Dual PanelMerta
1Ida Sang Hyang Widi Wasa masabda sapuniki: “Edaja kita ngae arca wiadin nyujukang bedogol wiadin tugu batu ane mukir, buat lakar kasumbah. Ulun ene Ida Sang Hyang Widi Wasa, Widin kitane.
2Luihangja rerainane ane manut sopacaraning agama, tur ajiangja tongos panyungsungan Ulune. Ulun ene Sang Hyang Widi Wasa.
3Yening kita malaksana satinut teken pidabdab-pidabdab Ulune, sairing teken pituduh-pituduh Ulune,
4Ulun lakar nurunang ujan dikalan masannyane, apanga tanahe ngwetuang pamuponnyane, muah punyan woh-wohane pada mabuah.
5Pamupon tanah kitane lakar maliah-liah, kanti yen suba benehne ngalap buah anggur, kita enu sedeng itepe manyi gandum. Tur dikalan suba masanne nyambehang gandum, kita enu iteh ngalap buah anggur. Kita lakar tetep cukup ngelah pangan kinum tur lakar muponin rahayu di gumin kitane.
6Ulun lakar nedunang kerta rahayu di gumin kitane kanti kita nyidayang pules saha tusing ngelah jejeh teken nyen-nyen. Ulun lakar ngaadang buron-burone ane ngranayang baya uli gumin kitane, buina tusing lakar ada perang buin ditu.
7Kita lakar ngalahang musuh-musuh kitane.
8Ajak lelima kita nyidayang ngalahang musuh satus tur kita ajak satus lakar nyidayang ngalahang musuh dasa tali.
9Ulun lakar ngamertanin kita, tur mapaica pianak liu teken kita. Apaja ane suba janjiang Ulun teken kita, ento lakar isinin Ulun.
10Pamupon kitane lakar maliah-liah, kanti pamupone ento cukup buat ataun. Malahan kita kantos ngentungang sisan pamupon ane malunan apanga kita ngelah tongos nyimpen pamupon ane anyar.
11Ulun lakar malinggih di pantaran kitane, di Kemah Ulune ane suci, tur Ulun tusing lakar taen ninggal kita.
12Ulun lakar ngiangin kita. Ulun lakar dadi Widin kitane, tur kita dadi kaulan Ulune.
13Ulun ene Ida Sang Hyang Widi Wasa, Widin kitane ane nuntun kita pesu uli di Mesir, apanga kita tusing buin dadi panjak. Ulun suba nyirnayang kakuasan ane ngala-ala kita, tur ngawanang kita idup buka anake ane merdeka.”
Ukuma
14Ida Sang Hyang Widi Wasa masabda sapuniki: “Yening kita tusing satinut teken pituduh Ulune, kita lakar kukum.
15Yening kita tusing nyak ngamanggehang pidabdab-pidabdab muah pituduh-pituduh Ulune, tur mamurug prajanjian ane suba adakang Ulun ngajak kita,
16Ulun lakar ngukum kita. Ulun lakar nurunang bencana sig kitane, panyakit muah gelem ngetor ane tusing dadi segerang, kanti matan kitane buta muah idup kitane sangsara. Kita lakar nyambeh bibit, nanging kita tusing lakar mupuang asilne, sawireh musuh-musuh kitane lakar teka ngalahang kita tur nyarah kanti telah sakancan ane suba pamula kita.
17Ulun lakar nglawan kita kanti kita kakalahang tur sakancan anake ane geting teken kita lakar mrentah kita. Kita lakar kaliput baan jejeh ngetor kanti kita lakar malaib, yadiapin tusing ada anak ane nguber kita.
18Yening kita suba ngrasayang ukuman ane buka keto, nanging kita tusing masih nyak satinut teken Ulun, Ulun lakar ngimbuhin ukuman kitane ento kanti tikel ping pitu.
19Kita kaliwat mrekak, nanging Ulun lakar ngilangang mrekak kitane ento. Lakar tusing ada ujan ulung, tur tanah kitane lakar tuh latuh kanti buka batune.
20Sakancan katuyuhan kitane tusing lakar mapikolih, sawireh tanah kitane tusing lakar mupuang muah punyan buah-buahan kitane tusing lakar mabuah.
21Yening kita enu tetep bani nglawan Ulun, tur tusing nyak satinut teken Ulun, Ulun lakar ngimbuhin ukuman kitane kanti tikel ping pitu.
22Ulun lakar nekaang buron galak sig kitane. Burone ento lakar nyarap pianak-pianak kitane, ngamatiang ubuhan kitane, tur nelahang kita, kanti gebogan kitane enu tuah abedik, tur rurung-rurung di gumin kitane lakar suung.
23Yening sasubane kita ngrasayang ukumane ento kita masih tusing nyak satinut teken Ulun, nanging enu bani nglawan Ulun,
24Ulun lakar nglawan kita tur ngukum kita aji ukuman ane tikel ping pitu abotne teken ane suba-suba.
