidayang mendep. Tiang jaga mabaos.
21Tiang nentenja jaga ngilonin sapasira jua ring sajeroning paiegane puniki. Tiang nenten jaga ngajumang sapasira jua.
22Tiang nenten uning sapunapi caranipun ngajum-ngajum, tur Ida Sang Hyang Widi Wasa pacang digelis nyisipang tiang, yening tiang malaksana kadi asapunika.