Dual PanelDane
1Sasampun paindikane punika mamargi, parapamimpine tumuli pada rauh tur maosang ring tiang, mungguing wong Israel, parapandita miwah wong Lewine, nenten nganehang raga saking jadma uedane irika, luiripun wong Kanaan, wong Het, wong Peris, wong Yebus, wong Amon, wong Moab, wong Mesir miwah wong Amorine. Dane ipun sareng sami pada ngamargiang paindikan sane cemer.
2Wong Yahudine sampun pada nganten ngajak anak istri wong sunantara, duaning punika kaulan Ida Sang Hyang Widi Wasa sane suci sampun dados leteh. Malahan parapamimpin miwah paraprakanggene sane nyontoin malaksana sane kadi asapunika.
3Rikala tiang miragi indike punika, tiang raris nyetset pangangge miwah jubah tiange, tur mutbut bok miwah jenggot tiange, tumuli negak tur engsek.
4Tiang negak nandang sedih irika ngantos rauh masan anake ngaturang aturan nyoreang, tur rakyate ngawitin mapunduh ngiter tiang, inggih punika anake sane marasa ajerih, malantaran sabdan Widin Israele ngeniang indik dosa-dosan jadmane sane mawali saking paselongan.
5Rikala rauh masan anake ngaturang aturan nyoreang, tiang raris bangun saking pategakan tiange nandang sedih punika. Tiang tumuli matedoh ngastawa, kari nganggen pangangge miwah jubah tiange sane setset punika, sinambi nyakupang lima ring ayun Ida Sang Hyang Widi Wasa, Widin tiange,
6kadulurin atur sapuniki: “Oduh Ratu Widin titiange, titiang rumasa kimud pisan, kantos titiang nenten purun nulengek buat mandreng Palungguh IRatu. Dosan titiange madugdug nglintangin tendas titiange, tur tegehipune sampun nyujuh langit.
7Ngawit saking paraleluur titiange kantos rauh mangkin, agung pisan kiwangan titiange. Malantaran dosan titiange, titiang sareng sami, pararatu miwah parapanditan titiange sampun serahang Palungguh IRatu ring pararatu sunantarane, tur titiang kapunggal, kajarah miwah katawan. Titiang kanistayang ring arepan jadmane katah sakadi sane mamargi sane mangkin.
8Sane mangkin wau pisan titiang ngrasayang sih pasuecan Palungguh IRatu, Widin titiange. Palungguh IRatu sampun nglugrain wenten makudang-kudang anak saking pantaran titiange luput saking katawan tur mapaica genah magumana ring genahe sane suci puniki. Makadados silur titiange dados tawanan, Palungguh IRatu sampun mapaica urip anyar ring titiang.
9Yadiastun titiang dados panjak, nanging Palungguh IRatu nenten manggayang titiang kapanjakang. Palungguh IRatu ngawinang titiang kasayangang antuk pararatun panegara Persiane, kantos titiang polih sih pasuecan idane buat ngwangun Perhyangan Agunge, ngrajegang malih sane pecak sampun uug, kadi asapunika taler kalugra muponin sutrepti rahayu iriki ring Yehuda miwah ring Yerusalem.
10Nanging sane mangkin, oduh Ratu Widin titiange, sasampun sakancan paindikan puniki mamargi, punapike sane sandang aturang titiang malih ring Palungguh IRatu? Titiang sampun nungkasin malih titah Palungguh IRatune sane sampun paicayang Palungguh IRatu,
11malantaran paranabi parekan Palungguh IRatune. Dane ngandikayang mungguing jagate sane pacang aug titiang punika jagat sane leteh, santukan kaletehin antuk jadma uedane irika. Jadmane irika sampun nglaksanayang indik sane cemer miwah saluiring paindikan sane kabaos leteh, saking tanggun jagate sane asiki kantos rauh ka tanggunnyane sane lianan.
12Dane ngandikayang ring titiang mungguing titiang nenten dados juang kajuang ring jadma uedane punika, kadi asapunika taler tan kalugra ngawinang jadmane irika muponin kerta raharja, mangda titiang mrasidayang muponin pamupon tanahe sane becik, tur matamiang tanahe punika ring pianak-pianak titiange turun-temurun.
13Sasampune titiang muponin palan dosa miwah kiwangan titiange sane ageng punika, Palungguh IRatu, Widin titiange nenten nyisipang titiang anut ring dosan titiange, nanging kantun nglugrain titiang urip.
14Duaning punika, sapunapiang titiang jaga malih tempal ring titah Palungguh IRatune, tur saling juang ngajak bangsane sane jaat punika. Yening titiang tempal, sampun janten Palungguh IRatu bendu ring titiang tur pacang nyirnayang titiang, kantos nenten wenten sane kantun urip.
15Oduh Ratu Sang Hyang Widi Wasa, Widin Israele. Palungguh IRatu sane maraga adil. Palungguh IRatu nglugrain titiang kantun urip sakadi sane mangkin. Titiang ngangken kiwangan titiange ring ayun Palungguh IRatu. Sujatinipun titiang nenten pantes pedek tangkil ring ayun Palungguh IRatu.”