Alkitab Mobile SABDA
[VER] : [BALI]     [PL]  [PB] 
 <<  Imamat 1 >> 

1Ida Sang Hyang Widi Wasa ngesengin Dane Musa, tumuli masabda ring dane saking tengah Kemah Linggih Ida Sang Hyang Widi Wasa, tur Ida maicayang pidabdabe puniki ring dane,

2sane patut kalaksanayang antuk bangsa Israele, rikala ipun ngaturang aturanipune. Yen wenten anak ngaturang aturan wewalungan, aturane punika patut marupa banteng, biri-biri wiadin kambing paderbeanipune.

3Yening ipun ngaturang aturan maborbor, marupa banteng, ipun patut ngaturang banteng jagiran sane tan paceda. Bantenge punika patut aturang ipun ring arepan gapuran Kemah Linggih Ida Sang Hyang Widi Wasa, mangda Ida Sang Hyang Widi Wasa, ledang nrima ipun.

4Anake punika patut ngenahang limanipune ring tenggek aturane punika, tur aturane punika jaga katrima antuk Ida Sang Hyang Widi Wasa makadados aturan panyupat dosa-dosanipune.

5Sapangrarisipun bantenge punika patut katampah irika ring arepan gapuran Kemah Linggih Ida Sang Hyang Widi Wasa. Parapandita katurunan Dane Harun patut ngaturang getih bantenge punika ring Ida Sang Hyang Widi Wasa, tur sasampune punika raris mriokang getihe punika ring sisin genah aturane punika makaileh, inggih punika pamorboran aturan sane wenten ring ajeng gapuran Kemah Linggih Ida Sang Hyang Widi Wasa punika.

6Sasampune punika, anake punika patut mlulangin tur mukang-mukang bantenge punika.

7Parapanditane patut nabdabang saang ring pamorboran aturane tumuli kancungin geni.

8Parapanditane patut ngenahang pukang-pukangan rauh tenggek miwah muluk wewalungane ring genine punika.

9Anake punika ngumbah jejeron miwah batis wewalungane punika sane durian tur parapanditane sane nabdabang upacarane punika patut morbor aturane punika makasami. Ambun aturan rayunane punika ngawinang ledang pakayunan Ida Sang Hyang Widi Wasa.

10Yening sane katurang biri-biri wiadin kambing, biri-biri wiadin kambinge punika patut sane muani samaliha nenten wenten cedanipun.

11Anake punika patut nampah wewalungane punika ring sisi kaler pamorboran aturane, tur parapanditane patut mriokang getihnyane ring sisin pamorboran aturane makaileh.

12Sasampune anake punika mukang-mukang wewalungane punika, parapandita sane nabdabang upacara punika patut ngenahang pukang-pukangane punika makasami, rauh ring tenggek miwah muluknyane ring genine.

13Anake punika patut ngumbah jejeron miwah batis wewalungane punika sane durian tur parapanditane patut ngaturang aturane punika ring Ida Sang Hyang Widi Wasa, saha morbor punika makasami ring pamorboran aturane. Ambun aturan rayunane punika ngawinang ledang pakayunan Ida Sang Hyang Widi Wasa.

14Yening wenten anak sane ngaturang paksi buat dados aturan maborbor, ipun patut ngaturang paksi kukur wiadin paksi dara.

15Sang pandita patut ngaturang paksine punika ring pamorboran aturane, raris ngilut baong paksi punika, tumuli morbor tenggeknyane ring pamorboran aturane punika. Getihnyane patut kakecorang ring sisin pamorboran aturane punika.

16Blimbinnyane miwah sadagingipun patut kamedalang tur kentungang ring dangin pamorbor aturane punika, inggih punika ring genah abune.

17Sapangrarisipun paksine punika patut kagemel bongkol kampidnyane buat nyibak awakne, nanging kampidnyane sampunang ngantos keles. Sasampune punika paksine punika raris kaborbor makasami ring pamorboran aturane. Ambun aturan rayunane punika ngawinang ledang pakayunan Ida Sang Hyang Widi Wasa.


  Share Facebook  |  Share Twitter

 <<  Imamat 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel