Dual PanelWaris
1Parapamimpin kulawarga sajeroning palingsehan Dane Gilead, okan Dane Makir inggih punika putun Dane Manase, okan Dane Yusup, raris tangkil ring Dane Musa miwah pamimpin-pamimpin sane lianan.
2Sapuniki aturnyane: “Ida Sang Hyang Widi Wasa ngandikayang semeton ngedumang tanahe puniki ring pantaran wong Israele, malantaran nganggen undi. Ida taler ngandikayang parasemeton mangda maicayang tanah warisan nyaman tiange Selapehad ring pianak-pianaknyane sane luh-luh.
3Nanging semeton patut eling, mungguing yen ipun nganten ngajak anak muani sane saking suku lianan, kenginan tanah ipune punika jaga kaderbeang antuk suku sane lianan punika. Malantaran antuk punika, tanah sane sampun kapastikayang dados wewidangan suku bangsan tiange puniki jaga sayan kirang.
4Ring Taun Kabebasane rikala sakancan pagelahan anake sane sampun kadol, kawaliang ring sang pecak nerbeang, tanah pianak-pianak Selapehade punika jaga tetep dados paderbean kurenan ipune, kantos suku bangsan tiange kicalan tanahe punika.”
5Dane Musa raris ngrauhang titah Ida Sang Hyang Widi Wasa ring bangsa Israel, kadi asapuniki: “Apa ane orahanga baan suku Manasene ento saja beneh.
6Sawireh keto Ida Sang Hyang Widi Wasa ngandikayang, mungguing pianak-pianak Selapehade ane luh-luh ento bebas nganten ngajak anak ane demenina, asal sajeroning suku bangsannyane niri.
7Tanah warisan asing-asing wong Israele lakar tetep masangketan teken suku bangsannyane.
8Asing-asing anak luh ane nampi waris tanah sajeroning salah tunggal suku Israele, ia patut nganten ngajak anak uli suku bangsannyane ento. Malantaran ento asing-asing anak Israel lakar nampi waris leluurnyane,
9kanti tanah warisane ento tusing lakar makisid uli sukune abesik ka sukune ane lenan. Sabilang suku bangsa lakar tetep ngelahang tanah warisannyane niri-niri.”
10Duaning punika, satinut ring titah Ida Sang Hyang Widi Wasa ring Dane Musa, okan Dane Selapehade makalelima punika, inggih punika: Dane Mahla, Tirsa, Hogla, Milka miwah Noa, raris marabian ngajak misanan danene.
11(36:10)
12Dane pada marabian ngajak anak saking palingsehan-palingsehan sajeroning suku Manase, okan Dane Yusup. Malantaran punika tanah warisan danene tetep dados paderbean suku bangsan ajin danene.
13Kadi asapunika pidabdab-pidabdab miwah awig-awig sane kapaicayang antuk Ida Sang Hyang Widi Wasa ring bangsa Israel, malantaran Dane Musa, rikalaning bangsa Israele wenten ring tanahe dangsah ring Moab, nampek ring Tukad Yordane, marep-arepan ring kota Yerikone.