Dual Panel1Dane Ayub tumuli masaur, sapuniki: “Inggih sawiakti kadi asapunika. Indike punika makasami sampun piragi tiang ipidan. Nanging kadi asapunapi antuka imanusa jaga menang mawicara nglawan Ida Sang Hyang Widi Wasa?
2(9:1)
3Sapunapike antuka jadmane jaga nglawan Ida? Ida mrasidayang mataken panyiuan akehipun, nanging adiriko tan wenten anak sane mrasidayang nyaurin.
4Ida Sang Hyang Widi Wasa kalintang wicaksana tur maha kuasa. Tan wenten jadma sane mrasidayang mapas Ida.
5Tan pawangsit Ida ngisidang gunung-gununge, tur Ida ngenyagang ipun malantaran pidukan Idane.
6Ida Sang Hyang Widi Wasa ngadakang linuh tur ngejerang jagate. Ida ngejerang dasar jagate.
7Ida mrasidayang ngandeg suryane mangda sampunang endag, miwah bintange mangda nenten endag rikalaning wengi.
8Tan wenten anak sane nulungin Ida Sang Hyang Widi Wasa ngebatang langite, miwah nyekjek tundun ombak segarane sane ageng-ageng.
9Ida Sang Hyang Widi Wasa ngantungang bintang-bintange ring langite, inggih punika: bintang Perahu, bintang Tenggala, bintang Kartika miwah bintang-bintange bedelod.
10Iraga nenten mrasidayang ngresep ring pakardin Idane sane agung-agung punika, miwah ring katawahan-tawahan Idane sane nenten keni winilang akuehipun.
11Ida Sang Hyang Widi Wasa mamargi nglintang, nanging tiang nenten mrasidayang manggihin Ida.
12Ida ngambil sakancan sane arsayang Ida, tur nenten wenten anak sane mrasidayang nyadelin Ida. Tan wenten anak sane purun matur pitaken kadi asapuniki: ‘Punapike sane laksanayang Palungguh IRatu?’
13Pidukan Ida Sang Hyang Widi Wasa tetep manggeh. Ida ngenyagang meseh-meseh Idane sane nulungin Rahab nglawan Ida.
14Duaning punika, sapunapike antuk tiang nabdabang baos, buat ngaturang pasaur ring Ida Sang Hyang Widi Wasa?
15Yadiastun tiang tan paiwang, tan dados tan tiang patut nunas sih pasuecan Ida Sang Hyang Widi Wasa sane dados hakim tiange.
16Yadiastun ring pradene Ida nglugrain tiang matur, tiang nenten mrasidayang ngega, mungguing Ida jaga mirengang atur tiange.
17Ida nedunang angin ribut buat nigtig tiang kantos balan, saha nenten wenten dadalanipun punapa-punapi.
18Ida nenten ngicen tiang mangkihan, Ida sampun ngebekin urip tiange antuk sakit ati.
19Punapike tiang patut ngindayang maksa, inggih punika maksa Ida Sang Hyang Widi Wasa? Patutke tiang ngiring Ida ka pangadilan? Sapasirake sane jaga mrasidayang nalih Ida?
20Tiang tan paiwang, samaliha tiang astiti bakti ring Ida, nanging baos tiange iwang, tur saluiring sane baosang tiang punika rupanipun sakadi nyisipang tiang.
21Tiang tan paiwang, nanging tiang nenten malih nglinguang indike punika. Tiang nenten lingu ring urip tiange. Santukan makasami pateh tan wenten binanipun. Yadiastun iwang, yadian tan paiwang iraga jaga kasirnayang antuk Ida Sang Hyang Widi Wasa.
22(9:21)
23Ida Sang Hyang Widi Wasa ica, yen anake sane tan paiwang punika nadak padem.
24Ida Sang Hyang Widi Wasa maicayang jagate punika ring jadmane dursila. Ida nadosang sakancan paningalan hakime pada buta. Yen nenten Ida sane ngardi asapunika, nenten wenten malih anak lianan sane mrasidayang.
25Tuuh tiange malaib macuet, tur nenten wenten sane becik.
26Tuuh tiange malaib sakadi prau sane pinih becata, becatipune tan bina sakadi sikepe nyander kelinci.
27Yening tiang makenyir tur ngindayang nglaliang sakit tiange, sakancan kasangsaran tiange sami marawat ring matan tiange. Tiang uning mungguing Ida Sang Hyang Widi Wasa ngamanggehang tiang dados anak iwang.
28(9:27)
29Santukan tiang kamanggehang iwang, napi gunanipun tiang makewuhin dewek?
30Tan wenten sabun sane mrasidayang ngumbah dosan tiange.
31Ida Sang Hyang Widi Wasa ngentungang tiang ka bangbang endute sane cemer, ngantos panganggen tiange marasa kimud ring dewek tiange.
32Yening Ida Sang Hyang Widi Wasa punika maraga manusa, sinah tiang mrasidayang ngaturang pasaur ring Ida. Tiang mrasidayang ngiring Ida ka pangadilan buat nepasin wicaran tiange.
33Nanging nenten wenten hakim ring pantaran tiange ngiring Ida, nenten wenten sane ngadilin tiang sareng kalih, inggih punika tiang ngiring Ida Sang Hyang Widi Wasa.
34Duh Ratu Sang Hyang Widi Wasa, ledang Palungguh IRatu wusan nyisipang titiang. Kaonangja panyangsaran Palungguh IRatune punika.
35Titiang nenten ajerih. Titiang jaga matur, santukan titiang uning ring daging manah titiange newek.