25Ulun lakar nekaang siat sig kitane, buat ngukum kita sawireh kita suba lompang teken prajanjian iragane, buina yening kita mapunduh di kotan kitane buat nyayubang dewek kitane, Ulun lakar nibakang panyakit ane tusing dadi segerang sig kitane, kanti sing dadi tusing kita lakar nyerah teken musuh-musuh kitane.
26Kita lakar kuangan pangan kinum kanti yen ada anak luh ajaka adasa ia merluang pamanggangan roti tuah abesik dogen, buat anggona manggang rotinnyane ajaka makejang. Dedaarane ento lakar dum-dumanga, tur yen suba telah baan kita, kita enu masih marasa seduk.
27Yening sasubane kita ngrasayang ukumane ento makejang, kita enu masih tetep bani nglawan Ulun, tur tusing nyak satinut teken Ulun,
28Ulun lakar nglawan kita maduluran bebendu ane sanget pesan, laut ngukum kita buin pitung tikelan sangetan teken ane suba-suba.
29Kita lakar nandang seduk kaliwat-liwat, kanti kita lakar naar pianak kitane padidi.
30Ulun lakar nguugang palinggih-palinggih tongos kitane mabakti, nguugang tongos kitane morbor menyan tur ngentungang bangke-bangken kitane di duur arca-arcan kitane ane suba uug ento. Baan seneb Ulune,
31Ulun lakar madingang kota-kotan kitane dadi reruntuhan. Tongos-tongos kitane mabakti lakar uugang Ulun, tur Ulun tusing lakar kayun nrima aturan-aturan kitane.
32Ulun lakar nguugang gumin kitane kanti benyah latig, kanti musuh-musuh ane ngaug gumin kitane lakar tengkejut nepukin uugane ane bes ngliwat ento.
33Ulun lakar nekaang siat di gumin kitane, tur nyambehang kita di gumin wong sunantarane. Tegal-tegalan kitane lakar neng, tur kota-kotan kitane lakar tetep uug maglaturan.
34Dikalane ento tanah kitane ane tusing taen baang kita mangsegan lakar maan mangsegan kanti lega. Dikalan kitane enu di paselongan di gumin musuh-musuh kitane, tanah kitane lakar dadi neng. Malantaran ento tanah kitane lakar maan sela buat mangsegan.
35(26:34)
36Kita ane maselong di gumi ane lenan, lakar liput Ulun baan keneh jejeh ane sanget pesan, kanti yen ada krisikan don ampehang angin, kita lakar pada malaib. Kita lakar malaib buka anake malaib di pasiatan, tur kita lakar labuh dikalane tusing ada musuh dikiwa tengen kitane.
37Kita lakar malaib patikaplug ngajak timpal dikalane tusing ada anak nguber kita, tur kita tusing lakar nyidayang masiat nglawan musuh, yadian ane buka kenkenja gobanne.
38Kita lakar mati di paselongan uluha baan gumin musuh-musuh kitane.
39Ada makudang-kudang anak di pantaran kitane, ane lakar enu idup di gumin musuh kitane. Ia lakar nandang sangsara uli krana dosannyane padidi muah uli krana dosan leluur kitane.
40Nanging katurunan kitane lakar ngangkenin dosannyane padidi muah dosan leluurnyane ane suba bani nglawan Ulun, tur brontak nglawan Ulun,
41kanti Ulun mabalik nglawan ia tur ngutang ia di paselongan di gumin musuhne. Pamragatne yen katurunan kitane suba ngasorang dewekne tur suba ngemasin ukuman ulihan dosan leluurnyane nglawan Ulun,
42ditu Ulun lakar inget buin teken prajanjian Ulune ngajak Yakub, Ishak muah Abraham. Ulun lakar nganyarin buin janjin Ulune, buat maicayang tanahe ento teken kaulan Ulune.
43Nanging ane paling malu, jlemane ane nongos di gumine ento patut katelahang makejang, apanga tanahe ento sajaan maan mangsegan, buina kaulan Ulune patut ngemasin sakancan ukumane ane katibakang teken ia, baane ia tusing nyak satinut teken pidabdab muah pituduh-pituduh Ulune.
44Nanging yadiastun dikalan iane enu di gumin musuhne, Ulun tusing lakar ngalahin wiadin nyirnayang ia ajaka makejang. Sawireh yen Ulun nyirnayang ia, ento marti Ulun megatang prajanjian Ulune ngajak ia, apa buin Ulun ene Sang Hyang Widi Wasa, Widinnyane.
45Ulun lakar nganyarang prajanjian ane adakang Ulun ajak leluurnyane, dugase Ulun ngadegang kakuasan Ulune teken sakancan bangsane, malantaran Ulun nuntun kaulan Ulune makaad uli Mesir, apanga Ulun Sang Hyang Widi Wasa prasida dadi Widinnyane.”
46Makasami punika pidabdab miwah pituduh-pituduh sane kapaicayang antuk Ida Sang Hyang Widi Wasa, katiba ring Dane Musa ring duur Gunung Sinaine, pabuat bangsa Israele sami.ANNA, INDONESIA