Dual Panel1Sane mangkin Dane Bileam sampun uning, mungguing Ida Sang Hyang Widi Wasa ngarsayang mangda dane ngamertanin bangsa Israel. Duaning punika dane nenten malih ngrereh pituduh sakadi sane sampun margiang dane punika. Dane Bileam raris maksian ka tegal melakange.
2Irika cingak dane bangsa Israel sedek ngwangun kemahnyane magompyok-gompyok, manut suku bangsannyane suang-suang. Dane Bileam tumuli kereh antuk Roh Ida Sang Hyang Widi Wasa,
3mawinan dane ngwedalang ramalane puniki: “Puniki pawarah Bileam pianak Beore, anak sane ngeton paindikan-paindikan sane jaga rauh.
4Titiang kicen kawagedan buat miragiang pawuwus sane saking Ida Sang Hyang Widi Wasa. Titiang ngeton antuk matan titiange wahyu sane kapakantenang antuk Ida Sang Hyang Widi Wasa Sane Maha Kuasa.
5Kemah-kemah wong Israele kalintang becik.
6Waluya kadi rerodan wit palmane, luir taman ring sisin tukade, tur tan bina sakadi wit gaharune sane katandur antuk Ida Sang Hyang Widi Wasa, luir wit aras sane ring sisin pancorane.
7Bibite mentik lanus ring tegale, kasriokin sabeh, kantos tan kirang toya. Ratunnyane jayengrana langkungan ring Sang Prabu Agag, wewidangannyane linggah pisan.
8Ida Sang Hyang Widi Wasa makta ipun medal saking Mesir. Ida mayuda pabuat ipun sakadi banteng alase. Meseh-mesehnyane sami telas kabaksa, tulang-tulangnyane kenyagang, panah-panahipune kaelungang.
9Bangsane puniki waluya sakadi singa sane kuat, sapasirake sane pacang purun mlegendahang ipun, rikala ipun katuju mararian. Sapasiraja ngamertanin Israel ipun pacang kamertanin. Sapasiraja nemah Israel, ipun pacang katemah.”
10Irika Ida Sang Prabu Balak kalintang duka, tumuli nekekang gemelan idane sarwi ngandika ring Dane Bileam sapuniki: “Guru aturin tiang mriki buat jaga nemah meseh-meseh tiange, nanging guru jeg ngamertanin ipun, ngantos ping tiga.
11Sane mangkin rarisang mantuk, tiang sampun majanji jagi ngupahin guru, nanging Ida Sang Hyang Widi Wasa nenten nglugrain guru nampi upah.”
12Atur Dane Bileam, sapuniki: “Boyake sampun aturang titiang ring utusan-utusan druene sane ngrauhin titiang.
13Yadian palungguh iratu maicayang ring titiang sakancan perak miwah mas sane wenten ring puri, titiang nenten mrasidayang lempas saking titah Ida Sang Hyang Widi Wasa, buat nglaksanayang sapakitan titiange newek. Titiang wantah mrasidayang maosang sane kapangandikayang antuk Ida Sang Hyang Widi Wasa.”
Ramal
14Dane Bileam matur ring Ida Sang Prabu Balak, sapuniki: “Sane mangkin titiang jagi mawali ring bangsan titiange. Nanging sadurung titiang mapamit, titiang meled ngaturang pakeling ring palungguh iratu ngeniang indik sane pacang kamargiang antuk bangsa Israele benjang pungkur marep ring bangsan palungguh iratune.”
15Irika Dane Bileam ngucapang ramalan danene sapuniki: “Puniki baos Bileam, pianak Beore, baos anake sane ngeton paindikan sane jaga rauh.
16Sane mrasidayang miragiang napi sane kapangandikayang antuk Ida Sang Hyang Widi Wasa. Sane kalugra nampi pangweruhan saking Ida Sang Hyang Widi Wasa Sane Maha Luur. Antuk matan titiange newek titiang sampun ngeton wahyu sane saking Ida Sang Hyang Widi Wasa Sane Maha Kuasa.
17Titiang ngeton indik kawentenan bangsa Israele ring benjang wekas. Titiang ngeton satunggaling ratu macaya sakadi bintang, sane endag ring pantaran bangsane punika. Ida pacang rauh saking Israel sakadi bintang kukus. Ida pacang ngebug parapamimpin Moabe, tur jaga ngaonang bangsa Sete makasami.
18Ida pacang ngaonang meseh idane ring Edom tur tanahnyane pacang kambil dados padruen idane, kantos wong Israele tansah molih ring rana.
19Bangsa Israele pacang nyekjek ipun kantos tan wenten sane kantun magantulan.”
20Sasampune punika sajeroning wahyu, Dane Bileam nyingak wong Amalek. Duaning punika dane tumuli ngamedalang ramalan sane kadi asapuniki: “Saking pantaran sakancan bangsane ring mrecapada bangsa Amaleke punika sane pinih kuasa. Nanging bangsane punika jagi sirna salami-laminipun.”
21Sajeroning wahyu puniki, Dane Bileam ngaksi katurunan Dane Kain. Dane tumuli nguncarang ramalan danene kadi asapuniki: “Genah sane tongosin ragane punika wiakti tentrem, waluya sakadi sebun paksine ring batu kaange sane tegeh.
22Nanging ragane, wong Keni jagi kasirnayang, rikala ragane kabakta ka Asur makadados tawanan.”
23Sasampune punika Dane Bileam taler nguncarang ramalan danene puniki: “Sapasirake punika sane parum baler?
24Jagi wenten rombongan kapal rauh saking Siprus, tur ngaonang Asur miwah Eber. Nanging ipun taler jagi keni pasisip ngantos salami-laminipun.”
25Pamuputipun Dane Bileam raris makinkin, tumuli mawali budal, tur Sang Prabu Balak taler makaon.