Dual Panel1Nyidayangke kita ngejuk buaya Lewiatan aji pancing? Wiadin negul layahne aji tali?
2Nyidayangke kita ngejang tali di bungutne? Wiadin ngejang pancing di cadikne?
3Apake ia lakar morahan teken kita apang baang ia magedi? Apake ia nunas suastiastu teken kita?
4Apake ia ngae prajanjian teken kita, tur majanji lakar ngayahin kita salawas-lawasne?
5Apake kita lakar negul ia buka kedis-kedise ane sayangang kita, makadadi satunggaling bebanyolan pabuat wang jeron kitane?
6Nyakke parabendegane matawahang ia? Nyakke dagange nampah tur ngadep ia?
7Nyidayangke kita nebek kulitne aji tumbak, wiadin nusuk tenggekne aji linggis?
8Tegarang usud acepok, sinah kita tusing buin makeneh negarang, tur kita lakar tusing taen engsap teken siate ento.
9Asing-asing anak ane nepukin Lewiatan, ilang kawanenannyane tur bah ka tanahe.
10Mara ia bangun, ia galak pesan tur tusing ada anak bani majujuk di arepnyane.
11Nyenke ane nyidayang nglawan ia, tur enu rahayu? Di sakuub gumine tusing ada ane nyidayang nglawan ia.
12Jani Ulun nuturang teken kita unduk batis buaya Lewiatane ento, muah ngambarang amunapa siteng muah geden batisne ento.
13Tusing ada anak nyidayang nguek bajunne ane paling di sisina, muah nusuk baju besi ane anggona.
14Nyenke ane nyidayang mukak cadikne, ane kiter baan giginne ane ngresresin?
15Tundunne malakar aji tameng dada ane mejejer, kategul tekek dadi abesik kantos buka batune.
16Tamenge ento atep tur dempet dadi besik, kanti angine tusing nyidaang macelep di selagane.
17Tamenge ento madeket tekek pesan, kanti tusing dadi baan malasang.
18Yen buaya Lewiatane ento mabangkes laut pesu endih makebiar, tur matanne masunaran buka matan aine mara endag.
19Uli bungutne pesu api ngendih, muah lelatun apine membah makebiar.
20Uli cunguhne pesu andus malepuk, buka andus padange ane puun, ane anggona munpunin payuk.
21Angkihane ngranayang apine ngendih, tur apine nilap uli bungutne.
22Baongne kekeh pesan, kanti anake ane katemu teken ia pada karesresan.
23Kulitne tusing ada ane mes angan abedik. Ia katos tur kekeh buka besine.
24Kenehne katos buka batune tur tusing ngelah jejeh angan abedik, katos muah kekeh buka tugu batune.
25Yening ia bangun, yadian anak ane paling sitenga sinah pada tengkejut. Anake ento pada jejeh tur tusing ada anak ane nyidayang nulungin.
26Tusing ada pedang ane nyidayang natunin ia. Tusing ada tumbak wiadin panah muah lembing nyidayang mencanen ia.
27Sawireh pabuat ia, besine lemet buka sumine, muah temagane ento embuk buka kayune ane berek.
28Tusing ada panah nyidayang ngulah ia. Batu kaange ane kasabatang sig iane, rasaanga buka kalambet aji sumi.
29Pabuat ia tungkede ento satmaka sumi akatih, tur ia kedek yan anak nibakang tumbak teken ia.
30Klupasan basangne buka clebingkahe ane magigi, ia nyeluh tanahe ane buug buka tenggalane.
31Ia ngubek pasihe kanti yehne maluab tur kanti madidih buka lengise ane di pangorengane.
32Rurunge ane entapa dadi galang maglanaran, muah pasihe dadianga didih ane putih.
33Di gumine tusing ada ane nyandang bandingang teken ia. Ia sato ane tuara ngelah jejeh.
34Ia nemberang sakancan buron ane paling sombonga. Ia dadi ratun sakancan satone ane galak-galak.”